Левит 5 - Библи

Нүгэл сагааруулгын үргэл

¹ Хэрбээ али нэгэн ямар нэгэ үйлын гэршэ байһан, хараһан, мэдэһэн байжа, «дуулгаагүй һаа, хараалда хүртэхэт» гэжэ гэршэнэрые зарга шүүхэдэ дуудахые дуулаашье һаа, дуулгаагүй бол, нүгэлдэ хүртэхэ.

² Хэрбээ али нэгэн эндүүржэ, бузартай юумэндэ гараараа хүрөө һаа, үхэһэн ангай бэедэ гү, үхэһэн малай бэедэ, үхэһэн бузартай могой хорхойдошье хүрөө һаа, тэрэ хүн бузартаһаншье, гэмтэйшье болоно.

³ Хэрбээ хүнэй ямаршье бузар булай юумэндэ эндүүржэ хүрөөд, ойлгомторгүй ябаад, һүүлдэнь мэдээ һаа, тэрэ хүн гэмтэй.

⁴ Хэрбээ али нэгэн ама алдажа, ямаршье бодолгүйгөөр алибаа муу, һайншье хэрэгэй түлөө тангариг үгөөд, ойлгомторгүй ябаад, һүүлдэнь мэдээ һаа, тэрэ хүн гэмтэй болохо.

⁵ Хэрбээ хэн нэгэн эдэ олон гэмүүдэй али нэгэндэнь гэмтэй байгаад, нүгэлөө мэдэрээ һаа,

⁶ нүгэл хэһэнэйнгээ түлөө Эзэндэ жэжэ малһаа хони гү, али ямаа асараад, нүгэл сагааруулгын үргэл үргэг. Санаарта нүгэлыень арюудхаха.

⁷ Хэрбээ хони асарха шадалгүй байгаа һаа, нүгэлэйнгөө түлөө хоёр эмэ гү, али хоёр эрэ тагтаа шубуу асараг: нэгыень – нүгэл сагааруулгын үргэл гээд, нүгөөдынь – түгэс шатаалта үргэлдэ.

⁸ Тэдээнээ санаартада үгэг, санаарта нүгэл сагааруулгын үргэлдэ гэжэ зорюулаатай шубууе нэн түрүүн абаад, хүзүүень таһалангүй булга мушхаха.

⁹ Тиигээд тэрэнэй шуһаар үргэлэй шэрээгэй хана руу сүршөөд, үлэһыень үргэлэй шэрээгэй хаяа руу гоожуулха. Энэ хадаа нүгэл сагааруулгын үргэл гээшэ.

¹⁰ Нүгөөдыень номын ёһоор түгэс шатаалта үргэлдэ зорюулха. Тиигээд санаарта хэһэн нүгэлыень арюудхаад, тэрээндэ хүлисэл үршөөгдэхэ.

¹¹ Хэрбээ хоёр эмэ гү, али хоёр эрэ тагтаа шубуу асарха шадалгүй байгаа һаань, нүгэл сагааруулгын үргэл гэжэ эфаагай арбанай нэгэ хуби шэниисын гурил асараг. Тэрээн дээрээ оливын тоһо бү адхаг, гүгэл бү хэг, юундэб гэхэдэ, энэ хадаа нүгэл сагааруулгын үргэл гээшэ.

¹² Тэрээнээ санаартада асархадань, тэрэнь дүүрэн адха гурил абаад, үргэлэй тэмдэг хуби гээд, Эзэндэ зорюулһан бэлэгүүдтэй хамта үргэлэй шэрээ дээрэ шатааха. Энэ хадаа нүгэл сагааруулгын үргэл болоно.

¹³ Тиигээд санаарта али нэгэ нүгэл хэһыень арюудхаха. Тиигэжэ үршөөл хайра олгогдохо. Талхан үргэл мэтээр санаартада хүртэн үгтэхэ.

Гарза харюулгын үргэл

¹⁴ Эзэн Моисейдэ үгүүлбэ:

¹⁵ – Хэрбээ хүн эндүүржэ, Эзэнэй нангин зүйлдэ хэхэ ёһогүй юумэ хээ һаа, тэрэ гэмэйнгээ түлөө һүрэг хонид сооһоо ямаршье зэмдэг дутагдалгүй хуса үгэжэ гү, али санаартадай хэрэглэдэг мүнгөөр сэнгыень түлэг.

¹⁶ Ямар нэгэн нангин зүйлдэ гарза хохидол ушаруулбал, сэнгыень бусааха ёһотой, мүн үшөө дээрэнь үнэ сэнгэйнь табадахи хубиие нэмэжэ, санаартада бариг. Санаарта хэһэн гэмыень хусаар сагааруулха, тиигээд тэрэнэй гэм зэм хүлисэгдэхэ.

¹⁷ Юумэ мэдэхэгүй дээрэһээ Эзэнэй зарлигуудые эбдэжэ, хэхэгүй юумэ хэбэл, тэрэ хүн гэмтэй, нүгэлтэй болохо.

¹⁸ Тэрэ хүн гарза харюулгын үргэл гэжэ санаартада зэмдэг дутагдалгүй хуса асараг, үгышье һаа, хусын үнэ сэн түлэг. Юумэ мэдэхэгүй дээрэһээ эндүүржэ нүгэл хэһэн хүнэй гэмые санаарта үргэл мүргэл хээд, сагааруулха. Тиигээд хэһэн гэмынь хүлисэгдэхэ.

¹⁹ Энэ хадаа гарза харюулгын үргэл болоно, хүн Эзэнэй үмэнэ гарза тэхэрюулнэ мүн.