Левит 4 - Библи

Нүгэл сагааруулгын үргэл

¹ Эзэн Моисейдэ иигэжэ үгүүлбэ ха:

² – Израильшуудта соносхон иигэжэ хэлэ: Али нэгэнэй эндүүржэ, Эзэнэй зарлиг эбдээ һаань гү, али хэхэ ёһогүй юумэ хээ һаань,

³ һахил хүртэһэн санаартын нүгэл хилэнсэ хээд, арад зоноо гэмтэй болгоо һаань, нүгэлэйнгөө түлөө тэрэ нүгэл сагааруулгын үргэл гэжэ зэмдэг дутагдалгүй нэгэ буруу Эзэндэ үргэг.

⁴ Тэрэнээ майхан һүмын урда асараад, толгой дээрэнь гараа табяад, Эзэнэй үмэнэ амиинь таһалаг.

⁵ Һахил хүртэһэн санаарта үргэһэн малай шуһыень майхан һүмэ руу оруулаад,

⁶ хургаяа шуһанда дүрөөд, Эзэнэй нангин газарай халхабшын урда долоо дахин хургаараа шуһаар сүршэхэ.

⁷ Тиигээд санаарта Эзэнэй үмэнэ, майхан һүмэ соо байгаа санзай ууюулдаг үргэлэй шэрээгэй эбэрнүүдтэ үргэһэн малай шуһа түрхиг, бэшэ шуһыень майхан һүмын үүдэндэ байһан түгэс шатаалта үргэлэй шэрээгэй хаяа руу адхаг.

⁸ Тиигээд нүгэл сагааруулгын үргэлдэ буруунай бүхы өөхэ, гэдэһэ доторой һэмжэ,

⁹ хоёр бөөрыень өөхэтэйнь, хойто хоёр хүлэйнь өөхэ болон эльгэнэй өөхэ бөөрэтэйнь илгаха хэрэгтэй,

¹⁰ амгалан байдалай түлөө тахил тахиһан мэтээр. Санаарта түгэс шатаалта үргэлэй шэрээ дээрэ эдэ бүгэдые шатааг.

¹¹ Үргэһэн буруунай арһа болон бүхы мяхыень тархи, тагалсагуудтайнь, бүхы гэдэһэ дотортойнь, шабааһатайнь,

¹² буруунһаа үлэгшэ бүхы юумэ хотон хүреэнһөө гаргажа, сэбэр газарта абаашаад, үнэһэ адхадаг газарта түлеэн дээрэ шатааха хэрэгтэй. Үнэһэ хаана адхадаг бэ, тэндэл галдагдаха ёһотой.

¹³ Хэрбээ израильшуудай эндүүржэ, нүгэл хээд, тэрэнээ өөһэдөө мэдээгүй байгаа һаань, Эзэнэй зарлиг эбдээ һаань, хэхэгүй юумэ хээд, гэм зэмэтэй болоо һаань,

¹⁴ нүгэл хэһэнэйнь элирхэдэ, нүгэл сагааруулгын үргэл үргэхын тула бүхы арад зон эбэртэ бодо малһаа нэгэ бурууе майхан һүмын урда асараг.

¹⁵ Арадай ахамад ноёд Эзэнэй үмэнэ тэрэ буруунай тархи дээрэ гараа табиха, тиигээд Эзэнэй үмэнэ амиинь таһалха ёһотой.

¹⁶ Һахил хүртэһэн санаарта буруунай шуһа майхан һүмэ руу оруулаад,

¹⁷ хургаяа шуһанда дүрөөд, Эзэнэй үмэнэ халхабшын урда долоо дахин шуһаар сабдан сүршэг.

¹⁸ Тиигээд Эзэнэй үмэнэ, майхан һүмэ соо байһан үргэлэй шэрээгэй эбэрнүүдтэнь шуһа түрхеэд, бэшэ шуһыень һүмын үүдэндэ байһан түгэс шатаалта үргэлэй шэрээгэй хаяа руу адхаг.

¹⁹ Бүхы өөхыень гаргаад, үргэлэй шэрээ дээрэ галдаха.

²⁰ Нүгэл сагааруулгын үргэлдэ үргэһэн буруунтай юу хэдэг бэ, тэрээнииень бүтээхэ. Иигэжэ санаартын арюудхан бүтээхэдэнь, нүгэл хилэнсэнь арилгагдаха.

²¹ Тэрэ буруунай бэе хотон хүреэнһөө холодуулан абаашаад, урда тээхидэл адляар тэрэниие шатааха ёһотой. Энэ хадаа бүхы арад зоной нүгэл сагааруулгын үргэл гээшэ.

²² Хэрбээ удамаршын нүгэлдэ ороо һаань гү, али эндүүржэ, Эзэн Бурханайнгаа зарлиг эбдээ гээшэ һаань, хэхэгүй юумэ хээд, гэм зэмэтэй болоо һаань,

²³ нүгэл хэһэнэйнь элирхэдэ, зэмдэг дутагдалгүй нэгэ тэхэ асараг.

²⁴ Тэхын тархи дээрэнь гараа табяад, Эзэнэй үмэнэ, түгэс шатаалта үргэлэй газарта абаашаад, амиинь таһалаг: энэ хадаа нүгэл сагааруулгын үргэл гээшэ.

²⁵ Тиигээд санаарта түгэс шатаалта үргэлэй шэрээгэй эбэрнүүдтэнь нүгэл сагааруулгын үргэлдэ зорюулһан амитанай шуһа хургаараа сүршөөд, бэшэ шуһыень тэрэ түгэс шатаалта үргэлэй шэрээгэй хаяа руу адхаг.

²⁶ Амгалан байдалай түлөө үргэһэн үргэл шэнгеэр, бүхы өөхыень үргэлэй шэрээ дээрэ шатааг. Иигээд санаарта нүгэл хилэнсыень арюудхаад, тэрээндэ хүлисэл үршөөгдэхэ.

²⁷ Хэрбээ али нэгэ юрын хүнэй эндүүржэ, нүгэл хээ һаань, Эзэнэй зарлиг эбдээ һаань, хэхэгүй юумэ хэбэлнь, тэрэ хүн гэмтэй болохо.

²⁸ Хэһэн нүгэлэйнь мэдэгдээ һаа, тэрэ хүн үргэл болгожо, зэмдэг дутагдалгүй ямаа асараад,

²⁹ тэрэ нүгэл сагааруулгын үргэл болохо ямаанай тархи дээрэнь гараа табяад, түгэс шатаалта үргэлэй газарта абаашаад, тэрэ ямаанай амиинь таһалха.

³⁰ Тиигээд санаарта түгэс шатаалта үргэлэй шэрээгэй эбэрнүүдтэнь шуһыень хургаараа сүршөөд, бэшэ шуһыень үргэлэй шэрээгэй хаяа руунь адхаг.

³¹ Амгалан байдалай түлөө үргэһэн үргэлдэл адляар бүхы өөхыень илгаад, санаарта үргэлэй шэрээ дээрэ галдажа, Эзэндэ таатай һайхан, үргэлэй хуншуу үнэр гаргаха. Иигэжэ тэрээниие санаарта арюудхаад, тэрээндэ хүлисэл үршөөгдэхэ.

³² Хэрбээ нүгэл сагааруулгын үргэлые хонин һүрэгһөө үргэхөө һанабал, зэмдэг дутагдалгүй хони асараад,

³³ нүгэл сагааруулгын үргэлдэ үргэһэн хониной тархи дээрэнь гараа табяад, түгэс шатаалта үргэлэй мал гаргадаг газарта абаашаад, амиинь таһалха.

³⁴ Тиигээд санаарта түгэс шатаалта үргэлэй шэрээгэй эбэрнүүдтэнь нүгэл сагааруулгын үргэлдэ үргэһэн хониной шуһа хургаараа сүршөөд, бэшэ шуһыень үргэлэй шэрээгэй хаяа руунь адхаг.

³⁵ Амгалан байдалай түлөө үргэһэн хониной өөхэ илгаһандал адляар, санаарта бүхы өөхыень илгаад, Эзэндэ үргэл болохыень үргэлэй шэрээ дээрэ тэрээниие галдаха. Иигэжэ санаарта хэһэн нүгэлыень арюудхаад, тэрээндэ хүлисэл үршөөгдэхэ.