Левит 3 - Библи

Амгалан байдалай түлөө үргэл

¹ Хэрбээ амгалан байдалай түлөө үргэл үргэхөө һанабал, эрэ гү, али эмэ эбэртэ бодо малһаа зэмдэг дутагдалгүйень шэлээд, Эзэнэй урда асараад,

² тархи дээрэнь гараа табяад, майхан һүмын үүдэнэй хажууда амиинь таһалаг. Аһарооной санаарта хүбүүд үргэлэй шэрээе зүг бүхэнһөөнь шуһаар сабдан сүршэхэ.

³ Амгалан байдалай түлөө үргэл үргэгшэ хүн Эзэндэ малай дотор һэмжэ,

⁴ хоёр бөөрэ өөхэтэйнь, өөхэтэй эльгэ болон хүлэйнь өөхэ илгаад, үргэхэ.

⁵ Аһарооной хүбүүд бүгэдыень үргэлэй шэрээ дээрэ абаашаад, носожо байгаа түлеэн дээрэхи түгэс шатаалта үргэлтэй хамта галдаха. Энэ хадаа Эзэндэ таатай һайхан үргэл, хуншуу үнэр гээшэ.

⁶ Хэрбээ амгалан байдалай түлөө Эзэндэ жэжэ малһаа үргэл үргөө һаа, зэмдэг дутагдалгүй эрэ гү, али эмэ мал асараг.

⁷ Хусаар үргэл хээ һаа, Эзэнэй үмэнэ асараад,

⁸ тархи дээрэнь гараа табяад, майхан һүмын дэргэдэ амиинь таһалаг. Аһарооной хүбүүд шуһаарнь үргэлэй шэрээ зүг бүхэнһөөнь сабдан сүршэг.

⁹ Амгалан байдалай түлөө үргэлэй өөхэ Эзэндэ үргэхэ хэрэгтэй: һүүлэй өөхэ нюрганай яһан хүрэтэр отолоод, мүн дотор өөхэ, гэдэһэ доторой һэмжэ, хото хошхоногойнь өөхэ,

¹⁰ хоёр бөөрыень өөхэтэйнь, хүлэйнь өөхэ, эльгэнэй өөхэ бөөрэтэйнь илгаад,

¹¹ эдэ бүгэдые санаарта үргэлэй шэрээ дээрэ галдаха ёһотой. Энэ галай эдеэн – Эзэндэ үргэл мүн.

¹² Харин тэхэ ямаагаар үргэл бүтээхэ гээ һаа, тэрээнээ Эзэнэй үмэнэ асараад,

¹³ гараа толгой дээрэнь табяад, майхан һүмын үүдэндэ амиинь таһалаг. Аһарооной хүбүүд шуһыень үргэлэй шэрээгэй зүг бүхэндэ сабдан сүршэхэ.

¹⁴ Эзэндэ үргэл болгон, тэхын дотор өөхэ, гэдэһэ доторой һэмжэ,

¹⁵ хоёр бөөрэ өөхэтэйнь, хойто хоёр хүлэй өөхэ, эльгэнэй өөхэ бөөрэтэйнь илгаха хэрэгтэй.

¹⁶ Эдэ бүгэдые санаарта үргэлэй шэрээ дээрэ галдаха ёһотой. Энэ галай эдеэн – таатай һайхан хуншуу үнэр гээшэ; бүхы өөхэн Эзэндэ зорюулагдаха ёһотой.

¹⁷ Ямаршье амитанай өөхэ, шуһые бү эдигты гэһэн хуулиие үеһөө үедэ, хаанашье ажаһуубал, хэтэ мүнхэдөө сахиха ёһотойт.