Левит 26 - Библи

Бурханай үреэлнүүд

¹ Мүргэхэ шүтөөн, элдэб дүрсэ, шулуун баханануудые өөһэдтөө бү табигты. Мүргэжэ байхаяа зурагтай шулуу өөрынгөө газар дээрэ бү табигты. Би танай Эзэн Бурхан гээшэб.

² Минии субботонуудые сахигты, минии нангин байрада шүтэгты: Би Эзэн гээшэб.

³ Хэрбээ таанад Минии гаргаһан ёһо гуримаар, захяа заабаряар нарин нягтаар ябаа һаатнай,

⁴ Би таанадта саг соонь бороо оруулхаб, газар һайн ургаса үгэхэ, жэмэстэ модод һайнаар жэмэсээ үгэхэ.

⁵ Таряа ехээр хуряахат, үзэм жэмэс ехээр суглуулхат, өөрынгөө газар дээрэ ажана тэнюун, садхалан ажаһуухат.

⁶ Амгалан тайбан, хэншье таниие хүлгүүлхэгүй, һанаан сэдьхэл тэгшэ ажаһуухат. Аймшагтай зэрлиг амитадые газар дээрэһээтнай намнахаб. Һэлмэтэ дайсан газар дээгүүртнай ябахагүй.

⁷ Дайсадаа намнахат, тэдэ һэлмээр сабшуулжа, урдатнай унаха.

⁸ Таанадай табан хүн зуун дайсаниие зугадуулха, зуун хүн түмэн зониие намнаха, дайсадтнай һэлмээр сабшуулаад, урдатнай унаха.

⁹ Таанадые анхаржа байхаб. Тиихэдэм, үнэр баян ажаһуухат, олошорхот, таанадтай Хэлсээгээ сахин дүүргэхэб.

¹⁰ Үнгэрһэн жэлэйнгээ юумэ эдихэт, шэнэ юумэтэй болоходоо, хуушан юумэеэ хаяхат.

¹¹ Таанадай дунда байраа табихаб. Минии сэдьхэл таанадаа голохогүй.

¹² Таанадай дунда ябахаб, танай Бурхантнай болохоб, таанад Минии арад зон болохот.

¹³ Би Эзэнтнайб, таанадые богоол болоод, Египедэй газарта зобохогүйн түлөө хөөмэгшыетнай бута сохёоб, толгойетнай дээрэ үргүүлэн, таанадые дахуулжа, тэндэһээ гаргаа бэлэйб.

Бурханай хэһээлтэнүүд

¹⁴ Хэрбээ Минии бүхы тогтоол захяануудыемни дүүргээгүй һаатнай, Минии үгэ дуулахаа болёо һаатнай,

¹⁵ хэрбээ Минии тогтоол хуулинуудые үзэн ядаа һаатнай, хэрбээ зүрхэ сэдьхэлтнай Минии гаргаһан хуулида дураа гутаа һаань, Минии захяа заабари дүүргэхэеэ болёо һаатнай, Намтай хэлсээгээ эбдээ һаатнай,

¹⁶ Би таанадта иигэжэ орохоб: таанадта аймшагтай юумэ, хаталга, халуун үбшэ эльгээхэб, тэдэнһээ боложо, нюдэнтнай шэргэхэ, зүрхэнтнай үбдэхэ. Үрэһэ дэмы тарихат, тэдэниие дайсантнай эдихэ.

¹⁷ Таанад руу эрьен, уур хилэн болохоб, дайсанайнгаа урда унахат. Дайсадтнай таанадые эзэрхэхэ. Таанад хүнэй намнаашьегүй һаа, һэегүй тэрьелхэт.

¹⁸ Хэрбээ иимэ юумэнэй болоходошье, Минии үгэ дуулаагүй һаатнай, нүгэл хэһэнэйтнай түлөө долоо дахин ехээр хэһээхэб.

¹⁹ Танай үсэд бардам зангыетнай хухалхаб, тэнгэрииетнай түмэр шэнги болгохоб, газарыетнай зэд шэнги болгохоб.

²⁰ Дэмы хии талаар хүсэнтнай буураха, газартнай ургаса үгэхэгүй, мододтнай үрэ жэмэс үгэхэгүй.

²¹ Хэрбээ эдээнэйшье һүүлээр Намда эсэргүүсээ һаатнай, Минии үгэ дуулаха дурагүй һаатнай, нүгэлэйтнай түлөө сохилто долоо дахин нэмэхэб.

²² Таанадта хүдөө хээрын зэрлиг амитадые эльгээхэб. Тэдэ таанадые үри хүүгэдгүй болгохо, адуу малыетнай хюдаха, өөһэдыетнай үсөөрүүлхэ, тиигээд харгынуудтнай хооһорхо.

²³ Хэрбээ энээнэйшье һүүлээр заһараагүй һаатнай, Намда эсэргүүсээ һаатнай,

²⁴ Би сухал дундаа танай урдаһаа эсэргүүсэн орохоб. Танай хэһэн нүгэл шэбэлэй түлөө долоо дахин ехээр сохихоб.

²⁵ Хэлсээ эбдэһэнэй түлөө таанадта үһөөгэй һэлмэ эльгээхэб. Өөһэдынгөө хото соо хоргодоо һаатнай, яра шарха эльгээхэб, дайсадай гарта үгэхэб.

²⁶ Хилээмэгүй болгохоб. Нэгэ пеэшэн соо арбан һамгад танда хилээмэ бариха, хилээмэ таанадта шэгнээд үгэхэ, таанад тэрэ хилээмэ эдеэд, садахагүйт.

²⁷ Хэрбээ иимэ юумэнэйшье һүүлээр Минии үгэ дуулаагүй һаатнай, Намда эсэргүүсэн ороо һаатнай,

²⁸ Би сухал дундаа танда эсэргүүсэн орохоб, нүгэлэйтнай түлөө таанадые долоо дахин хэһээхэб.

²⁹ Таанад хүбүүдэйнгөө, басагадайнгаа бэе эдихэ болохот.

³⁰ Тахилай үндэр газарнуудыетнай һандаргаахаб, нангин баханануудыетнай эбдэхэб. Танай үхэһэн бэенүүдые бутархай һүлдэ хүрэг дээгүүртнай тараахаб. Үнэнхэ зүрхэнһөө Би таанадһаа жэрхэхэб.

³¹ Хото балгасыетнай хооһоруулхаб, мүргэлэйтнай орон хооһон болгохоб. Үргэһэн үргэлэйтнай хоншуу һайхан үнэрыень абахагүйб.

³² Танай газар хооһолхоб. Танай байһан газарта зөөжэ ерэһэн дайсадайтнай сошотор хооһолхоб.

³³ Таанадые буса арад зоной дунда тараахаб, хойноһоотнай һэлмэ һугалхаб. Газартнай хооһорхо, хото балгасатнай һандаргагдаха.

³⁴ Тэрэ сагта газартнай амарха. Дайсадай газарта байхадатнай газар хүрьһэнтнай амарха.

³⁵ Хаягдаһан, орхигдоһон сагта газартнай амарха, танай байха үе сагта газартнай иигэжэ амараагүй.

³⁶ Таанадһаа үлэһэн зоной дайсадай газарта байхадань, зүрхэ сэдьхэлдэнь аймхай зан оруулхаб. Набшаһанай һаршаганаан тэдэниие айлган намнаха. Хүнэй намнаагүй байхада, һэлмэһээ тэрьелһэн мэтээр гүйлдэн унаха.

³⁷ Хүнэй намнаагүй байхада, һэлмэһээ тэрьедэһэндэл, тэдэ бэе бэеһээ торожо байжа гүйлдэхэ. Дайсантай тэмсэхэ хүсэншье танда байхагүй.

³⁸ Буса арадуудай дунда хосорхот. Дайсадайтнай газар таанадые залгиха.

³⁹ Таанадһаа үлэгшэд хуули гурим эбдэһэнэйнгээ, элинсэг эсэгын бурууһаа боложо, дайсанай орон нютагта һалаха, үхэхэ.

⁴⁰ Харин өөрын гэмээ, эсэгынгээ гэм зэмые, Минии үмэнэ гэмтэ ябадал хэһэнээ, Намда эсэргүүсэһэнээ тэдэ мэдэрээ һаань,

⁴¹ юунэй түлөө Би сухал дундаа тэдэндэ эсэргүүсээбиб, тэдэниие дайсанайнь газар руу эльгээгээбиб, эмниг зүрхэниинь номгоржо, гэмээ сагааруулаа һаань,

⁴² Би Яковтай, Исаагтай, Абраһаамтай баталһан хэлсээгээ һанахаб, энэ газараа һанахаб даа.

⁴³ Орхигдоһон газарынь хооһорхо. Минии гаргаһан хуули тогтоолдо дураа гутажа, үзэн ядаһандаа, хуулигүй болоһондоо тэдэ дайсадай газарта зобохо, тулиха.

⁴⁴ Харин дайсадай газарта байхадань, Би тэдэнһээ арсахагүйб, тэдэниие орхихогүйб, хюдахагүйб, Хэлсээгээ эбдэхэгүйб. Юуб гэхэдэ, Би тэдэнэй Эзэн Бурханиинь гээшэб.

⁴⁵ Би тэдэнэй элинсэг хулинсагтай хэһэн Хэлсээгээ һанан байхаб. Тэдэнэй Бурхан болохын тула буса арадуудай хараһаар байтар Би тэдэниие Египедэй газарһаа гаргаа бэлэйб. Би Эзэн гээшэб.

⁴⁶ Иимэ хуули ёһо, тогтоол шиидхэбэри, һургаал заабари Эзэн Моисейгээр дамжуулан, Синай хада дээрэ Израилиин арад түмэндэ үгөө бэлэй.