Левит 25 - Библи

Долоодохи жэл

¹ Синай хадын оройдо Эзэн Моисейдэ үгүүлбэ:

² – Израильшуудта соносхон хэлэ: Минии үгэһэн газар дээрэ ерэхэдэтнай, газарай хүрьһэн Эзэнэй субботодо амарха ёһотой.

³ Зургаан жэл соо таряа таригты, зургаан жэл соо үзэм жэмэсэй мүшэр хайшалагты, ургаһан юумыень суглуулагты.

⁴ Долоодохи жэлдэ газарай хүрьһэн амарха ёһотой, амаралта субботын жэл болохо, энэ Эзэнэй суббото гээшэ. Таряаландаа таряа бү таригты, үзэм жэмэсэй модо бү хайшалагты.

⁵ Өөрөө юун ургааб, таряалангай газар дээрэ, тэрэнээ бү хуряа, ургаһан үзэм жэмэс бү суглуула, газарай амарха жэл болог.

⁶ Субботын жэлдэ амархадаа, газар таанадта – шамда, шинии богоолдо, шэбэгшэдэ, шинии байлгаһан ерүүл уладта, шинии хүлһэлжэ абаһан ажалшанда – эдеэ хоол үгэхэ.

⁷ Шинии малда, шинии орон нютагай зэрлиг амитадта газарайтнай ургаса эдеэн болохо.

Табидахи жэл тухай

⁸ Өөртөө субботын долоон жэл тооло, эдэ долоон жэлшни дүшэн юһэн жэл болог.

⁹ Арюудхалгын үдэр, долоодохи һарын арбадахи үдэр улад зониие дуудажа, бүреэ бэшхүүрнүүдээр дуу гаргагты.

¹⁰ Табидахи жэлээ арюудхагты, нютаг дээрэтнай ажаһууһан уладта эрхэ сүлөө соносхогты. Энэ хадаа ойнтнай баяр болохо. Хүн бүхэн өөрынгөө эзэмдэжэ байһан газартаа бусагты, өөрынгөө уг угсаатандаа бусагты.

¹¹ Табидахи жэл танай ойн баярай жэл болоно. Энэ жэл таряа бү таригты, бү хадагты, газарта ургаһан ургаса бү таһалагты, үрэ жэмэс бү суглуулагты.

¹² Энэ жэл танай ойн баяр, танай нангин жэл гээшэ. Газарһаа өөрөө ургаһан юумэ эдигты.

¹³ Ойн баярайнгаа жэлдэ эзэлжэ байһан газартаа бусагты.

¹⁴ Хэрбээ дүтынгөө хүндэ юумэ худалдаа һаа, үгышье һаа, дүтынгөө хүнһөө юумэ худалдажа абаа һаа, бэе бэеэ бү мэхэлэгты.

¹⁵ Дүтын хүнһөө таряалан зөөри худалдажа абахадаа, ойн баярай һүүлээр үлэһэн жэлнүүдые тоолооройгты. Таряалан шамда худалдажа байгааша тэрэ хүн ойн баяр хүрэтэр энэ газарһаа хэды жэл ургаса хуряажа абамаар бэ гэжэ тоолог.

¹⁶ Хэрбээ олон жэлнүүд үлөө һаань, сэнгээ дээшэнь үргөөрэйгты, хэрбээ үсөөн жэлнүүд үлөө һаань, сэнгээ доошонь буулгаарайгты. Хуряалгын жэлнүүдэй тоо тэрэ шамда худалдана бшуу.

¹⁷ Бэе бэеэ бү мэхэлэгты. Өөрынгөө Бурханһаа айгты, юуб гэхэдэ Би Эзэн, танай Бурхан, гээшэб.

Долоодохи жэл юу эдихэб?

¹⁸ Минии хуулинуудые дүүргэгты. Минии тогтоолнуудые наринаар сахигты, тиигээ һаа, газар дээрээ амгалан тайбан ажаһуухат.

¹⁹ Газартнай өөрынгөө үрэ жэмэс үгэхэ, садхалан, амгалан тайбан ажаһуухат.

²⁰ Хэрбээ: «Долоодохи жэлээ юугээ эдихэбибди: таряа хуряахагүй байнабди, үрэ жэмэс суглуулхагүй байнабди?» – гэжэ асуугаа һаатнай,

²¹ зургаадахи жэлдэтнай би үршөөл эльгээхэб. Газартнай гурбан жэлдэ эдихэ таряа, жэмэс үгэхэ.

²² Наймадахи жэлдэ таряа тарихат, зүгөөр юһэдэхи жэл болотор хуушан хуряаһан талха таряагаа, үрэ жэмэсээ эдихэт. Шэнэ тариһан таряан, жэмэсэйнгээ болотор хуушан таряа талха, жэмэсээ эдихэт.

Үмсын зөөри тушаа

²³ Газарые бусаалтагүй худалдажа болохогүй. Энэ Минии газар: таанад ерүүл улад гээшэт. Намда ажаһуунат.

²⁴ Өөрын угай газар худалдажа абан бусаха эрхэ өөрын бүхы газар нютагай дэбисхэр дээр олгуулха ёһотойт.

²⁵ Хэрбээ ахашни, дүүшни үгырһэн дээрэһээ газараа худалдаха болоо һаань, дүтынь түрэл хүнэй тэрэ газарыень худалдажа абахадань болохо.

²⁶ Газарыень худалдажа абаха хүнэй үгы, гэбэшье тэрэ өөрөө баяжаад, өөрөө аргаараа худалдажа абаха гэбэл,

²⁷ газараа худалдаһаар хэды жэл болооб, тэрэнээ тоолон гаргаад, үлэгшэ жэлнүүдэй түлөө түлбэри түлөөд, тиигээд газараа һөөргэнь абаад, эдлэхэдэнь болохо.

²⁸ Хэрбээ түлбэри түлэжэ шадахагүй һаа, худалдажа абаһан хүнэй гарта тэрэ зөөринь ойн баярай жэл хүрэтэр байха. Ойн баярай жэлдэ газарынь бусаагдажа, анханайнгаа эзэнэй болохо.

²⁹ Хэн нэгэн хотодо хүнэй байдаг, ханаар хүреэлэгдэһэн гэр худалдаа һаань, жэл үнгэрхэһөө урид һөөргэнь худалдажа абахада болохо.

³⁰ Хэрбээ жэлэй үнгэртэр гэр худалдагдаагүй һаа, тэрэ ханаар хүреэлэгдэһэн гэр худалдажа абаһан хүнэй гэр хододоо болохо, үри һадаһандань үлэхэ. Ойн баярай жэлдэ хуушан эзэндэнь үгтэхэгүй.

³¹ Хүдөө һууринда байһан ханаар хүреэлэгдээгүй гэр хүдөө газартай адляар сэгнэгдэхэ. Хэдыдэшье энэ гэр худалдажа абахада болохо. Ойн баярай жэлдэ худалдаһан эзэндэнь үгтэхэ.

³² Левидүүдэй балгасые, хотын гэрнүүдые левидүүдэй хододоо худалдажа абахадань болохо.

³³ Хэрбээ левидүүдэй хотодо худалдаха гэр абаагүй һаань, тэрэ гэр ойн баярай жэлдэ һөөргөө левидүүдтэ үгтэхэ ёһотой. Юундэб гэхэдэ, израильшуудай дунда левидүүдэй балгасын гэрнүүд левидүүдэй үмсын гэрнүүд болоно.

³⁴ Балгасые тойроһон газар худалдажа болохогүй, тэрэ хадаа левидүүдэй хэтэ мүнхэдөө эдлэхэ газарынь гээшэ.

Богоолнууд тухай

³⁵ Хэрбээ аха дүүнэршни үгырөөд, шамда ерээ һаань, туһа хүргэ, ондоо тээһээ ерэһэншье байг, хүдөө ажаһуудагшье байг, шамтай сугтаа байг.

³⁶ Тэрэнэй ургаһан юумэнһээ, ашаг олзобориһоонь бү аба, өөрынгөө Бурханһаа ай. Аха дүүнэршни шамтай хамта ажаһууг.

³⁷ Мүнгэеэ түрэсэтэйгөөр бү үгэ. Ашаг олзо олохо зорилготойгоор эдеэ бү үгэ.

³⁸ Би Эзэн Бурхантнай гээшэб. Би таанадые Египедэй газарһаа гаргааб, Ханаһаанай газар танда үгөөб, танай Бурхан болооб.

³⁹ Хэрбээ танай яһатанай али нэгэ хүн үгырөөд, шамда худалдагдаа һаань, богоол шэнгеэр тэрэнээ бү зара.

⁴⁰ Тэрэ шинии хүлһэншэн гү, али нүүжэ ерэһэн хүн шэнги байг. Ойн баярай жэл хүрэтэр шамда ажал хэг.

⁴¹ Тиигээд тэрэ шамһаа зайлуужаг. Үри хүүгэдтэеэ өөрынгөө уг гарбалдаа бусуужаг, эсэгынгээ эдлэжэ байһан газарые эдлэг.

⁴² Юундэб гэхэдэ, тэдэ – Минии богоолнууд, тэдэниие Би Египедэй газарһаа гаргаа бэлэйб. Тэдэ юрын богоолнууд мэтэ худалдагдаха ёһогүй.

⁴³ Хэрзэгы хатуугаар эзэрхэн тэдээндэ бү ханда, өөрынгөө Бурханһаа ай.

⁴⁴ Эрэ, эхэнэр богоолнуудтай байхаа һанаа һаа, тойроод байһан буса арадһаа худалдажа абагты.

⁴⁵ Нүүжэ ерэһэн уладай үхибүүдые богоол болгожо, худалдан абахадатнай болохо. Тэдэнэй уг изагууртай үхибүүдые худалдажа абахадатнай болохо, юундэб гэхэдэ, танай дэбисхэр дээрэ түрөө ха юм, тиихэдээ тэдэ танай үмсын болохо ёһотой.

⁴⁶ Тэдэниие уг залгамжалан дамжуулагдаха болгогты, үхибүүдтээ дамжуулан үгэхэдэтнай болохо. Үеын үедэ тэдэниие богоол болгогты. Харин израильшуудта, аха дүүнэртээ эзэрхэг хатуугаар бү хандагты.

⁴⁷ Хэрбэеэ ерүүл хүн, тэрэнэй уг гарбалай хүн баяжаад, үгырһэн аха дүүешни худалдажа абаа һаань,

⁴⁸ тэрэниие һөөргэнь худалдан абажа болохо. Аха дүүнэрэйнь нэгэн заабол тэрэнииень бусаажа, худалдан абаха ёһотой.

⁴⁹ Хэн нэгэн өөһэдын түрэл сооһоо ондоо ерэһэн уладта худалдагдаһан хүнөө бусаан худалдан абаха ёһотой. Өөрөө баяжабал, тэрэ өөрынгөө түлөө мүнгэ үгэжэ сүлөө болохо.

⁵⁰ Тэрэ заабол худалдажа абаһан хүнтэеэ тоосохо ёһотой: өөрыгөө худалдаһан жэлһээ эхилээд, ойн баярай жэл хүрэтэр хэды жэл болооб, абаһан мүнгэеэ жэлэй тоогоор үгэхэ ёһотой. Тэрэ хүндөө саг зуура хүлһэншөөр ажаллаа гэжэ тоологдохо ёһотой.

⁵¹ Хэрбээ үшөө олон жэл үлөө һаань, хэмжээ соонь, өөрынгөө түлөө абаһан мүнгэ үгэхэ ёһотой.

⁵² Хэрбээ ойн баярай жэл хүрэтэр үсөөн жэл үлөө һаань, хэды жэл болооб гэжэ тоолон гаргаад, жэлэй тоогоор өөрынгөө түлөө худалдаанай сэн үгэхэ ёһотой.

⁵³ Бэеэ худалдаһан хүн хадаа худалдажа абаһан хүндөө саг зуурын хүлһэншэн мэтэ бүхы жэлнүүд соо хүдэлхэ. Тэрэ хүн хүлһэншэ болоһон хүндэ хатуу хэрзэгыгээр эзэрхэн хандаха ёһогүй.

⁵⁴ Хэрбээ бэеэ худалдаһан хүниие мүнгэ түлэжэ абаагүй һаань, ойн баярай жэлдэ тэрэ үхибүүдтэеэ хамта сүлөө болохо.

⁵⁵ Юундэб гэхэдэ, израильшууд Минии богоолнууд, Египедэй газарһаа гаргаһан Минии богоолнууд гээшэ. Би Эзэн, танай Бурхан гээшэб.