Левит 24 - Библи

Майхан һүмэ соохи хэрэгсэлнүүд

¹ Тиигээд Эзэн Моисейдэ иигэжэ айладаба:

² – Израильшуудта иигэжэ захира: Зула ходо бадараажа байхын тула тэдэ шамда гараараа худхаһан модоной сэбэр тоһо асараг.

³ Аһароон майхан һүмэ соо хэлсээнэй ханзын байрладаг хүшэгын наана Эзэнэй үмэнэ үдэшэһөө үглөө болотор саг үргэлжэ зулануудай бадаржа байхыень хинаха ёһотой. Энэ танай үеһөө үедэ дамжаха мүнхэ тогтоол гээшэ.

⁴ Тэдэ Эзэнэй үмэнэ шэжэр алтан дэн дээрэ хододоо зула бадарааха ёһотой.

Үргэлэй хилээмэн

⁵ Шэниисын талхаар арбан хоёр хүбриг хилээмэ баригты. Хүбриг бүхэн соо эфаагай арбанай хоёр хубитай гурил байха ёһотой.

⁶ Эзэнэй үмэнэ шэжэр алтан шэрээ дээрэ тэдэниие зургаа зургаагаар багсалан, хоёр багса болгон табигты.

⁷ Багса бүхэнэй хажууда сэбэр гүгэл табигты. Энэнь Эзэндэ үргэл, үргэгдэһэн хилээмэнэй үргэлэй тэмдэг хуби болохо.

⁸ Суббото бүхэндэ израильшуудай зүгһөө Эзэнэй урда иимэ багса хилээмэ табиха хэрэгтэй. Энэ бол мүнхэ хэлсээнэй хуби гээшэ.

⁹ Эдэ хилээмэн Аһарооной ба уг удамайнь болохо. Эдихэдээ, нангин газарта эдихэ хэрэгтэй, юуб гэхэдэ, энэ хадаа Эзэнэй үргэлнүүдэй аргагүй ехэ нангинай нангиниинь гээшэ. Энэ хадаа мүнхэ тогтоол мүн.

Гэмтээхэ тухай

¹⁰ Нэгэтэ израиль һамганай египет хүнһөө гаргаһан хүбүүн отог соогоо израиль хүнтэй наншалдаба.

¹¹ Наншалдахадаа, Бурханай нэрэ муушалаа, хараагаа. Тиихэдэнь тэрээниие Моисейдэ асарба. Эхэнь Шэломиит, Даан обогой Дибриигэй басаган бэлэй.

¹² Эзэнэй зарлиг гаргатарынь, тэрээниие хааба ха.

¹³ Тиигээд Эзэн Моисейдэ айладаба:

¹⁴ – Тэрэ хараал хэһэн хүниие отог буусаһаа гаргаад, бултадаа гараа толгой дээрэнь табигты, тиигээд шулуудагты.

¹⁵ Израильшуудта хэлээрэй: «Өөрынгөө Бурханиие харааһан хүн нүгэл абаха.

¹⁶ Эзэнэй нэрэ муушалһан хүн үхэхэ ёһотой: бүхы зон тэрээниие шулуугаар үхэтэрнь шэдэхэ. Үндэр нэрэ муушалһан хүн, ерүүл хүншье байг, нютагайшье хүн байг, хосорхо ёһотой.

¹⁷ Хэн хүниие аланаб, тэрэ усадхагдаха ёһотой.

¹⁸ Хэн үхэр мал аланаб, сэнгээрнь түлэхэ ёһотой, мал малай түлөө.

¹⁹ Хүнэй бэе гэмтээһэн хүниие баһа тэрэ зэргээр гэмтээхэ хэрэгтэй.

²⁰ Гэмтэлгын харюуда гэмтэлгээр, нюдэнэй түлөө нюдөөр, шүдэнэй түлөө шүдөөр түлэгдэхэ. Яагаад хүнэй бэе гэмтээгээб, тиигээд өөртэнь хүртэхэ ёһотой.

²¹ Хэн үхэр мал алааб, тэрэнэй түлөө түлэхэ ёһотой. Харин хүниие алаһан хүн үхэлдэ хүртэхэ ёһотой.

²² Ерүүл зондошье, нютагай зондошье адли, танда нэгэл зарга шүүбэри байха ёһотой. Юуб гэхэдэ, Би Эзэн Бурхантнайб».

²³ Тиигэжэ Моисей израильшуудта хэлээд, тэрэ хэрүүл хараал хэһэн хүниие зон отог буусаһаа гаргаад, шулуудажа алаба. Иигэжэ израильшууд Эзэнэй Моисейдэ үгүүлһэн захиралтаар үйлэдэбэ ха.