Левит 23 - Библи

Субботын һайндэр

¹ Эзэн Моисейдэ үгүүлбэ:

² – Израильшуудта Эзэнэй һайндэрнүүд тухай, нангин суглаагаа тэрэ үдэрнүүдтэ татаха тухай тунхагла. Энэ минии һайндэрнүүд гээшэ:

³ Зургаан үдэртэ ажалаа хээд, долоодохи үдэртөө – субботодо амарха ёһотой, нангин суглаа хэхэ хэрэгтэй. Хаанашье ажаһуугаа хадаа таанад ямаршье юумэ хэхэгүйт, энэ суббото хадаа Эзэнэй.

Паасхын һайндэр

⁴ Энэ Эзэнэй һайндэрнүүд гээшэ, нангин суглаануудые саг соонь үнгэргэхэ ёһотойт.

⁵ Түрүүшэ һарын арбан дүрбэдэхи үдэр, үдэшэлэн Эзэнэй Паасха.

⁶ Энэ һарын арбан табанай үдэр эһээгдээгүй хилээмэнэй һайндэр. Долоон үдэр соо эһээбэригүй талхаар болгоһон хилээмэ эдигты.

⁷ Түрүүшын үдэр нангин суглаагаа үнгэргэгты, ямаршье ажал бү хэгты.

⁸ Долоон үдэрэй турша соо Эзэндэ үргэл үргэгты. Харин долоодохи үдэртөө нангин суглаагаа үнгэргэжэ, ямаршье ажал бү хэгты.

Түрүүшын ургасын һайндэр

⁹ Эзэн Бурхан Моисейдэ үгүүлбэ:

¹⁰ – Израильшуудта соносхо: Минии үгэһэн газарта ерээд, таряа тарихадаа, өөрынгөө түрүүшын ургасын нэгэдэхи боолто таряае санаартада асаржа үгэхэт.

¹¹ Тэрэ боолто таряаетнай танай амгалан байдалай түлөө Эзэнэй үмэнэ үргэхэ. Һайндэрэй үглөөдэрынь тэрэ боолтотой таряае санаарта үргэхэ ёһотой.

¹² Боолтотой таряа үргэхэ тэрэл үдэртөө Эзэндэ түгэс шатаалта үргэл болгон ямаршье эрэмдэггүй жэлтэй хурьга үргэхэ ёһотойт.

¹³ Арбанай хоёр хуби шэниисын гурил оливын тоһондо зууража бариһан хилээмэн үргэл Эзэндэ үргэхэ хэрэгтэй. Тэрэнэй һайхан үнэр Эзэндэ таатай. Мүн дүрбэнэй нэгэ хуби гиинэ үзэмэй дараһан архи үргэхэ хэрэгтэй.

¹⁴ Бурхандаа үргэл үргэхэһөө урид хилээмэ, хатааһан таряа, шэнэ таряа бү эдигты. Энэ хадаа үеын үедэ бүхы гэр бүлэдэтнай сахиха мүнхэ тогтоол хуули гээшэ.

Долоон долооной һайндэр

¹⁵ Һайндэрэй һүүлээр, нэгэдэхи үдэрһөө эхилээд, боолтотой таряае үргэхэ үдэр хүрэтэр, дүүрэн долоон долоон хоногуудые тоологты.

¹⁶ Долоон долоон хоногуудай һүүлээр, табидахи үдэр шэнэ ургасын хилээмэн үргэл Эзэндэ үргэгты.

¹⁷ Гэрнүүдһээ үргэхэ хоёр бүхэриг хилээмэ асарагты. Бүхэриг бүхэндэ эфаагай арбанай хоёр хубитай шэниисын гурил гаргашалагдаха ёһотой. Эһээһэн талхаар тэдэниие болгохо хэрэгтэй, энэ бол ургасын дээжэһээ Эзэндэ үргэл болоно.

¹⁸ Ямаршье зэмдэггүй долоон түлгэн хурьга, нэгэ буруун буха, хоёр хуса Эзэндэ зорюулжа, хилээмэн үргэлтэй хамта үргэгты. Энэ хадаа Эзэндэ зорюулһан түгэс шатаалта үргэл мүн, хилээмэн үргэлтэй, үзэмэй дараһан архи үргэлтэй хамта. Эзэндэ аятай һайхан хэншүү үнэртэй үргэл байха.

¹⁹ Һүрэг ямаадһаа нэгэ тэхэ нүгэл сагааруулгын үргэлдэ үргэгты, хоёр хурьгадые амгалан байдалай түлөө үргэгты.

²⁰ Санаарта эдэ хоёр хурьга түрүүшын ургасын таряагаар бариһан хилээмэнтэй хамта Эзэнэй урда үргэг. Тэдэ болбол Эзэнэй нангин зүйл, санаартын болохо юм.

²¹ Энэ үдэр нангин үргэл, мүргэл хэгты, ямаршье ажал бү хэгты. Энэ хадаа таанадта бүхы үеын үедэ сахиха мүнхэ тогтоол хуули гээшэ.

²² Таряагаа хадахадаа, таряалангай захада бү хүрэгты, үлэһэн хоолос бү абагты, үлөөгты. Үгытэй, ерүүл улад тэдэниие суглуулжа абаг. Би Эзэн, танай Бурхан гээшэб.

Бүреэнүүдэй һайндэр

²³ Эзэн Моисейдэ үгүүлбэ:

²⁴ – Израильшуудта хэлэ: Долоодохи һарын түрүүшын үдэр таанадта амгалан тэнюун оршоной, нангин үдэр болохо. Бүреэнүүдэй абяан тэрээн тухай тунхаглан зэдэлэг.

²⁵ Ямаршье ажал бү хэгты. Эзэндэ үргэл үргэгты.

Арюудхалгын һайндэр

²⁶ Тиигээд Эзэн Моисейдэ үгүүлбэ:

²⁷ – Баһа долоодохи һарын арбадахи үдэр арюудхалгын үдэр гээшэ, үргэл мүргэл болохо, масаг баригты, Намда, Эзэндэ, үргэл үргэгты.

²⁸ Энэ үдэр ямаршье ажал бү хэгты, энэ үдэртнай арюудхалгын үдэр болоно. Минии, Эзэн Бурханайтнай, үмэнэ таанадые арюудхахын тула.

²⁹ Энэ үдэр хүн бүхэн масаг бариха зэргэтэй, үгы һаа, арад зонһоо тусгаарлагдан һүнөөгдэхэ.

³⁰ Хэрбээ хэн нэгэнэй энэ үдэр ажал хээ һаань, тэрэниие үгы хэхэб. Тэрэ уг зонһоо үгы хэгдэхэ.

³¹ Ямаршье ажал бү хэгты – энэ мүнхэ тогтоол хуули үеын үедэ гэр бүлэдэтнай сахигдаха ёһотой.

³² Субботодо масаг баригты. Энэ һарын юһэдэхи үдэрэй үдэшэһөө эхилээд, нүгөө үдэшэ болотор амарагты.

Майхангуудай һайндэр

³³ Эзэн Моисейдэ үгүүлбэ:

³⁴ – Израильшуудта хэлэ: Долоодохи һарын арбан табанай үдэртэ бургааһаар хэһэн майхангуудай һайндэр гээшэ, долоон үдэрэй Эзэнэй һайндэр.

³⁵ Түрүүшын үдэр – нангин, ямаршье ажал хэхэгүйт.

³⁶ Долоон хоног соо Эзэндэ үргэл үргэхэт. Наймадахи үдэр – нангин. Эзэндэ үргэл үргэгты. Энэ һайндэрэй һүүлшын үдэр, ямаршье ажал бү хэгты.

³⁷ Эдэ Эзэнэй томилһон нангин һайндэрнүүд гээшэ. Эзэндэ түгэс шатаалта үргэл, талхан үргэл, малай үргэл, сэржэм үргэлнүүд үргэгдэхэ ёһотой.

³⁸ Эзэнэй субботонуудһаа гадна, үргэһэн бэлэгүүдһээтнай гадна, шахаа тангаригай үргэлһөө гадна, өөрын һанаагаар Эзэндэ үргэһэн үргэлһөө гадна эдэ бүгэдэ мүн.

³⁹ Газарай үршөөһэн ургаса хуряаһанай удаа, долоодохи һарын арбан табанай үдэр Эзэнэй долоон хоногой һайндэрые үнгэргэгты. Түрүүшын үдэрынь амарагты, наймадахи үдэрынь амарагты.

⁴⁰ Түрүүшын үдэр һайхан модоной жэмэс суглуулагты, дал модоной набша, үдхэн набшаһатай модоной мүшэр, голой бургааһанай мүшэр суглуулагты. Тиигээд Эзэнэй, өөрын Бурханайнгаа урда долоон үдэр хүхилдэн сэнгэн байгты.

⁴¹ Иимэ Эзэнэй һайндэрые жэлдээ долоон хоног соо һайндэрлэгты. Танай үеын үедэ сахиха мүнхэ тогтоол хуули энэ мүн. Долоодохи һарада энэ һайндэр тэмдэглэгты.

⁴² Долоон хоног соо бургааһаар, модоной набшаһаар хэһэн отог соо байрлагты. Израилиин ерүүл зон иимэ отог соо баһа байха ёһотой.

⁴³ Танай уг удамууд мэдэхэ ёһотой: Би израильшуудые Египедэй газарһаа гаргахадаа, бургааһаар, үбһөөр хэһэн майхан соо байрлуулаа бэлэйб. Би Эзэн Бурхантнай гээшэб.

⁴⁴ Тиигээд Моисей израильшуудта Эзэнэй һайндэрнүүд тухай зар тунхаг тарааба.