Левит 22 - Библи

Үргэл үргэхэ тухай

¹ Эзэн Моисейдэ үгүүлбэ:

² – Аһароондо, тэрэнэй хүбүүдтэ хэлэ: Израильшуудай мүргэлэй нангин зүйлнүүдтэ арюун нангинаар хандагты, Минии нангин нэрые бү гутаагты, Намда зорюулха юумые наринаар сахигты. Би Эзэн гээшэб.

³ Тэдээндэ хэлэ: хэрбээ хэн нэгэн танай угһаа бузартай байгаад, израильшуудай Эзэндэ зорюулһан нангин зүйлнүүдтэ дүтэлөө һаань, Минии үмэнэһөө ами наһаниинь хосорхо. Би Эзэн гээшэб.

⁴ Хэн Аһарооной үри һадаһанһаа һэлхэ үбшэнтэйб, али бэеһээнь эдеэрэ гаража ябадаг бэ, тэрэ арюун нангин мүргэлэй эдеэ бэеынгээ арюун болотор эдихэ ёһогүй. Хэн нэгэнэй үхэһэн бузартай юумэндэ хүрөө һаань гү, али үрэһэнэйнь ехээр гараа һаань гү;

⁵ али ямар нэгэ могой хорхойдо хүрэжэ, бузартаа һаань гү, үгы һаа, нэгэ хүндэ хүрөөд, бузартаа һаань,

⁶ тэрэ муухай юумэндэ хүрэһэн хүн гээшэ, тиигээд үдэшэ болотор бузартай байха, бэеэ уһаар угаангүйгөөр арюун эдеэ эдихэ ёһогүй.

⁷ Наранай ороһон хойно, бэеэ арюун болгоод, арюун нангин эдеэ эдихэдэнь болохо, юуб гэхэдэ энэ өөрынь эдеэн ха юм.

⁸ Һэе, арьяатанай зобооһон малай мяха эдихэгүй, эдеэ һаа, бузартаха. Би Эзэн гээшэб.

⁹ Нүгэл абаад, тэрээнһээ боложо үхэхэгүйн тула Минии захиргаа тэдэ дүүргэг, сахижа ябаг. Тэдэниие арюудхагша Би Эзэн гээшэб.

¹⁰ Буса ондоо хүн арюун нангин эдеэ эдижэ болохогүй. Санаартын гэртэ байдаг һуулгамаршан хүн тэрэ нангин арюун эдеэ эдихэ ёһогүй.

¹¹ Хэрбээ санаарта хүниие мүнгөөр худалдажа абаа һаа, тэрэ хүниинь нангин эдеэ эдижэ болохо. Гэртэхинэйнь хилээмыень эдихэдэ болохо.

¹² Санаартын басаган санаарта бэшэ ондоо обогой хүндэ хадамда гараа һаа, үргэлэй арюун нангин эдеэ эдихэ баһа эрхэгүй.

¹³ Хэрбээ санаартын басаган бэлбэһэн болоод, али нүхэрһөө һалаад, үхибүүгүй байгаа һаань, эсэгэдээ бусажа ерээ һаань, залуу байхадаа, яажа байгаа һэн бэ, тэрээгээрээл ажаһууха, эсэгынгээ хилээмэнһээ эдилсэхэдэнь болохо, буса ондоо хүнһөө хэншье хилээмыень эдихэ ёһогүй.

¹⁴ Хэн нэгэн эндүүржэ арюун нангин эдеэнһээ хүртөө һаа, тэрэ хүн арюун нангин эдеэ санаартада үгэхэ ёһотой, дээрэнь табанай нэгэ хуби үгэлсэхэ ёһотой.

¹⁵ Израильшуудай Эзэндэ үргэһэн нангин үргэлые муушалха ёһогүй.

¹⁶ Нангин эдеэ бү эдиг, өөртөө муу юумэ татажа, зүгнэжэ болохогүй, юуб гэхэдэ, тэдэниие арюудхагша Эзэн гээшэб.

Үргэлэй мал тухай

¹⁷ Эзэн Моисейдэ үгүүлбэ:

¹⁸ – Аһароондо, тэрэнэй хүбүүдтэ, израильшуудта тунхагла: Хэрбээ израильшуудай дундаһаа гү, али ерүүл зоной дундаһаа шахаа тангаригһаа боложо, үгышье һаа, өөрөө оролдожо, түгэс шатаалта үргэл Эзэндэ үргөө һаань,

¹⁹ Бурханһаа үршөөл абахын түлөө үргэлэй мал зэмдэггүй эрэ бодо малһаа, хони ямаадһаа үргэгдэхэ ёһотой.

²⁰ Эзэндэ тулюур, муу, туранхай, үбшэн мал бү үргэгты. Муу мал үргэхэдэтнай, танда үршөөл хайрлагдахагүй.

²¹ Хэн нэгэн өөрынгөө тангариг хүсэлдүүлжэ, оролдолго гаргажа, томо бодо мал, үгышье һаа, жэжэ мал амгалан байдалай түлөө үргэхэдөө, һайн мал, тобир тарган, зэмдэггүй мал Эзэндээ үргэхэ ёһотой.

²² Һохор, дохолон, гэмтэһэн, бэедээ эдеэрэтэй, һэлхэнтэй мал Бурханда бү үргэгты.

²³ Тугалай, хурьганай заһааниинь ехэ уташье байг, богонишье байг, һайн дуранай үргэл гэжэ үргэхэдэ болохо. Тангаригай үргэлдэ энэ таарахагүй.

²⁴ Малай заһааниинь биса һүрэһэн, бутархай, таһархай, отологдоһон байгаа һаань, Эзэндэ бү үргэгты. Өөрын газар нютагта энээниие бү үйлэдэгты.

²⁵ Хари газарай зонһоо гэмтэһэн мал Бурханда бү үргэгты, юундэб гэхэдэ, тэрэ зэмдэгтэй: танда үршөөл хайрлагдахагүй, туһа болохогүй.

²⁶ Эзэн Моисейдэ үгүүлбэ:

²⁷ – Хэрбээ тугалай, хурьганай, эшэгэнэй гарахада, долоон хоног соо эхыень хүхүүлхэ, наймадахи үдэрһөө хойшо Эзэндэ үргэгдэжэ болохо.

²⁸ Үнеэ, хони, ямаа түлтэйнь хамта нэгэ үдэр гаргажа болохогүй.

²⁹ Хэрбээ Эзэндэ баярай үргэл үргөө һаа, өөһэдтэтнай туһатай байхын тула оролдогты.

³⁰ Тэрэнээ тэрэл үдэртөө эдихэ ёһотойт, үглөөгүүр болотор тэрэнээ үлөөхэгүйт, Би Эзэн гээшэб.

³¹ Минии гаргаһан захяа заабари сахигты, дүүргэгты. Би Эзэн гээшэб.

³² Минии нангин нэрэ бү гутаагты. Израильшуудай дунда арюун нангин байха ёһотойб. Би таанадые арюудхагша Эзэн гээшэб.

³³ Таанадые Египедэй газарһаа гаргаһан, танай Бурхан болохо Эзэн гээшэб.