Левит 21 - Библи

Санаартад тухай

¹ Эзэн Моисейдэ үгүүлбэ: – Санаартада, Аһарооной хүбүүдтэ, тунхагла: Наһа бараһан түрэлэйнгөө хэн нэгэндэ ойро хүрөөд, өөрыгөө бү бузарлагты.

² Өөрынгөө дүтын түрэлэй наһа бараһан хүнэй ойро: эхэ эсэгынгээ, хүбүүнэйнгээ, басаганайнгаа, аха дүүгэйнгээ,

³ эгэшэ, дүү басаганайнгаа, сугтаа ажаһууһан хадамда гараагүй басаганайнгаа ойро хүрэхэдэ болохо, тэдээндэ хүрөө һаа, бэеэ бузарлахагүй.

⁴ Өөрынгөө арад зоной ямаршьеб даа бусад түрэлэйнгөө ойро хүрөөд, бэеэ бү бузарлагты.

⁵ Тэдэ толгойнгоо үһэ бү хюһаг, һахалаа бү хиргаг, бэеэ бү хадхаг.

⁶ Тэдэ өөрынгөө Бурханай үмэнэ нангин арюун сэбэр байха ёһотой, Бурханайнгаа нэрэ гутааха ёһогүй, юундэб гэхэдэ, Эзэндэ үргэл үргэнэ, Бурхандаа хилээмэ үргэнэ, иимын тула арюун нангин байха ёһотой.

⁷ Тэдэ һалихай эхэнэртэй, нэрээ хухарһан эхэнэртэй ушарха ёһогүй, үбгэндөө голуулһан эхэнэрые һамга абаха ёһогүй, юуб гэхэдэ, тэдэ өөрынгөө Бурханай үмэнэ арюун нангин ха юм.

⁸ Тэрэниие арюудха, юуб гэхэдэ, шинии Бурханда хилээмэ үргэнэ: нангин арюун байг лэ, юуб гэхэдэ, Би таниие арюудхадаг арюун нангин Эзэн гээшэб.

⁹ Хэрбээ санаартын басаган эсэгынгээ нэрэ гутаажа, зайгуултажа, һалихайраа һаань, тэрэниие галдажа, үгы хэхэ ёһотой.

¹⁰ Аха дүүнэрэй эгээл ахань, санаартан, толгой дээрээ санаартын тоһо адхуулжа арюудхагдаһан, арюун нангин хубсаһа үмдэхэ эрхэтэй, толгойгоо нюсэгэн байлгахагүй, хубсаһаа хахалха, удара татаха ёһогүй.

¹¹ Ямаршье үхэһэн хүндэ дүтэлхэ ёһогүй, ойронь хүрэхэгүй, наһа бараһан эсэгэ эхынгээшье ойро хүрэжэ, бэеэ бузарлаха ёһогүй.

¹² Нангин мүргэлэй газарһаа холодохо ёһогүй, Бурханайнгаа нангин ордониие бузарлахагүй, юуб гэхэдэ, Бурханай арюудхалгын тоһоор тэрэ арюудхагдаһан. Би Эзэн гээшэб.

¹³ Тэрэ һамга абахадаа, басага абаха ёһотой.

¹⁴ Бэлбэһэн эхэнэрые, үбгэнһөө һалаһан, зайгуул эхэнэрые һамган болгожо абаха ёһогүй, харин өөрынгөө яһатанай, хүнтэй унтаагүй басага һамган болгожо абаха ёһотой.

¹⁵ Муу эхэнэртэй ушараад, өөрынгөө үрэ өөрынгөө арад зон соо муу болгохо ёһогүй, юуб гэхэдэ, Би тэдэниие арюудхагша Эзэн гээшэб.

¹⁶ Эзэн Моисейдэ үгүүлбэ:

¹⁷ – Аһароондо хэлэ: Шинии үри һадаһанай уг унги соо бэеын зэмдэг дутагдалтай хүн Бурханда эдеэнэй үргэл үргэхэ ёһогүй.

¹⁸ Муу бэетэй: һохор, дохолон, һарюу хүн үргэл үргэхэ эрхэгүй.

¹⁹ Гар хүлөө хухарһан хүн;

²⁰ бүхэтэр, хаташаһан гар хүлтэй, тарбаган хүн, нюдэндөө сагаасатай, яра шархатай, гэмтэһэн заһаатай хүн үргэл үргэхэ ёһогүй.

²¹ Аһароон санаартын үри һадаһадһаа бэеын зэмдэг дутагдалтай хүн Эзэндэ үргэл үргэхэ ёһогүй, өөрынгөө Бурханда хилээмэн үргэл үргэхэ эрхэгүй.

²² Өөрынгөө Бурханай хилээмэ, нангин болон хамагай нангин газарһаа хилээмэ эдихэдэнь болохо.

²³ Харин хүшэгэдэ, үргэл үргэдэг газарта тэрэ дүтэлхэ ёһогүй, юундэб гэхэдэ тэрэ дутуу бэетэй, эрэмдэг хүн. Минии арюун нангин оршониие бузарлаха ёһогүй. Би хадаа тэдэниие арюудхажа байдаг Эзэн гээшэб.

²⁴ Моисей Аһароондо, тэрэнэй хүбүүдтэ, бүхы израильшуудта зар тунхаг табиба.