Левит 20 - Библи

Элдэб юумэн тухай

¹ Эзэн Моисейдэ үгүүлбэ:

² – Израильшуудта хэлэ: Израильшуудай дундаһаа, тэдэнэй дунда байдаг ерүүл зоной дундаһаа хэн нэгэн өөрынгөө хүүгэдые Моолохто үгөө һаа, алуулагдаха. Арад зон тэрэниие шулуугаар шэдэжэ алаха.

³ Би уурлан тэдээн руу эрьехэб, нюураараа тэрэ хүниие харахаб, тэрэниие хюдажа алахаб. Тэрэ хүн хадаа Моолохто үхибүүдһээнь үгэжэ, нангин байрыем бузарлаа, нангин нэрыемни гутаагаа.

⁴ Хэрбээ арад зон Моолохто үхибүү үгэһэн хүндэ хандажа, тэрэниие үгы хээгүй һаань,

⁵ би тэрэ хүниие, тэрэнэй түрэл түрсэдые, тэрээнтэй хамта Моолохто мүргэн, һальхай забхай ябадал хэжэ ябаһан улад зониие үгы хэхэб.

⁶ Хэрбээ хэн нэгэнэй үхэһэн хүниие дуудадаг хүндэ, эльбэ шэжэ хэдэг хүндэ хандаа һаань, Би тэрээндэ уурлажа усадхахаб, арад зонойнгоо дундаһаа тэрэ үгы болохо.

⁷ Өөрыгөө арюудхагты, арюун сэбэр байгты, юуб гэхэдэ, Би Эзэнби, Бурхантнайб.

⁸ Минии тогтоол хуулинуудые сахигты, дүүргэгты, юуб гэхэдэ, Би таанадые арюудхадаг Эзэн гээшэб.

⁹ Хэн эхэ эсэгэеэ муудхажа хэлэнэб, тэрэ алуулха. Эхэ эсэгэеэ муудхажа хэлэһэнһээ боложо, тэрэ гэм зэмэтэй болохо.

¹⁰ Хэн хадамтай һамгантай унтанаб, хэн танилайнгаа һамгантай унтанаб, тэдэ урбагшад хоюулан алуулха ёһотой.

¹¹ Хэн эсэгынгээ һамгантай хэбтэбэб, тэрэ хүбүүн һамган хоёр алуулха ёһотой. Тэдэнэй шуһа урасхуулһанай гэм өөһэдэйнь гэм болохо.

¹² Хэн нэгэн өөрынгөө бэритэеэ унтаа һаа, тэдэ зэбүүрхэмэ муухай юумэ үйлэдэһэнһөө боложо, хоюулаа алуулха ёһотой.

¹³ Эрэ хүн эрэ хүнтэй хурисал үйлэдөө һаа, зэбүүрхэмэ муухай юумэ хээ гээшэ. Тэдэ хоюулаа алуулха ёһотой.

¹⁴ Хэн һамганайнгаа эхээр һамга хэнэб, тэдэ хуулида харша юумэ үйлэдөө, тэдэниие галдажа, үгы хэхэ ёһотой.

¹⁵ Эрэ хүн үхэр малтай хурисалдабал, тэрэниие үгы хэхэ хэрэгтэй, үхэр малыень алагты.

¹⁶ Хэрбээ эхэнэр хүнэй үхэр малтай хурисалдаа һаань, тэрэниие малтайнь алаха ёһотой.

¹⁷ Хэн эгэшэ дүүтэеэ хурисал үйлэдөөб, эсэгынгээ басагантай гү, али эхынгээ басагантай хурисалдааб, тэдэ жэгшүүритэй муухай юумэ үйлэдөө, тэдэниие хүн зоной урда алаха ёһотой.

¹⁸ Хэн һамганайнгаа һарын юумэнэй гаража байхада, унтанаб, тэдэниие үгы хэхэ ёһотой.

¹⁹ Хэн нэгэн эхынгээ дүүтэй гү, али эсэгынгээ дүүтэй хурисал үйлэдөө һаа, ехэ нүгэл хэбэ гээшэ.

²⁰ Хэн нэгэн өөрынгөө абгайтай хурисал үйлэдөө һаа, ехэ нүгэл хэбэ гээшэ. Тэдэ үри хүүгэдгүй болоод үхэхэ.

²¹ Хэн нэгэн өөрынгөө ахын гү, али дүүгэйнгөө һамгантай хурисалдаа һаа, ехэ жэгшүүритэй муухай юумэ үйлэдөө гээшэ. Тэдэ үри хүүгэдгүй байха.

²² Минии ёһо гуримуудые, тогтоол хуулинуудые сахигты, дүүргэгты. Тиигэбэл, Минии таанадые хүтэлжэ абаашаха газарни таанадые абажа хаяхагүйл.

²³ Таанадһаа Минии намнаһан зоной ёһо гуримаар бү ябагты. Юундэб гэхэдэ, тэдэ бүхы муухай юумэ үйлэдөө, тиихэдэнь тэдэндэ ехээр дураа гутаһандаа намнаа һэм.

²⁴ «Үрэжэлтэй һайхан энэ газарые таанадай харьяата газар болохо,» – гэжэ найдуулаа һэм. Тиигээд мүнөө тэрэниие үгэнэб. Би танай Эзэн гээшэб, таанадые бусад арадуудһаа илган шэлээ һэм.

²⁵ Сээртэй, сээргүй мал, шубуудые таанад илгаруулдаг байха ёһотойт. Сээртэй ан амитадые, шубуудые бү эдигты. Би тэдэниие сээртэй, сээргүй гээд илгаа бэлэйб.

²⁶ Таанад арюун байжа, гансал Минии арад түмэн байха ёһотойт. Юуб гэбэл, Би Эзэн гээшэб, Би арюун нангин гээшэб, гансал Минии байхынтнай түлөө ондоо арадуудһаа таанадые илган абааб.

²⁷ Үхэһэн хүниие дуудажа, зүбшэжэ байһан, эльбэ жэльбэ хэрэглэһэн эхэнэр, эрэшье хүниие шулуугаар сохижо алаха хэрэгтэй. Өөһэдөө тэдэ зэмэтэй.