Левит 2 - Библи

Талхан үргэл

¹ Хэрбээ али нэгэн Эзэндэ талхан үргэл хэхэ гэбэл, шэниисын гурил асараг, тэрээндээ оливын тоһо адхаад, дээрэнь гүгэл хээд,

² Аһарооной санаарта хүбүүдтэ асараг лэ. Санаартан дүүрэн адха оливын тоһотой, гүгэлтэй гурил абаад, үргэлэй шэрээ дээрэ галдаг. Энэ хадаа үргэлэй тэмдэг хуби гээшэ, Эзэндэ таатай һайхан үргэл, хуншуу үнэр гээшэ.

³ Талхан үргэлэй үлэгдэл хадаа Аһароондо ба тэрээнэй хүбүүдтэ хүртэхэ ёһотой. Энэ хадаа нангин, юуб гэхэдэ, Эзэндэ үргэһэн үргэлнүүдһээ абтаһан мүн.

⁴ Хэрбээ үргэл болгон пеэшэн соо болгоһон хилээмэнһээ асараа һаа, эһээлтэгүй шэниисын гурилаар бариһан оливын тоһотой хилээмэ, оливын тоһоор тоһодоһон, эһээлтэгүй гурилаар бариһан лепёошхо асара.

⁵ Хэрбээ талхан үргэлөө яла соо болгоһон байбал, тэрэнээ оливын тоһондо зуураһан, эһээлтэгүй шэниисын гурилаар бариһан байха ёһотойш.

⁶ Лепёошхо хэсэг хэсэгээр хухалаад, дээрэһээнь оливын тоһо адха: энэ хадаа талхан үргэл гээшэ.

⁷ Хэрбээ талхан үргэлэйшни хайруул дээрэ шарагдаха байбал, тэрэниие оливын тоһотой худхаһан шэниисын гурилаар бариха ёһотой.

⁸ Иигэжэ бэлдэһэн үргэлөө Эзэндэ зорюулжа, санаартанда барюула, тэрэ үргэлыешни үргэлэй шэрээдэ абаашаха.

⁹ Тэрэ үргэлһөөшни санаартан нэгэ хэдыень үргэлэй тэмдэг хуби гэжэ абаад, үргэлэй шэрээ дээрэ шатааха ёһотой: энэ хадаа Эзэндэ таатай һайхан үргэл, хуншуу үнэр гээшэ.

¹⁰ Талхан үргэлэй үлэгдэл хадаа Аһароондо ба тэрэнэй хүбүүдтэ хүртэхэ ёһотой: энэ хадаа Эзэнэй үргэлнүүдһээ абтаһан нангинай нангиниинь гээшэ.

¹¹ Эзэндэ талхан үргэл бүтээхэдээ, эһээлтэтэй талхаар бү баригты, юундэб гэхэдэ эһээлтэтэй гү, али балатай юумэн үргэлэй шатаалганда орохо ёһогүй.

¹² Харин тэдэниие Эзэндэ зорюулһан ургасын дээжэ гээд асаржа болохо, зүгөөр Тэрээндэ таатай һайхан үнэр гэжэ үргэлэй шэрээ дээрэ галдажа болохогүй.

¹³ Бүхы талхан үргэлөө дабһаар дабһала. Бурхантайтнай баталһан хэлсээнэй дабһан заабол үргэл соотнай байха ёһотой. Үргэл бүхэндөө дабһа хээрэй.

¹⁴ Эзэндэ түрүүшын ургасаһаа талхан үргэл үргэхэдөө, түрүүшын ургасын орооһо гал дээрэ хатаагаад, нюдөөд,

¹⁵ дээрэнь оливын тоһо нэмээд, гүгэл хэ: энэ хадаа таряа талханай үргэл гээшэ.

¹⁶ Санаарта тэрэ үргэлэй тэмдэг хубиие – зарим таряаень тоһотойнь, гүгэлтэйнь галда шатааха: энэ хадаа Эзэндэ үргэл болоно гээшэ.