Левит 19 - Библи

Арюун сэбэр байха тухай

¹ Эзэн Моисейдэ үгүүлбэ:

² – Израилиин олониитэдэ тунхагла: Таанад арюун нангин байгты, юуб гэбэл, Би танай Эзэн Бурхантнай арюун нангин байнаб.

³ Таанад өөһэдынгөө эхэ эсэгэһээ түбэгшөөгты. Минии субботонуудые сахигты. Би танай Эзэн Бурхантнай гээшэб.

⁴ Онгондо бү хандагты, шудхамал бурхадые өөһэдтөө бү хэгты. Би танай Бурхан, Эзэн гээшэб.

⁵ Өөртөө аша туһатай байхын түлөө Бурханда амгалан байдалай түлөө үргэл үргэгты.

⁶ Таанад үргэл хэһэн үдэртөө, үглөөдэрынь үргэлһөө ама хүрэхэ ёһотойт, харин гурбадахи үдэртөө үргэлһөө үлэһыень шатаахат.

⁷ Хэн нэгэн гурбадахи үдэртөө үлэһэн үргэлэй юумэнһээ ама хүрөө һаа, энэ бузар муухай гээшэ, һайн байхагүй даа.

⁸ Хэн гурбадахи үдэрэй үргэлһөө эдижэ захалааб, тэрэ хүн нүгэлтэй, Эзэнэй нангин шүтөөн бузарлаба гээшэ, ами наһаяа хосороохонь гээшэ.

⁹ Өөрынгөө газар дээрэ таряа хадахадаа, дууһан бү хуряагты, захадань үлөөгты. Хуряалгын һүүлдэ үлдөөсыень бү суглуулагты.

¹⁰ Юушье үлөөнгүй үзэм жэмэсээ бү суглуулагты, унаһан жэмэсээ бү түүгты. Үгытэйшүүлдэ, ерүүл зондо үлөөгты. Би Эзэнби, танай Бурхантнайб.

¹¹ Хулгай бү хэгты, худалаар бү хэлэгты, бэе бэеэ бү мэхэлэгты.

¹² Намайе урдаа баряад, тангариг бү хэлэгты. Бурханайнгаа нэрэ бү гутаагты. Би Эзэн гээшэб.

¹³ Хажуудахи хүнөө бү гомодхоо, юумэ бү тоно. Зараһан хүнэйнгөө түлбэри үглөөдэр болотор бү удааруула.

¹⁴ Дүлии хүниие бү хараа, һохор хүнэй урда торожо унахынь түлөө юумэ бү таби. Өөрынгөө Бурханһаа һүрдэн ай. Би Эзэн гээшэб.

¹⁵ Зарга шүүбэридэ ороходоо, худалаар бү хэлэгты. Үгытэй хүнэй нюур бү сахигты. Ехэ хүндэ бү һүгэдэгты. Хажуудахи хүнэйнгөө үйлэ хэрэг үнэн сэхээр шүүбэрилэгты.

¹⁶ Улад зоной дунда элдэб юумэ бү тараагты, дүтынгөө хүнэй ами наһанда бү хүрэгты. Би Эзэн гээшэб.

¹⁷ Аха дүүнэртэеэ эбээ бү таһарагты. Дүтынгөө хүнэй үйлэ хэрэгые зүб мүрөөр шиидхэгты, тэрэнэй түлөө нүгэл даажа абахагүйт.

¹⁸ Өөрынгөө яһанай хүндэ бү үһөөрхэгты, бү сухалдагты. Дүтынгөө хүндэ өөртөөл адли дуратай байгты. Би Эзэн гээшэб.

¹⁹ Минии тогтооһон ёһо гуримые сахигты, малаа ондоо үүлтэртэй малтай бү холигты, таряаландаа хоёр ондоо үрэһэ бү таригты, олон ондоо утаһаар, нооһон ба маалинга утаһаар оёһон хубсаһа бү үмдэгты.

²⁰ Хэн хадамтай һамгантай унтааб, тэрэниие хэһээхэ хэрэгтэй, харин үхэл хүрэтэрнь хэһээхэ хэрэггүй.

²¹ Эзэндэ майхан һүмын үүдэндэ тэрэ хүн гарза харюулгын үргэл болгон хони асараг.

²² Нүгэлыень арилгахын тула санаарта Эзэнэй үмэнэ хонёор гарза харюулгын үргэл үргэжэ, нүгэлыень арюудхаха, нүгэлыень сагааруулха ёһотой.

²³ Тэрэ газарта ерэхэдээ, жэмэстэ модонуудые һуулгагты. Гурбан жэл соо ургаһан үриень эдихэгүйт.

²⁴ Дүрбэдэхи жэлдэ бүхы гараһан жэмэсые Эзэндэ зорюулагдаһан һайндэрнүүдтэ зорюулжа, үргэхэ ёһотойт.

²⁵ Табадахи жэлдэ гараһан бүхы үрэ жэмэсые өөһэдөө эдихэдэтнай болохо. Би Эзэн, танай Бурхантнай гээшэб.

²⁶ Шуһатай юумэ бү эдигты, үзэл бү үзүүлэгты.

²⁷ Толгойгоо түхэреэлжэ үһөө бү хюһагты. Һахалайнгаа үзүүр бү гутаагты.

²⁸ Үхэһэн хүнэй түлөө бэеэ бү хадхагты. Бэедээ тэмдэгүүдые бү зурагты. Би Эзэн гээшэб.

²⁹ Басагаяа бү бузарлагты. Һальхай ябадалтай болохо. Байһан газартнай һальхай һамуу ябадалаар дүүрэхэ.

³⁰ Минии субботонуудые сахигты, нангин шүтөөндэмни шүтэгты. Би Эзэн гээшэб.

³¹ Үхэһэн хүнүүдые уригшадта бү хандагты, эльбэ шэжэ хэдэг хүнүүдтэ бү харгылагты. Таанад тэдээнһээ бузартахат. Би Эзэн, танай Бурхантнайб.

³² Буурал толгойтой үбгэд хүгшэдэй урда бү һуугты, үбгэн хүниие хүндэлжэ, бодогты. Өөрынгөө Бурханһаа һүрдэн айгты.

³³ Танай газарта ерэһэн уладые бү газаалагты.

³⁴ Танай нютагта байрлаһан ерүүл хүн танай газарай хүн болоно. Өөртөө дуратай байгшадал мэтэ, тэрээндэ дуратай бай. Таанадшье Египедэй газарта ерүүл зон байгаа ха юмта. Би Эзэн, танай Бурхантнай гээшэб.

³⁵ Үйлэ хэрэгүүдтээ үнэн сэхэ байгты, шэгнүүртэ, утын ба хүндын хэмжүүртэ үнэн сэхээр байгты.

³⁶ Танай хэмжүүр, шэгнүүр, гиири, эфаа, гиин зүбөөр харуулдаг байг. Египедэй газарһаа таанадые гаргаһан Эзэн, танай Бурхантнай гээшэб.

³⁷ Минии гаргаһан ёһо гуримуудые, тогтоол хуулинуудые сахижа ябагты. Би Эзэн гээшэб.