Левит 18 - Библи

Ташаяангы хурисал тухай

¹ Эзэн Моисейдэ зарлиг буулгаба:

² – Израильшуудта иигэжэ үгүүлэ: Би хадаа танай Эзэнби.

³ Танай һуужа байһан Египет газарай ёһо заншалаар бү ябагты. Минии таанадые абаашажа ябаһан Ханаһаан газарай ёһо заншал бү баримталагты. Тэдэнэй тогтоолнуудаар бү ябагты.

⁴ Минии хуулинуудые үйлэдэжэ, Минии тогтоолнуудые сахижа, Минии ёһо баримталан ябагты. Би хадаа танай Эзэн Бурханби.

⁵ Минии тогтоол болон хуулинуудаар ябагты. Тэдэниие сахижа ябаһан хүн амиды ябаха. Би Эзэнби.

⁶ Хэншье өөрынгөө ойрын түрэл хүнтэй ташаяангы хурисал үйлэдэхэ ёһогүй. Би хадаа Эзэнби.

⁷ Эхэтэеэ ташаяангы хурисал үйлэдөөд, эсэгынгээ нэрэ бү гутаа. Өөрынгөө эхэтэеэ ташаяангы хурисал бү үйлэдэ. Шинии эхэ гээшэ.

⁸ Эсэгынгээ һамгантай ташаяангы хурисал бү үйлэдэ, тиигэжэ ши эсэгынгээ нэрэ гутаанаш.

⁹ Эсэгынгээ гү, али эхынгээ басагантай, гэртэшье түрэһэн, үгы һаа, гаднашье түрэһэн өөрынгөө эгэшэ дүүнэртэеэ ташаяан бү үйлэдэ.

¹⁰ Өөрынгөө хүбүүнэй басагантай, үгы һаа, басаганайнгаа басагантай ташаяан бү үйлэдэ. Тэдэ шинии үри һадаһан болоно гээшэ.

¹¹ Түрэһэн эсэгыншни аад, хойто эхэһээ гараһан басагантай ташаяан бү үйлэдэ. Тэрэшни шинии эсэгээр түрэһэн дүүшни болоно. Таанад нэгэ эсэгэтэй түрэһэн аха дүүнэр болонот.

¹² Эсэгынгээ эгэшэ дүүнэртэй ташаяан бү үйлэдэ. Тэдэ шинии эсэгын ойрын түрэл болоно.

¹³ Эхынгээ эгэшэ дүүнэртэй ташаяан бү үйлэдэ. Тэдэ шинии эхын ойрын түрэл болоно.

¹⁴ Эсэгынгээ ахын һамганда ташаяан үйлэдэхын тула бү ойрто. Тэрэ шинии эгэшэ болоно.

¹⁵ Өөрынгөө бэритэй ташаяан бү үйлэдэ. Тэрэшни шинии хүбүүнэй һамган болоно, тэрээнтэй ташаяан бү үйлэдэ.

¹⁶ Өөрынгөө аха дүүнэрэй һамгадтай ташаяан бү үйлэдэ. Тиигэжэ ши аха дүүнэрэйнгээ нэрые гутаанаш.

¹⁷ Эхэ басаган хоёртой ташаяан бү үйлэдэ. Һамганайнгаа хүбүүнэй басага, басаганайнь басагыешье бү аба. Тэдэнтэй ташаяан бү үйлэдэ. Тэдэшни шинии һамганай ойрын түрэл болоно. Үгы болбол, энэ һальхай һамуу ябадал гээшэ.

¹⁸ Һамганайнгаа амиды мэндэ байхада тэрээнэй эгэшэ дүүень ташаяан үйлэдэхэеэ һамган болгожо бү аба.

¹⁹ Һамганайнгаа һарынхиинь ерэхэдэ, ташаяан үйлэдэхэеэ бү ойрто.

²⁰ Ондоо хүнэй һамгантай ташаяан бү үйлэдэ, бузартахаш.

²¹ Өөрынгөө үри хүүгэдээ Моолохто бү һүгэдүүлэ, өөрынгөө Бурханай нэрэ гутаахаш. Би хадаа Эзэнби.

²² Һамгантай хэбтэһэн мэтээр эрэ хүнтэй бү хэбтэ, энэ жэгшүүритэй ябадал гээшэ.

²³ Ямаршье адуу малтай хэбтэжэ, бэеэ бү бузарла. Һамгадшье адуу малай урда бү хэбтэг. Энэ хадаа забхайрһан ябадал гээшэ.

²⁴ Таанад энэ мэтээр аашалаад, өөрыгөө бү бузарлагты, юундэб гэхэдэ, энэ мэтэ забхайралга үйлэдэһэн энэ нютагай хүн зониие Би эндэһээ орогүй үлдөөб.

²⁵ Тэрэ газарай бузарлагдахадань, тэрээниие нүгэл хилэнсынь түлөө хэһээгээб: тэрэ газар дээрэнь һуугшадые бөөлжөөд гаргажархибаб.

²⁶ Тиимын тула таанад Минии тогтоол болон һургаалнуудые сахижа ябагты, элдэб муухай жэгшүүринүүдые хэншье болбол, хари хүншье хадаа, ерүүлшье хүн хадаа бү үйлэдэгты.

²⁷ Эдэ элдэбын жэгшүүринүүдые танһаа урид энэ газарта һууһан арад зоной үйлэдэһэндэл адли таанадай тэрэ газарые бузарлаа һаатнай,

²⁸ тэрэ газар тэрэниие бузарлажа эхилхэдэтнай таанадһаа урид һууһан арад зониие бөөлжэн гаргаһан мэтээр таанадыешье гаргажа болохо.

²⁹ Али хэн нэгэн энэ мэтэ жэгшүүринүүдые үйлэдөө һаа, тэрэ хүн ами наһаяа хосороожо һалаха.

³⁰ Тиимын тула таанад Минии захиһан захиралтануудые сахигты, таанадһаа урид үйлэдэһэн жэгшэгүүринүүдые бү үйлэдэгты, тэдэнээр бэеэ бү бузарлагты. Би болбол танай Эзэнтнайб.