Левит 17 - Библи

Үргэлнүүд тухай

¹ Эзэн Моисейдэ үгүүлхэдээ, иигэжэ айладхаба:

² – Аһароондо, тэрэнэй хүбүүдтэ, бүхы израильшуудта соносхон, иигэжэ хэлээрэй: Эзэн иимэ зарлиг буулгана:

³ Хэрбэеэ израильшуудай али нэгэнэй отог буусадаа тугал гү, али хони гү, үгы һаа, ямаа гаргаад, али хэн нэгэнэй отог буусын газаа тээнь үүсэ гаргаад,

⁴ Эзэнэй байрын үмэнэ Эзэндэ үргэл үргэхын тула майхан һүмын үүдэндэ асараагүй һаань, тэрэ хүндэ шуһанай зэмэ тохоогдохо ёһотой: тэрэ шуһа адхаа, тиин тэрэ хүн хэһээгдэхэ ёһотой.

⁵ Юунэй түлөө гэхэдэ, израильшуудай үргэл үргэхэдөө, хээрэ гаргангүйгөөр, харин майхан һүмын үүдэндэ санаартада асараад, Эзэнэй үмэнэ үргэл үргэхынь тула гээшэ.

⁶ Санаарта майхан һүмын үмэнэ Эзэнэй үргэлэй шэрээ дээрэ шуһаар сүршөөд, Эзэндэ таатай һайхан хуншуу үнэр өөхэ тоһоор гаргаха.

⁷ Саашадаа Бурханда урбан, альбан шүдхэртэ һүгэдэжэ, үргэл хэхэгүйнь тула, энэ хадаа тэдэнэртэ угайнь хэтэ мүнхын захяа тогтоол болоно гээшэ.

⁸ Үшөө тэдээндэ хэлээрэй: хэрбэеэ израильшуудай болон танай дунда ажаһуудаг ерүүл зоной хэн нэгэн түгэс шатаалта үргэл гү, али үргэл бариса үйлэдэжэ,

⁹ Эзэндэ үргэл болгон, майхан һүмын үүдэндэ асараагүй һаа, тэрэ хүн хэһээлтэдэ орохо.

Шуһан тухай

¹⁰ Хэрбэеэ израильшуудай болон танай дунда ажаһуудаг ерүүл зоной хэн нэгэнэй юунэйб даа шуһа эдеэ һаань, тэрэ хүнһөө буруу харахаб, шуһа эдиһэн хүнэй ами наһыень таһалжа, үгы болгон хосороохоб.

¹¹ Юундэб гэхэдэ, амитанай ами наһан шуһан соонь юм. Тэдэнэй шуһаар үргэл хэхыетнай Би танда захинаб, юундэб гэхэдэ, тэрэ шуһан танай нүгэл сагааруулгын үргэлэй түлбэри болоно гээшэ. Тэрэ шуһан танай нүгэл арюудхана.

¹² Тиимэһээ Би израильшуудта иигэжэ айладхааб: таанадай нэгэшье хүн шуһа эдихэ ёһогүй, танай дунда ажаһуудаг ерүүл хүн баһа шуһа эдихэ ёһогүй.

¹³ Хэрбэеэ израильшуудай болон таанадай дунда ажаһуудаг ерүүл зоной али нэгэн агнуурида гараад, эдижэ боломоор ан гү, али шубуу баряа һаа, тэрэнэй шуһыень гоожуулаад, шоройгоор булаха ёһотой.

¹⁴ Юундэб гэхэдэ, бүхы амитанай ами наһаниинь шуһан соонь юм, шуһаниинь тэрэнэй ами һүнэһэниинь мүн гээшэ. Тиимэһээ Би израильшуудта хэлээб: ямаршье юумэнэй шуһа бү эдигты, юундэб гэбэл, бүхы амитанай ами һүнэһэниинь тэрэнэй шуһан мүн гээшэ; шуһа эдиһэн хүн үхэжэ хосороогдохо.

¹⁵ Ямар нэгэ зоболго гү, али арьяатанай һэе эдиһэн хүн, нютаг гү, али ерүүл хүн бүхэн хубсаһаа, нюур гараа уһаар угааха ёһотой, үдэшэ болотор бузартай байха, һүүлээрнь арюун болохо.

¹⁶ Хэрбэеэ тэрэ хүн юумэеэ угаагаагүй һаа, бэеэ сэбэрлээгүй һаа, тэрэ өөрынгөө нүгэл өөр дээрээ даагаад ябаха.