Левит 16 - Библи

Арюудхалгын үдэр

¹ Аһарооной хоёр хүбүүдэй Эзэнэй галда дайруулагдаад, наһа барахадань,

² Эзэн Моисейдэ иигэжэ үгүүлбэ: – Аһароон ахадаа хэлээрэй: дуратай сагтаа Һүмын нангин газар руу халхабшын саана, хэлсээнэй ханзын хушалтада бү дүтэлэг, юуб гэхэдэ, үхэлдэ дайрагдажа болохо – хаалта дээгүүрнь үүлэн шэнгеэр бии боложо байхаб.

³ Аһароон нангин ордон руу ороо һаа, нүгэл сагааруулгын үргэлдэ тугал үргэлтэй, түгэс шатаалта үргэлэй хонитой орохо ёһотой.

⁴ Бэеэ уһаар угаагаад, түрүүн маалинга дотор хубсаһа үмдэхэ, маалингаа бүһөөр бүһэлхэ, дээрэһээнь нангин маалинга ута самса үмдэхэ ёһотой, дээрээ маалинга кидар малгай үмдэг – эдэ бүгэдэ нангин хубсаһан болоно. Эдэ хубсаһаа үмдэхэдөө, бэеэ сэбэрээр угаагаад, үмдэхэ ёһотой.

⁵ Бүхы израильшуудай нэрэһээ нүгэл сагааруулгын үргэлдэ хоёр тэхэ абаг, нэгэ хуса түгэс шатаалта үргэлдэ зорюулжа абаг.

⁶ Аһароон нүгэл сагааруулгын үргэлдэ тугал асараг, тиигээд өөрыгөө, өөрынгөө гал гуламта арюудхаха ёһотой.

⁷ Аһароон тэдэ хоёр тэхэнүүдээ Эзэнэй үмэнэ майхан һүмын үүдэндэ байлгаад,

⁸ жээрэб хаяха: алинь Эзэндэ зорюулагдахаб, алинь табилгатын болохоб.

⁹ «Эзэндэ зорюулагдаха» гэһэн жээрэб бууһан тэхэеэ нүгэл сагааруулгын үргэлдэ үргэхэ ёһотой.

¹⁰ «Табилгатын болохо» гэһэн жээрэбтэй тэхэеэ Эзэнэй үмэнэ байлгаад, дээрэнь нүгэл арюудхалгын ёһолол бүтээгээд, сүл губи руу сүлөө (хүнэй ябашагүй элһэн губяар тэдээнэй хуули буса ябадал аашыень бэедээ даагаад ябахыень) табиха ёһотой.

¹¹ Аһароон нүгэлэйнгөө түлөө тугал асараад, нүгэл сагааруулгын үргэлдэ үргөөд, өөрыгөө, өөрынгөө гэр бүлэ сагааруулха.

¹² Тиигээд Эзэнэй үмэнэ байһан үргэлэй шэрээһээ согой амһарта соо дүүрэн улаан сог абаад, дүүрэн адха сан санзай адхаад, халхабшын саана орохо.

¹³ Эзэнэй үмэнэ сан санзай ууюулхадань, хэлсээнэй ханзын дээрэхи арюудхалгын хушалта дээгүүр утаан дэлгэрхэ, ууяха ёһотой, үгы һаа, тэрэтнай үхэжэ болохо.

¹⁴ Тугалай шуһаар хургаараа арюудхалгын хушалтын зүүн тала руунь, мүн арюудхалгын хушалтын урдаһаань долоо дахин сүршэхэ.

¹⁵ Тиигээд арад зоной нүгэл сагааруулгын үргэл болгон тэхын амиинь таһалха. Халхабшын саана шуһыень оруулаад, тугалай шуһаар юу хээб, тэрээн шэнгеэр бүтээгээд, – арюудхалгын хушалта дээрэнь, урдань сүршэхэ.

¹⁶ Иигээд нангин газараа израильшуудай бузар булай юумэнһээнь, нүгэл хилэнсэһээнь, гэмтэ ябадалһаань сагааруулха. Энэ мэтын ёһоор тэдээнэй муухай бузарай дунда байһан, майхан һүмые баһа иигэжэ арюудхаха ёһотой.

¹⁷ Майхан һүмэ руу арюудхаха гэжэ ороходонь, нэгэшье хүн тэндэһээ гаратарынь майхан һүмэ соо байха ёһогүй. Тиигээд тэрэ өөрыгөө, өөрынгөө гал гуламтые, израильшуудые арюудхаха ёһотой.

¹⁸ Эзэнэй үмэнэ байһан үргэлэй шэрээе арюудхаад, тугалай болон тэхын шуһа бүхы эбэрнүүдтэнь үргэхэ.

¹⁹ Дээрэнь шуһаар хургаараа долоо дахин сүршөөд, израильшуудые бузарһаань сэбэрлээд, арюудхаха.

Нүгэл сагааруулгын тэхэ

²⁰ Нангин газар, майхан һүмэ, үргэлэй шэрээ эдэ бүгэдые арюудхахын тула ёһолол бүтээгээд, Аһароон нэгэ амиды тэхэ асарха.

²¹ Аһароон хоёр гараа тэрэ тэхын тархи дээрэ табяад, израильшуудай бүхы хуули буса, гэмтэ ябадалнуудыень, бүхы нүгэлыень наманшалаад, тэхын тархи дээрэ тээгээд, тэрээнээ харууһалагша хүнтэй сүл губи руу табижархиха.

²² Тэрэ тэхэ хүнэй бүхы хуули буса ябадалнуудыень бэедээ шэнгээгээд, амитан зоной ябашагүй газар руу абаашаха. Тиигээд тэрэ тэхэ сүл губи руу табигдаха ёһотой.

²³ Аһароон майхан һүмэ руу ороод, нангин ордоной дотоодо таһалгада ороходоо үмдэһэн маалинга хубсаһаа тайлаад, тэндээ орхёод,

²⁴ бэеэ нангин газарта уһаар угаагаад, хубсаһаа үмдөөд, гараха. Тиигээд өөрынгөө түлөө, арад зонойнгоо түлөө түгэс шатаалта үргэл үргөөд, өөрыгөө, арад зоноо арюудхаха.

²⁵ Харин нүгэл сагааруулгын үргэлэй өөхыень үргэлэй шэрээ дээрэ галдаха ёһотой.

²⁶ Табилгатын тэхые абаашаһан хүн хубсаһаа, бэеэ уһаар угааһанайнгаа һүүлдэ байрадаа орохо ёһотой.

²⁷ Харин нүгэл сагааруулгын үргэлдэ зорюулагдаһан тугал тэхэ хоёрой шуһаар нангин газарые арюудхаад, мяхыень хүнэй байраһаа холо абаашаад, арһатайнь, мяхатайнь, шабааһатайнь галда шатааг.

²⁸ Галдаһан хүн хубсаһаа, бэеэ уһаар угаагаад, байрадаа орохо ёһотой.

²⁹ Энэ хадаа танда мүнхэ зар зарлиг болог: долоо һарын арбанда сэдьхэлээ номгодхожо байгты, юумэ бү хэгты танай дунда һууһан уул болон ерүүл зоншье ямаршье юумэ бү хэг.

³⁰ Юундэб гэхэдэ, энэ үдэр таанадые арюудхана, Эзэнэй үмэнэ сэбэр байхынтнай түлөө таниие бүхы нүгэл хилэнсэгһээтнай сагааруулна.

³¹ Энэ хадаа түгэс амаралтын суббото болоно. Сэдьхэлээ тайбшаруулагты. Энэ бол мүнхэ захяа зарлиг гээшэ.

³² Арюудхалгын ёһолол бүтээхэдээ, эсэгынгээ орондо мүргэл хэхэ гэжэ тоһоор түрхюулэн һахил хүртэһэн санаарта хэхэ ёһотой. Нангин маалинга хубсаһаа үмдөөд,

³³ нангин газараа, майхан һүмэ, үргэлэй шэрээ, санаартанаа, арад зоноо арюудхаха.

³⁴ Энэ хадаа танда мүнхэ захяа зарлиг болог: жэлэй нэгэ дахин израильшуудые бүхы нүгэл хилэнсэһээнь арюудхаха гэһэн Эзэнэй хэлэһэн зарлигаар Моисей бүтээбэ ха.