Левит 15 - Библи

Бэеын бузарнууд тухай

¹ Эзэн Моисей Аһароон хоёрто үгүүлбэ:

² – Израильшуудта соносхожо, хэлэгты: хэрбэеэ хэн нэгэнэй бэеһээнь эдеэрэ гараа һаань, тэрэ эдеэрэһээ боложо хүн бузартай гэжэ тоологдохо.

³ Хүнэй бэеһээнь гараһан эдеэрын бузар тухай: хүнэй бэеһээ эдеэр гаража үргэлжэлөөшье һаа, гарахаяа болёошье һаа, илгаагүй, хүн бузарлагдаба гээшэ.

⁴ Эдеэрэ гаража байһан хүнэй унтариньшье бузартай, һууһан газарыньшье бузартай.

⁵ Хэрбээ али нэгэн унтаридань хүрөө һаа, хубсаһаа, бэеэ уһаар угааха ёһотой, тиигээд үдэшэ болотор тэрэ хүн сэбэр бэшэ гэжэ тоологдохо.

⁶ Хэн нэгэн бэеһээ эдеэрэ гарадаг хүнэй һууһан юумэн дээрэ һуугаа һаа, хубсаһаа, бэеэ уһаар угааха ёһотой, тиигээд үдэшэ болотор бузартай байха.

⁷ Хэн нэгэн бэеһээ эдеэрэ гарадаг хүнэй бэедэнь хүрөө һаа, тэрэ хубсаһаа, бэеэ уһаар угааха ёһотой, тиигээд үдэшэ болотор бузартай байха.

⁸ Хэрбээ бэеһээнь эдеэрэ гарадаг хүнэй сэбэр хүн руу нёлбоо һаань, тэрэ хүн хубсаһаа, бэеэ уһаар угаагаад, үдэшэ болотор бузартай байха.

⁹ Бэеһээн эдеэрэ гарадаг хүнэй һууһан һууриньшье бузартай.

¹⁰ Хэн нэгэн тэрэ хүнэй доро байһан юумэндэнь хүрөө һаа, үдэшэ болотор бузартай байха. Баһа тэрэ юумэнүүдтэнь гараа хүргэһэн хүн хубсаһаа угааха ёһотой, тиигээд бэеэ уһаар угааг, тиимэ хүн үдэшэ болотор бузартай байха.

¹¹ Эдеэрэ гарадаг хүнэй гараа угаангүй хүндэ хүрөө һаань, тэрэ хүн хубсаһаа угааха ёһотой, бэеэ уһаар угааг, тэрэ үдэшэ болотор бузартай байха.

¹² Эдеэрэ гарадаг хүнэй шабар амһартада хүрөө һаань, тэрэ амһартыень бута сохихо хэрэгтэй. Хэрбээ модон амһарта һаань, уһаар угааха хэрэгтэй.

¹³ Эдеэрэ гарадаг хүнһөө эдеэрэнь гарахаа болёо һаань, арюудхалгын долоон хоног тоолоод, хубсаһаа угааха ёһотой, бэеэ булагай урдажа байһан уһаар угаагаад, сэбэр болохо.

¹⁴ Наймадахи үдэртөө хоёр залуу тагтаа шубуу, хоёр түүтэй шубуу Уулзалгын майхан һүмын үүдэндэ Эзэнэй үмэнэ асаржа, санаартада үгэхэ ёһотой.

¹⁵ Санаарта шубуудһаа нэгыень шэлэжэ, нүгэл сагааруулгын үргэл болгон үргэхэ, бэшэ шубуудыень түгэс шатаалта үргэл болгон үргэхэ. Тиигэжэ санаартан эдеэрэ гаран бузарлагдаһан хүниие Эзэнэй үмэнэ арюудхуулан хүлисүүлхэ юм.

¹⁶ Хэрбээ хэн нэгэнэй үрэһэнэйнь гараа һаа, тэрэ хүн бүхы бэеэ угааха ёһотой, тэрэ үдэшэ болотор бузартай байха.

¹⁷ Элдэб хубсаһандань, элдэб арһанда үрэһэнэйнь унаа һаа, тэдэнээ угааха ёһотой, тэрэ үдэшэ болотор бузартай байха.

¹⁸ Хэрбээ эрэ хүн эхэнэртэй хэбтээд, ехээр үрэһэеэ гараа һаа, тэрэ бэеэ угааха ёһотой, үдэшэ болотор тэрэ бузартай байха.

¹⁹ Хэрбээ эхэнэрһээ һарынхиин гараа һаань, тэрэ долоон хоногто һарынхиин гарахаа болитор һууха ёһотой, хэн нэгэн тэрээндэ дүтэ хүрөө һаа, үдэшэ болотор бузартай байха.

²⁰ Тэрэнэй хэбтэһэн унтаринь һарынхиин гарахаа болитор бузартай, юун дээрэ һуунаб, тэрэнь баһа сэбэр бэшэ.

²¹ Хэн нэгэн унтаридань хүрөө һаа, хубсаһаа, бэеэ угааха ёһотой, үдэшэ болотор тэрэ сэбэр бэшэ.

²² Хэн нэгэн тэрэ эхэнэрэй һууһан юумэндэнь хүрөө һаа, бэеэ, хубсаһаа угааха ёһотой, үдэшэ болотор тэрэ хүн бузартай.

²³ Хэн нэгэн тэрэнэй унтариин нэгэ юумэндэнь хүрөө һаа, һууһан һууридань байһан юумэндэнь хүрөө һаа, тэрэ хүн үдэшэ болотор сэбэр бэшэ.

²⁴ Хэрбээ тэрэ эхэнэрэй үбгэнтэеэ унтаа һаа, эрэнь долоон хоногто бузартай байха, ямаршье унтарида тэрэ хүнэй унтаа һаань, тэрэнь бузарлагдаха.

²⁵ Хэрбээ эхэнэр һарынгаа юумэнэй болзорһоо урид гү, али һүүлдэ удаан хэды хоногто байгаа һаань, үгышье һаа, һарын юумэнь болзорһоонь удаан болоо һаань, тиимэ эхэнэр тэрэнэй үнгэртэр сэбэр бэшэ.

²⁶ Эхэнэрэй юумэнэйнь гаража байха үедэ ямаршье унтарида унтаа һаань, тэрэнь сэбэр бэшэ. Һарынгаа юумэнэй гараха үедэ унтаринь арюун бэшэ байдаг, тэрээндэл адли унтаринь арюун бэшэ. Ямар юумэн дээрэ һуугааб, тэрэнь баһал сэбэр бэшэ.

²⁷ Хэн нэгэн тэрэ эхэнэрэй унтаридань гү, али юумэндэнь хүрөөб, тэрэ хүн хубсаһаа, бэеэ угааха ёһотой, тиигээд үдэшэ болотор сэбэр бэшэ байха.

²⁸ Тэрэ эхэнэр һарынгаа юумэнэй үнгэрхэдэ, долоон хоногой һүүлдэ сэбэр болохо.

²⁹ Наймадахи үдэр хоёр залуу тагтаа шубуу гү, али хоёр түүтэй шубуу майхан һүмын үүдэндэ, санаартада асаржа үгэхэ ёһотой.

³⁰ Санаарта тэрэ шубуудай нэгыень нүгэл сагааруулгын үргэл болгон үргэхэ, нүгөөдыень түгэс шатаалта үргэл болгон үргэхэ. Тиигээд санаарта эхэнэрэй һарынхиин гоожожо бузарлуулһан юумэнһээнь Эзэнэй үмэнэ арюудхаха.

³¹ Израильшуудые бузарһаа зайлуулагты. Тэдэ бузартажа бү үхэг, тэдэнэй дунда байһан Минии гэр байра бү бузарлаг.

³² Энэ амиды бэеһээнь эдеэрын гараһанай, һарын юумэнэй гарахаһаа боложо, бузартаһан хүн тухай тогтоол хуули.

³³ Һарын юумэнһээ боложо гү, али ондоо шалтагаанһаа шуһаа гаража, зободог эрэ эхэнэр ба арюун бэшэ эхэнэртэй унтаад, үбгэнэйнь бузартай болоһон тухай тогтоол хуули гээшэ.