Левит 14 - Библи

Һэлхэ үбшэнһөө арюудхалга

¹ Эзэн Моисейдэ айладхаба:

² – Һэлхэ үбшэнтэниие арюун болгохо тухай тогтоол хуули иимэ: нэн түрүүн үбшэнтэниие санаартада асарха ёһотой.

³ Санаарта хотон хүреэнэй газаа гараад, үзэхэ, хэрбээ һэлхэ үбшэнтэй хүнэй һэлхэ үбшэниинь эдэгээд байбал,

⁴ санаартын захиралтаар арюудхаха хүнэй түлөө хоёр амиды сэбэр шубуу, хуша модо, улаан утаһа, эссооб абаха ёһотой.

⁵ Тиигээд санаартын захиралтаар шабар амһарта соо урдажа байһан уһанһаа хээд, дээрэнь нэгэ шубууень алаха ёһотой.

⁶ Тэрэ санаарта амиды шубуу, хуша модо, улаан утаһа болон эссооб абаад, бүгэдыень урдажа байһан уһан дээрэ алагдаһан шубуунай шуһанда норгоохо.

⁷ Тиигээд арюудхагдажа байһан хүниие долоо дахин сүршэжэ, сэбэр болоо гэжэ хэлээд, амиды шубууень талада табиха ёһотой.

⁸ Арюудхагдажа байһан хүн хубсаһаа угаагаад, бүхы үһөө абхуулаад, бэеэ уһаар угааһанай һүүлээр сэбэр болоод, буудалдаа орохо ёһотой. Зүгөөр тэрэ хүн өөрынгөө майханай газаа тээнь долоон хоног соо байха ёһотой.

⁹ Долоодохи үдэртөө тэрэнь хамаг үһөө хюһажа, толгойгоо, һахалаа, нюдэнэйнгөө хүмэдхэ, бүхы үһөө абажа, хубсаһаа угаажа, бэеэ уһаар угаагаад, сэбэр болохо ёһотой.

¹⁰ Наймадахи үдэртөө тэрэ хүн хоёр зэмдэг дутагдалгүй эрэ хурьга, нэгэ зэмдэггүй эмэ хурьга, тиигээд талхан үргэл бүтээхын түлөө тоһотой холиһон эфаагай арбанай гурбан хуби шэниисын гурил абаха ёһотой.

¹¹ Тиигээд арюудхагша санаарта тэрэ арюудхагдажа байһан хүниие эдэ юумэнүүдтэйнь Эзэнэй үмэнэ майхан һүмын үүдэнэй дэргэдэ байлгаха.

¹² Санаарта нэгэ эрэ хурьга, нэгэ лоог хэмжүүрэй тоһо абаад, тэдэниие гарза харюулгын үргэл болгон, Эзэнэй үмэнэ дэлгэхэ ёһотой.

¹³ Тиигээд нүгэл наманшалгын болон түгэс шатаалта үргэлэй мал үүсэлэн гаргадаг нангин газарта тэрэ хурьгаа гаргаха ёһотой, юундэб гэхэдэ, энэ гарза харюулгын үргэл хадаа нүгэл сагааруулгын үргэл мэтэ санаартын хубита юм, энэ хадаа аргагүй ехэ нангин зүйл мүн.

¹⁴ Мүн тэрэшэлэн санаарта гарза харюулгын үргэлэй шуһанһаа абаад, арюудхагдажа байһан хүнэй баруун шэхэнэйнь үзүүртэ, баруун гарайнь эрхыдэ, тиигээд баруун хүлэйнь эрхыдэ түрхихэ ёһотой.

¹⁵ Санаарта оливын тоһонһоо абаад, өөрынгөө зүүн гарай альган дээрэ адхаха ёһотой.

¹⁶ Тиигээд санаарта баруун гарайнгаа хургые тоһондо дүрөөд, хургаараа Эзэнэй үмэнэ тоһоор долоо дахин сүршэхэ ёһотой.

¹⁷ Санаарта гарайнгаа альган дээрэхи үлэһэн тоһонһоо арюудхагдагша хүнэй баруун шэхэнэйнь үзүүртэ, баруун гарайнь эрхыдэ ба баруун хүлэйнь эрхыдэ: гарза харюулгын үргэлэй шуһа түрхиһэн газарнуудтань түрхихэ ёһотой.

¹⁸ Тиигээд санаарта гарайнгаа альган дээрэ үлэһэн тоһоёо арюудхагдагша хүнэй толгойдо түрхижэ, арюудхаха ёһотой.

¹⁹ Энэ мэтээр санаарта нүгэл сагааруулгын үргэл үргэжэ, арюудхагдагша хүниие бузарһаань арилгаһанай хойно, түгэс шатаалта үргэлэй мал үүсэлхэ.

²⁰ Мүн тэрэшэлэн санаарта түгэс шатаалта үргэл үргөөд, талхан үргэл үргэлэй шэрээ дээрэ үргэжэ, санаартын тэрэниие арюудхахадань, тэрэ хүн сэбэр болохо ёһотой.

²¹ Хэрбээ тэрэ хүн үгытэй, шадалгүй байгаа һаа, нүгэлөө сагааруулха нэгэ үргэгдэхэ эрэ хурьга гарза харюулгын үргэл болгон, оливын тоһотой холиһон эфаагай арбанай нэгэ хуби шэниисын гурил үргэл болгон, тиигээд нэгэ лоог хэмжүүрэй оливын тоһо абаг.

²² Баһа тиигээд өөрынгөө шадалаараа хоёр түүтэй шубуу гү, али хоёр залуу тагтаа шубуу: нэгыень нүгэл сагааруулгын үргэл болгон, нүгөөдыень түгэс шатаалта үргэл болгон асараг.

²³ Тэрэ хүн тэдэ бүгэдыень арюудхалгын наймадахи үдэртэ санаартада майхан һүмын үүдэнэй дэргэдэ Эзэнэй үмэнэ асарха ёһотой.

²⁴ Санаарта гарза харюулгын үргэл болохо хурьга, нэгэ лоог хэмжүүр оливын тоһо абаад, тэдэниие Эзэнэй үмэнэ дэен дэлгэхэ ёһотой.

²⁵ Тиигээд гарза харюулгын үргэл болохо хурьга гаргаад, санаарта гарза харюулгын үргэлэй шуһанһаа абаад, арюудхагдажа байһан хүнэй баруун шэхэнэйнь үзүүртэ, баруун гарайнь эрхыдэ, тиигээд баруун хүлэйнь эрхыдэ түрхихэ ёһотой.

²⁶ Санаарта тоһонһоо зүүн гарайнгаа альган дээрэ адхаад,

²⁷ тэрэ зүүн гарайнгаа альганһаа Эзэнэй үмэнэ долоо дахин сүршэхэ ёһотой.

²⁸ Тиигээд санаарта альган дээрэхи тоһонһоо арюудхагдагша хүнэй баруун шэхэнэйнь үзүүртэ, баруун гарайнь эрхыдэ, баруун хүлэйнь эрхыдэ: гарза харюулгын үргэлэй шуһа түрхиһэн газарнуудтань түрхихэ ёһотой.

²⁹ Мүн тэрэшэлэн санаарта үлэһэн альган дээрэхи тоһоёо арюудхагдажа байгаа хүнэй нүгэлыень наманшалан адхаха ёһотой.

³⁰ Тэрэ арюудхагдагша хүнэй шадалаараа хүргэһэнһөөнь нэгэ түүтэй шубуу гү, али нэгэ тагтаа шубуу асарха ёһотой.

³¹ Тэрэнэй хабаараа хүргэһэнһөөнь нэгыень нүгэл сагааруулгын үргэл болгон, нүгөөдыень түгэс шатаалта үргэл болгон талхан үргэлтэй сугтань үргэжэ, санаарта арюудхагдагшые Эзэнэй үмэнэ арюудхаха ёһотой.

³² Энэ хадаа мүнгэгүй ядуу байһан һэлхэ үбшэнтэниие яажа арюудхахын тухай тогтоол хуули болоно.

Гэрэй хэрэгсэлнүүд дээрэ бури тараха тухай

³³ Тиигээд Эзэн Моисей Аһароон хоёрто айладхаба:

³⁴ – Эзэлүүритнай болгожо Минии үгэһэн Ханаһаанай газарта таанадай ороходо, Би танай эзэлүүриин газарай гэрнүүдтэ бури дэлгэрүүлхэб.

³⁵ Тиихэдэнь тэрэ гэрэй эзэниинь: «Минии гэртэ ямаршьеб даа нэгэ бури бии болоо», – гэжэ санаартада ошоод, мэдүүлхэ ёһотой.

³⁶ Санаарта тэрэ гэртэ бури үзэхэеэ орохоһоо урид, «гэрээ хооһологты», – гэжэ захиралта үгэхэ ёһотой, юундэ тиинэб гэхэдэ, гэр соохи бүхы юумэниинь бузарлагдахагүйн түлөө гээшэ. Тэрэнэй һүүлдэ санаарта гэр харахаяа ерэхэ.

³⁷ Хэрбээ санаартын тэрэ бури харахадань, тэрэ ногообтор ба улаабтар хонхорнууд болоод, хана руунь гүн ороһон байгаа һаань,

³⁸ санаарта үүдээрнь гэрһээнь гараад, долоон хоногто тэрэ гэрые хааха ёһотой.

³⁹ Санаарта долоодохи үдэрөө дахин ерээд үзэхэ, хэрбэеэ буриин гэрэй ханаар дэлгэрээд байгаа һаань,

⁴⁰ санаарта тэрэ гэмтэһэн шулуунуудыень хобхолжо абаад, хотоһоо гадна, нэгэ бузартай газарта хаяха ёһотой.

⁴¹ Харин гэрэй зосоохииень бүхыдэнь хюһаад, тэрэ хюһадаһыень хотоһоо гадна нэгэ бузартай газарта хаяха ёһотой.

⁴² Тиигээд ондоо шулуу абажа, тэдэ шулуунай орондонь оруулаад, ондоо шабадаг юумээр тэрэ гэр шабаха ёһотой.

⁴³ Хэрбэеэ хэдышье шулууень абажа, хюһаад, шабаһанай һүүлдэ, буриин тэрэ гэртэ дахин гаража, ургаа һаань,

⁴⁴ санаарта ерээд, хараха ёһотой. Хэрбээ буриин гэр дотор дэлгэрээ һаань, тэрэ гэрые химэлхэ хортой бури гээшэ, тэрэ гэр бузартай болоно.

⁴⁵ Тэрэ гэр, шулуу, модыень шабаһан шабарыень эбдэжэ, хотоһоо холо абаашажа, муухай газарта хаяха хэрэгтэй.

⁴⁶ Тэрэ гэрэй хаагдаһан сагта досоонь ороһон хүн үдэшэ болотор бузартай байха.

⁴⁷ Тэрэ гэртэ унтаһан хүн хубсаһаа угааха ёһотой, тэрэ гэртэ эдеэлһэн хүн баһа хубсаһаа угааха ёһотой.

⁴⁸ Харин санаартын ерээд үзэхэдэнь, тэрэ гэр соохи буринь шабаһанай һүүлээр гэр соо дэлгэрээгүй байгаа һаань, санаарта тэрэ гэрые арюун гэжэ тунхаглаха ёһотой, юундэб гэхэдэ, буринь һалаад байна.

⁴⁹ Тиигээд тэрэ гэрые сэбэр болгохын түлөө хоёр шубуу, хуша модо, улаан утаһа ба эссооб абаха ёһотой.

⁵⁰ Нэгэ шубууень булагай уһатай шабар амһарта дээрэ алаха ёһотой.

⁵¹ Тиигээд хуша модо ба эссооб, улаан утаһа болон амиды шубууень абаад, булагай уһанда норгоод, тэрэ гэр долоо дахин сүршэхэ ёһотой.

⁵² Тэрэшэлэн шубуунай шуһаар, урдажа байһан булагай уһаар, амиды шубуугаар, хуша модоор, эссооб болон улаан утаһаар тэрэ гэр сэбэрлэгдэхэ.

⁵³ Тиигээд тэрэ амиды шубууе хотоһоо холо, хээрэ газарта абаашажа, табиха хэрэгтэй. Энэ мэтээр тэрэ гэр арюудхагдаад, сэбэр болохо.

⁵⁴ Энэ хадаа али нэгэ яра шарха, бужуу хамуу тухай тогтоол хуули гээшэ: али нэгэ хубсаһанда халдаһан яра шарха, гэр соохи бури, һэлхэн хабдар, элдин ба толбонууд тухай тогтоол хуули мүн.

⁵⁵ Энэнь юумэнэй бузартай гү, али сэбэр байһые тогтоохын тула үгтэнэ.

⁵⁶ Энэнь халдабаритай арһанай үбшэнгүүд болон буриин тушаа дүримүүд мүн.