Левит 10 - Библи

Надааб Абиһуу хоёрой нүгэл үйлэдэлгэ, үхэлгэ

¹ Аһарооной Надааб Абиһуу хоёр хүбүүдынь өөр өөрынгөө согой амһарта абаад, тэрээн соо сог, уталга хээд, Эзэнэй хэжэ болохогүй гэһэн юумэ – нангин бэшэ гал Эзэндэ асарба.

² Эзэнһээ гал соробхилон, тэдэниие дүргөөжэрхибэ, тэдэнь Эзэнэй үмэнэ үхэшэбэ.

³ Моисей Аһароондо үгүүлбэ: – Эзэн энээниие айладаһан байгаал, иигэжэ үгүүлхэдээ: Намда дүтэ хүнүүд дээрэ Өөрын нангиниие харуулхаб; бүхы арад зоной үмэнэ Алдараа харуулхаб. Аһароон абяа аниргүй байба.

⁴ Моисей Аһарооной Үззиһээл абгын Мишаһээл ба Элцапаан хүбүүдые дуудаад, тэдээндэ хэлэбэ: – Таанад ерээд, түрэл зонойнгоо бэенүүдые нангин газарһаа гаргаад, хотон хүреэнһөө холо абаашагты.

⁵ Тэдэнь ерээд, Моисейн хэлэһээр тэдэниие хубсаһанһаань баряад, хотон хүреэнһөө холо абаашаба.

⁶ Моисей Аһароон болон тэрээнэй Эльазаар Итамаар хоёр хүбүүдтэнь хэлэбэ: – Үхэхэгүйн тула, уур хилэнгэйнь хамаг хүн зондо хүрэхэгүйн тула толгойгоо бү нюсэгэлэгты, хубсаһаа бү хахалагты, юрэдөө, гай гашуудалаа бү харуулагты. Зүгөөр Эзэнэй галаар дүргэгдэһэн тухай танай аха дүүнэр, бүхы израильшууд уйдхар гашуудалаа харуулхадань болохо.

⁷ Харин таанад үхэхэгүйн тула майхан һүмэһөө бү гарагты, юуб гэхэдэ, Эзэнэй тоһолдог тоһон тан дээрэ байна бшуу. Тиигээд тэдэ Моисейн хэлэһэн үгөөр болобо.

Санаартанай уялганууд

⁸ Тиигээд Эзэн Аһароондо зарлиг буулгаба:

⁹ – Ши болон шинии хүбүүд майхан һүмэ руу ороходоо, үзэмэй дараһан архи болон алибаа һогтохо унда бү уугты, үгы һаа, таанад үхэхэт. Энэ хадаа таанадта үеын үедэ мүнхэ хуули ёһо болоно.

¹⁰ Таанад арюун ба бузарые, сэбэр ба сэбэр бэшые илгаха ёһотойт.

¹¹ Тиигээд Эзэнэй Моисейгээр дамжуулан үгэһэн хуулинуудта израильшуудые һургаха ёһотойт.

¹² Тиигээд Моисей Аһароондо, тэрээнэй үлэһэн Эльазаар Итамаар хоёр хүбүүдтэнь хэлэбэ: – Эзэндэ үргэһэн үргэлһөө үлэһэн талхан үргэлыень абаад, эһээлтэгүй хилээмыень үргэлэй шэрээгэй хажууда эдигты. Энэ хадаа аргагүй ехэ нангинай нангин зүйл гээшэ.

¹³ Энээниие арюун нангин газарта эдихэ ёһотойт. Энэ хадаа Эзэндэ үргэһэн үргэлэй шинии ба шинии хүбүүдэй нэрэтэ хуби гээшэ. Тиигэжэ намда захигдаһан юм.

¹⁴ Тиигээд бэлэг гэжэ дэлгэгдэхэ үбсүүн ба бэлэг гэжэ үргэгдэхэ уусые ши өөрынгөө хүбүүд, басагадаараа хамта нэгэ сэбэр газарта эдеэрэй. Юуб гэхэдэ, энэ хадаа израильшуудай амгалан байдалай түлөө үргэһэн үргэлһөө шамда болон шинии хүбүүдтэ үгтэһэн нэрэтэ хуби гээшэ.

¹⁵ Эзэнэй урда шинии үргэхын тула тэдэ үргэлэй өөхэнтэй хамта бэлэг гэжэ үргэгдэхэ ууса болон бэлэг гэжэ дэлгэн дэегдэхэ үбсүүе үгэхэ ёһотой. Энэ хадаа Эзэнэй захиралтаар шинии болон шинии хүбүүдэй хэтэ мүнхын нэрэтэ хуби болоно гээшэ.

¹⁶ Нүгэл сагааруулгын үргэл болохо эшэгые Моисейн бэдэрхэдэнь, тэрэнь шатаагдашаһан байба. Энээниие мэдээд, Моисей Аһарооной үлэһэн Эльазаар Итамаар хоёр хүбүүдтэ уур сухалаа хүрөөд, иигэжэ хэлэбэ:

¹⁷ – Таанад нүгэл сагааруулгын үргэлые арюун нангин газарта юундэ эдеэгүйбта? Энэ хадаа аргагүй ехэ нангинай нангин зүйл гээшэ. Тиигээд энэ арад зоной нүгэл даажа, тэрэ нүгэлыень Эзэнэй үмэнэ сагааруулхынтнай түлөө танда үгтэһэн гээшэ!

¹⁸ Шуһанайнь нангин газарта асарагдаагүй байхадань, таанад тэрээниие арюун газарта эдихэ байгаат, иигэжэ намда захираа һэн.

¹⁹ Аһароон Моисейдэ хэлэбэ: – Мүнөөдэр тэдэ нүгэл сагааруулгын үргэл хээд, түгэс шатаалта үргэлөө Эзэнэй үмэнэ үргөөд байна. Энэ ушар намда тохёолдоһон байна. Хэрбэеэ нүгэл сагааруулгын үргэлые мүнөөдэр эдеэ һаамни, Эзэндэ таатай таарамжатай байха гээшэ гү?

²⁰ Энээнииень Моисей дуулаад, һайшааба.