Коринфынхидтэ 2-дохи 9 - Библи

Юумээр дуталдаһан һүзэглэгшэдтэ туһаламжа

¹ Иерусалимда ажаһуудаг Бурханай хүнүүдтэ туһалха, дэмжэхэ тухай дахин һануулха хэрэггүй байха.

² Туһалха дуратай байһан тухайтнай би мэдэнэб, тиин Македониин зоной урда би таанадаар бахархаа хүм. «Ахайяын һүзэглэгшэд үнгэрһэн жэлһээ хойшо туһаламжа үзүүлхэдэ бэлэн байна», – гэжэ би хэлээ хүнби. Тиигэжэ танай зүдхэмжэ тэдэнэй олонииень үргэл хэхэдэ баһал нүлөөлөө.

³ Тиигэжэл таанадые магтаһан үгэнүүдни хооһон үгэнүүд байшахагүйн тула би һүзэглэгшэ дүүнэрээ таанадта ябуулааб. Харин минии хэлээшээр туһаламжынгаа мүнгэ бэлдээд байгаарайгты.

⁴ Зүгөөр Македониин зоной ошоходо, тэрэтнай бэлэн байха ёһотой. Үгы һаа, бидэшье, үшөө ехээр таанадшье эшэхэ улайха болохолта.

⁵ Тиимэһээ эдэ һүзэглэгшэ дүүнэрэй намһаа урда ошоод, амалһан үргэлыетнай эртэнһээ бэлдээд байбалнь таатай гэжэ бодооб. Тиигэбэл үргэл туһаламжатнай ерэхэдэмни бэлэн болоод, мүнгөө харамнангүй, һайн дураараа элбэг дэлбэгээр үргэһыетнай гэршэлхэл.

⁶ Багаар тариһан хүн бага ургаса абаха, ехээр тариһан хүн ехэ ургаса абаха гэжэ таанадта һануулжа хэлэнэб.

⁷ Хүн бүхэнтнай дурагүйгөөр гү, али баалалтаар юумэ бү үргэг, харин һанаандаа шиидэһэн зэргээр лэ үгэг. Бурхан баяртайгаар үгэжэ байһан хүндэ дуратай байдаг юм.

⁸ Бурхан таанадта хэрэгтэй юумэнһээ үлүүшье үгэжэ шадаха, тиимэһээ хододоо өөһэдтэтнай хүрэхэ, үшөө элдэб янзын буянтай хэрэгүүдые бүтээхэдэ хүрэхэ юумэтэй байхат.

⁹ «Тэрэ үгытэй дуталдаһан зондо элбэг дэлбэгээр тараажа үгөө, зүб шударгань хэтын хэтэдэ оршохо», – гэжэ Нангин Бэшэг соо Бурхан тухай бэшээтэй байдаг.

¹⁰ Тариха таряа, эдихэ хилээмэ үгэдэг Бурхан таанадта хэрэгтэй таряа, мүн бардам гарһаатнай баян ургаса үгэхэ.

¹¹ Тиигээд таанадай ямаршье юумэ үгэхэдэ бардам гартай байхынтнай тула Тэрэ таанадые бүхы юумээр баяжуулжа байха, тиимэһээ маанадай бадар хубаахада, олон зон Бурханда баяр баясхалан хүргэхэ.

¹² Юундэб гэхэдэ, энэ буянтай албатнай гансал Иерусалимда ажаһуудаг Бурханай хүнүүдэй дутагдалнуудые хангадаг бэшэ, харин олоной дунда Бурханда баяр баясхалан хүргэхэ дурыень халяадаг.

¹³ Таанадай Христоос тухай мэдээсэлые баримталжа байһые, тэрэнээ баталан өөһэдтэйнь болон бусад зонтой бардам хубаалсажа байһые хараһандаа тэдэ Бурханиие алдаршуулна.

¹⁴ Тиимэһээ таанадаар дамжан, Бурханай бүтээһэн үршөөл хайрын түлөө тэдэ зон таанадта ехэ һайнаар хандажа, хойноһоотнай зальбаржа байдаг юм.

¹⁵ Үнэлшэгүй бэлэгэйнь түлөө Бурханда баяр баясхалан хүргэел!