Коринфынхидтэ 2-дохи 6 - Библи

¹ Бурханай буян хэшэгые дэмы бү абагты гэжэ бидэ Бурхантай хамта ажаллажа байһан ушарһаа таанадые гуйнабди.

² «Таарамжатай сагай ерэхэдэ, Би шамайе дуулаа хүм, абарха үдэрэй ерэхэдэ, Би шамда туһалаа хүм», – гэжэ Бурхан хэлээ. Эгээл тэрэ саг болзор болобо, шамайе абарха тэрэ үдэр ерэбэ.

³ Ямаршье зондо бэрхэшээлнүүдые ушаруулхаяа бидэ оролдоногүйбди, тиимэһээ хэжэ байһан ажалдамнай алдуу дутагдал олохо шалтаг бидэ хэндэшье үгэнэгүйбди.

⁴ Ямаршье юумэ хэхэдээ, бидэ тохёолдоһон бэрхэшээл зоболонгуудые, дутагдал дундануудые, хүшэр байдалые даруу номгоноор дабажа гаран, өөһэдыгөө Бурханай үнэн зарасанар гэжэ харуулнабди.

⁵ Бидэ сохюулһан, түрмэдэ һууһан, һүрэг зондо дайруулһан байгаабди. Бидэ аргагүй ехээр ажалладаг, амаралта нойргүй, эдеэ хоолгүй ябадаг һэмди.

⁶ Бидэ арюун сэбэр, мэдэлгэтэй, тэсэбэритэй, үршөөл буянтай байдагбди. Арюун Һүлдэ маанадтай оршодог, тиин хайра дуран үнэн зүрхэнһөөмнай гарадаг.

⁷ Бидэ үнэн зүбые хэлэдэгбди, Бурханай һүр хүсэн манаар дамжан ажалладаг. Үнэн сэдьхэлнай – манай добтолхошье, бэеэ хамгаалхашье хуяг дуулга мүн.

⁸ Бидэ нэрэ хүндэтэйшье, нэрэ хүндэгүйшье ябаабди, магтаалдашье, хараалдашье хүртэжэ байгаабди. Үнэн зүбые хэлэжэ байхадаа, бидэ худалшад гэжэ тоологдодог һэмди.

⁹ Хүнүүдтэ танигдахагүй шэнги аад лэ, хүн бүхэндэ мэдээжэбди. Үхэжэ байһан шэнги үзэгдэһэн аад лэ, мүнөөшье болотор амиды байнабди. Хэһээлгэжэ байһаншье һаа, үхэлэй саазада хүртөөгүйбди.

¹⁰ Зобожо байһаншье һаа, бидэ ходо баяртай байдагбди; үгытэй ядуушье һаа, олон хүнүүдые баян болгодогбди; ямаршье юумэгүй байһан шэнги аад, үнэндөө бидэ бүхы юумэнэй эзэдынь гээшэбди.

¹¹ Коринфынхид, бидэ таанадта сэхыень хэлэнэбди, зүрхэ сэдьхэлнай нээлтэтэй байна.

¹² Манай зүрхэ сэдьхэл таанадта хаалтатай бэшэ, харин танай зүрхэ сэдьхэл маанадта хаалтатай байна.

¹³ Маанадай таанадта хандажа байһандал адляар таанад маанадта хандагты, зүрхэ сэдьхэлээ маанадта нээгты гэжэ үхибүүдтээ хэлэһэндэл адляар таанадта хэлэнэб.

Амиды Бурханай Һүмэ

¹⁴ Эзэндэ һүзэглэдэггүй зониие бү һажаагты. Зүб юумэн буруу юумэнтэй хамта байжа шадаха аал? Яажа гэрэл туяа шэб харанхытай хамта байхаб?

¹⁵ Яажа Христоос шолмостой эбтэй эетэй байжа шадахаб? Яажа һүзэгтэй зон һүзэггүй зонтой эблэржэ шадахаб?

¹⁶ Яажа Бурханай Һүмэ онгонуудта хамаатай байхаб? Бидэл амиды Бурханай Һүмэ гээшэбди. Бурхан Өөрөө иигэжэ хэлээ: «Өөрынгөө хүнүүдэй дунда Би гэр бодхоохоб, тиигээд тэдэнэйнгээ дунда оршожо байхаб, тэдэнэйнгээ Бурханиинь байхаб, харин тэдэнэр Минии арад болохо».

¹⁷ «Тиимэһээ тэдэ һүзэггүй зоной оршолониие орхижо, тэдэ зонһоо холодогты. Бузар юумэндэ бү хүрэгты, тиигэбэл Би таанадые һайшаахаб.

¹⁸ Би танай Эсэгэтнай болохоб, таанад Минии хүбүүд басагад болохот гэжэ түгэс хүсэтэй Эзэн хэлэнэ».