Коринфынхидтэ 2-дохи 3 - Библи

Шэнэ Хэлсээнэй зараса

¹ Бидэ дахин өөһэдыгөө таанадта танилсуулха болоно гүбди? Али зарим хүнүүдтэ адляар бидэ өөһэд дундаа зүбшөөһэн танилсуулгын бэшэгүүдые харуулха ёһотой гүбди?

² Таанад өөһэдөө бүхы хүнүүдтэ уншаха ойлгохоор манай сэдьхэлдэ бэшэгдэһэн бэшэг гээшэт.

³ Христоосой Өөрөө энэ бэшэг бэшээд маанадаар дамжуулһаниинь эли байна. Энэ бэшэг бэхээр бэшэ, харин амиды Бурханай Һүлдөөр бэшээтэй, шулуун хабтагайнууд дээрэ бэшэ, харин хүнүүдэй сэдьхэлдэнь бэшээтэй.

⁴ Бидэ эдэ бүхэн үнэн зүб байна гэжэ Бурханай урда Христоосой ашаар бата этигэлтэй байнабди.

⁵ Энэ ажал бүтээхэ аргатайбди гэжэ бидэ өөрынгөө нэрэһээ баталха эрхэгүйбди. Бурхан лэ бидэндэ тиимэ арга боломжо үгэдэг.

⁶ Тэрэл Бурхан бэшээтэй Хуули дээрэ бэшэ, харин Арюун Һүлдэ дээрэ һуури татаһан Шэнэ Хэлсээнэй зарасанар байха боломжо бидэндэ олгоо. Юундэб гэхэдэ, Хуули үхэл асардаг, харин Һүлдэ амидарал үршөөдэг.

⁷ Шулуун хабтагайнууд дээрэ үзэгүүдээр Хуули һиилэхэдэнь, тэндэнь Бурханай алдар толороо, Израилиин арадай харахын аргагүй һаргама гэрэлээр Моисейн нюурынь гэрэлтээ. Үхэл асардаг Хуули хүсэндөө байхадаа иимэ ехэ алдар үзүүлдэг байбал,

⁸ Һүлдэһөө эхитэй юумэн бүришье ехэ алдартай байха бэшэ аал?

⁹ Гэмнэлгэдэ хүргэжэ байһан юумэнэй алдартай байбал, үнэн зүб тээшэ хүтэлһэн ябадал бүришье ехэ алдартай байха бэшэ аал?

¹⁰ Анхан алдартай байһан юумые мүнөөнэй тон һаргама алдартай сасуулбал, тэрэ ямаршье алдаргүй гэжэ хэлэхэдэ болохо.

¹¹ Саг зуура оршодог юумэнэй алдартай байбал, хэтын хэтэдэ оршодог юумэн бүришье ехэ алдартай байха бэшэ аал?

¹² Иимэ эрхим һайн найдалгатай байхадаа бидэ ехэл зоригтой байнабди.

¹³ Ойр зуурын һүр жабхалангай буурахые Израилиин арадай харахагүйн тула бидэ нюураа бүдөөр хааһан Моисейдэл адли бэшэбди.

¹⁴ Үнэхөөрөө тэдэ зоной ухаан бодолынь хаалтатай байгаа. Манайшье үдэрнүүд хүрэтэр Хуушан Хэлсээе уншахадань, үнөөхи хушалтань абтаагүй байна. Гансал Христоос тэрэ хушалтые абаха аргатай.

¹⁵ Мүнөөдэршье, тэдэнэй ямаршье сагта Моисейн Хуули уншахадань, зүрхэ сэдьхэлынь үшөөл хаалтатай байдаг.

¹⁶ Зүгөөр тэрэ хушалта хүнэй Эзэндэ хандаһан лэ сагтань абтажа хаягдадаг.

¹⁷ Эзэн – Һүлдэ мүн, тиин Эзэнэй Һүлдын оршожо байһан газарта эрхэ сүлөө бии.

¹⁸ Тиимэһээ бидэ булта халхалагдаагүй нюураараа Эзэнэй алдарые харанабди. Эзэнэй Һүлдэ Эзэнэй алдарта бүри ойртуулан маанадые хубилгана.