Коринфынхидтэ 2-дохи 13 - Библи

¹ Мүнөө гурбадахияа таанадтай уулзахаар ошожо байнаб. «Ямаршье гэмнэлгэ хоёр гурбан хүнэй гэршэлгээр баталагдаха зэргэтэй», – гэжэ Нангин Бэшэг соо хэлээтэй байдаг.

² Дахин ерэхэдээ, би урдань нүгэл шэбэл үйлэдэһэн зониие, бусадшье зониие үршөөхэ хүлисэхэгүйб. Хоёрдохиёо таанадта ошоходоо, би тиигэжэ һэргылээ һэнби. Мүнөөшье таанадай дунда үгы байхадаа дахин дабтанаб.

³ Намаар дамжуулан Христоос хэлэнэ гү гэһэн баталалга таанад бэдэрнэт. Тиихэдэ таанадтай харилсахадаа Христоосой хүсэн һулараагүй, зүгөөр Тэрэ таанадай дунда хүсэ шадалаа элирүүлнэ.

⁴ Хэрээһэн дээрэ хадуулан саазалуулхадаа, Тэрэ һула байбашье, Бурханай хүсэ шадалаар амиды ябаа. Тэрээнтэй нэгэдэхэдээ, бидэ ахир һуланууд байнабди, тиин Тэрээнтэй хамта Бурханай хүсэ шадалаар амиды ябахыемнай таанад харахат.

Һүүлшын һэргылэмжэнүүд, мэндэшэлгэнүүд

⁵ Һүзэгтэй һууна гүт гэжэ өөһэдыгөө шалгагты, туршагты. Иисүүс Христоос досоотнай байна гэжэ ойлгоногүй аалта? Ойлгоогүй һаа, таанад шалгалта үгөөгүй гээшэт.

⁶ Харин маанадай шалгалта үгэһэн тухай мэдэнэт гэһэн найдалтайб.

⁷ Буруу юумэ бү үйлэдэһэйт гэжэ бидэ Бурханда зальбарнабди. Шалгалтаяа баряабди гэжэ харуулхын тула зальбарнагүйбди, харин маанадай шалгалтаяа үгөөгүйшье һаа, таанадай үнэн зүб юумэ бүтээжэ ябахын тула тиигэжэ зальбарнабди.

⁸ Бидэ үнэн зүбэй урдаһаа юушье хэжэ шадахагүйбди, харин бүхы юумые үнэн зүбэйл түлөө хэнэбди.

⁹ Маанадай ахир һула байхада, харин таанадай хүсэтэй байхада, бидэ баярладагбди. Тиигээд баһал таанадай заһархын түлөө бидэ зальбарнабди.

¹⁰ Таанадта ошоходоо, хатуу шэрүүнээр хандахагүйн тула, таанадтай байхагүйдөө би эдэ бүхэниие бэшэнэб. Һүүлэй һүүлдэ Эзэнэй намда үгэһэн эрхэ засаг таанадые бутарган унагаахын тула бэшэ, харин һэргээн бодхоохын тула үгтөө юм.

¹¹ Мүнөө, аха дүүнэрни, баяртай! Заһарха гэжэ оролдожо, хэлэһэн юумэнүүдыемни анхаржа, хоорондоо эбтэй эетэй, энхэ тайбан байгыт даа. Хайра дуран ба энхэ тайбан үршөөдэг Бурхан таанадтай оршожо байһай!

¹² Бэе бэеэ арюунаар таалажа мэндэшэлээрэйт. Бурханай хүнүүд булта таанадта амар мэндые дамжуулна.

¹³ Эзэн Иисүүс Христоосой үршөөл хайра, Бурханай хайра дуран та бүхэнтэй оршохонь болтогой, Арюун Һүлдэ та бүхэниие нэгэдхэжэ байхань болтогой!