Коринфынхидтэ 2-дохи 11 - Библи

Павел, мүн хуурмаг элшэнэр

¹ Тэнэг зан гаргахадамни тэсэбэритэй байһайт гэжэ хүсэнэб. Хэрэг дээрээ тиимэл байдаг ха юмта даа.

² Би Бурхандал адляар таанадта һанаагаа табинаб. Таанадые хүнэй гар хүрөөгүй, арюун басагандал мэтэ гансал хүндэ, Христоосто хадамда үгэхэ гэжэ үгөө үгэһэн байнаб.

³ Могой мэхэ гохо гарган, Евые яажа мэхэлээ һэм, тон тиигэжэл таанад мэхэлүүлээд, Христоосто үнэн сэхэ, арюун сэбэр һанал бодолнуудаа хубилгана гүт гэжэ би айнаб.

⁴ Хэрбээ хэн нэгэнэй таанадта маанадай номноһонһоо ондоо Иисүүсые номнобол, али маанадһаа тогтоожо абаһанһаа илгаатай ондоо һүлдые, һайн мэдээсэлые үгэбэл, таанад тэдэнииень амархан абахаар байнат.

⁵ Тэдэ «агууехэ элшэнэр» гэгдэдэг зонһоо би юугээрээшье дутанагүйб гэжэ бодоноб.

⁶ Би уран гоё хэлэтэй бэшэб, гэхэтэй сасуу эрдэм мэдэлгэтэйб. Таанад өөһэдөөшье энээниие элдэб ушарнуудһаа тухайлһан мэдэһэн байнат.

⁷ Таанадые дээшэнь үргэхын тула өөрыгөө доошонь даража байхадаа, Бурханай Һайн Мэдээсэлые түлөөһэгүйгөөр номноходоо, би буруу юумэ хээ гүб?

⁸ Ондоо һүзэглэгшэдэй бүлгэмүүдые дээрмэдэн, тэдэнһээ түлөөһэ абажа байгаад, би таанадта алба хэжэ байгааб.

⁹ Хамта байхадаа, мүнгөөр дуталдаха сагтаашье таанадта ашаан болодоггүй һэм. Македониһоо ерэһэн һүзэглэгшэд намда хэрэгтэй юумэ асаржа үгөө һэн. Урдань таанадые дарамталхагүй гэжэ оролдодог хэбээрээл саашадаашье байхаб.

¹⁰ Энэ бахархалыемни Ахайяын нэгэшье хүн буляажа шадахагүй гэжэ зосоомни оршодог Христоосой үнэн зүбөөр баталан хэлэнэб.

¹¹ Таанадта дурагүй байһандаа иимэ юумэ хэлэнэ гүб? Таанадта аргагүй ехээр дуратай байһыемни Бурхан мэдэхэ.

¹² Тэдэ бусад «элшэнэрэй» маанадтайл адли юумэ хэнэбди гэжэ бахархаха боломжогүй байхын тула мүнөө хэжэ байһан юумэеэл хэжэ байхаб.

¹³ Тэдэ худалша ажалшад, хуурмаг элшэнэр Христоосой бодото элшэнэр байһан хэбэр үзүүлдэг.

¹⁴ Эндэ гайхалтай юумэн үгы: сатана өөрөөшье гэрэл туяагай Эльгээмэлэй дүрэ дүрсэлэн мэхэлдэг ха юм.

¹⁵ Тиимэһээ тэрэнэй зарасанарай үнэн зүбэй зарасанарай дүрэ дүрсэлэн, тэдээндэл адляар харагдахада, ямаршье гайхамаар юумэн үгы. Эсэстээ тэдэнэр хэһэн юумэнүүдэйнгээл үрэ дүнгые абаха.

Христоосой түлөө Павелай зоболго

¹⁶ Хэншье намайе тэнэг байна гэжэ бү бодуужа гээд дахин дабтанаб. Харин тиигэжэ бодоо һаа, тэнэгтэхэ, бага зэргэ өөрөөрөө бахархаха боломжо үгыт даа.

¹⁷ Тиигэжэ бахархахадаа, би Эзэнэй һанаһанаар бахархаагүй байһамни мэдээжэ, харин үнэхөөрөө тэнэг байһандал хэлэнэб.

¹⁸ Олон зон уг гарбалаараа бахархадаг, тиин бишье тиигэжэл бахархахамни.

¹⁹ Таанад өөһэдөө ехэл сэсэн ухаантай, тиин тэнэг үбэштэй зондо ехэл тэсэбэритэй байдаг ха юмта!

²⁰ Таанадые богоолшолходо, али ашаглахада, али мэхэлхэдэ, али дээрэһээтнай харахада, али нюурыетнай альгадахада, таанад үнэндөө тэсэбэритэй байдагта.

²¹ Тиигэжэ өөһэдыгөө абажа ябадаг зөөлэн һуланууд байгаабди гэжэ эшэжэ хэлэнэб! Хэрбээ бусадай өөһэдөөрөө бахархахаяа зүрхэлбэл, бишье зүрхэлнэб. Тиихэдээ минии тэнэг байһамни мэдээжэ.

²² Тэдэнэр еврейнүүдбди гэнэ гү? Тиин бишье тиимэ хүмби. Тэдэнэр израильшууд гү? Тиин бишье тиимэ хүмби. Тэдэнэр Абраһаамай үри һадаһад гү? Тиин бишье тиимэб.

²³ Тэдэнэр Христоосой зарасанар гү? Тиихэдэ би тэдэнһээ үлүү һайн зарасань гээшэб. Тиигэжэ үбэштэйрһэндэл хэлэһэмни мэдээжэ. Би тэдэ зонһоо үлүү ехээр ажаллажа, бүри оло дахин түрмэдэ орооб, тоогүй оло дахин ташуурдуулан хэһээлгээд, үхэн алдааби.

²⁴ Иудейнүүд намайе табан удаа гушан юһэ дахин ташуурдаа.

²⁵ Гурба дахин намайе модоор сохёо, нэгэтэ һайса шулуудаа. Гурба дахин би кораблиин хүмэрилгэдэ орооб, нэгэтэ би нэгэ үдэрэй, нэгэ һүниин туршада далайн уһан соо байгааб.

²⁶ Оло дахин аяншалхадаа, би аюул оһолдо орожо байгааб: мүрэнүүдые гаталхадаа, дээрмэшэдтэй дайралдахадаа, өөрын яһатан зонтой һуухадаа, бусад яһатанаар байхадаа, хотодо ябахадаа, сүл губида ябахадаа, далайгаар тамархадаа, хуурмаг һүзэгтэнтэй уулзахадаа, аюул оһолдо орожо байгааб.

²⁷ Би ажаллажа, тулин зүдэржэ, нойро зүүдэгүйшье ябааб, үлэн хооһон, эдихэ хоолгүй, ууха ундагүйшье байгааб, хүйтэн нойтондо, нюсэгэн салдаганшье ябааб.

²⁸ Бусад юумэнүүдые тоолонгүй хэлэбэл, би бүхы һүзэглэгшэдэй бүлгэмүүдтэ һанаагаа табиха үдэр бүриин үүргэтэй хүм.

²⁹ Хэн нэгэнэй һулархада, бишье һуларһан шэнги байдагби. Хэн нэгэнэй хорхойтолгодо абтан нүгэл үйлэдэхэдэ, бишье тэрэнэй түлөө сухалдадагби.

³⁰ Хэрбээ бахархаха ёһотой байбал, минии һула байһыемни харуулһан юумэнүүдээр бахархахаб.

³¹ Бурхан болон Эзэн Иисүүсэй Эсэгэ хэтын хэтэдэ үреэл магтаалда хүртэжэ байһай: хэзээшье худалаар хэлэдэггүй байһыемни Тэрэ мэдэхэ.

³² Дамааскда байхадамни, Арээт хаанай захирагшань намайе барихын тула хотын хаалгые һахяа.

³³ Харин намайе ханада хэгдэһэн нүхөөр түрсүүг соо һуулгаад доошонь буулгаа юм. Тиигэжэ би зугадааб.