Коринфынхидтэ 2-дохи 10 - Библи

Павел Христоосой түлөө хэжэ байһан ажалаа хамгаална

¹ Хамта байхадаа, даруу номгон, холодоходоо, хатуу шэрүүн гүүлэгдэдэг би Павел таанадые Христоостой адли даруу номгон, энхэргэн зөөлэн зангаар гуйнаб.

² Таанадта ошоходоо, хатуу шэрүүн үгэнүүдые хэрэглэхэгүй байхыемни хэшээгээрэйгты. Зүгөөр маанад тухай өөдэгүй һула зон гэдэг нобшонуудта би заабол хатуу шэрүүн үгэеэ хэлэхэб.

^3-4 Бидэ энэ дэлхэйдэ ажамидаржа байбашье, тулалдаанда хэрэглэдэг буу зэбсэгүүдые хубиингаа ашагта хэрэглэдэггүйбди. Бидэ тэдэ зэбсэгүүдэй хүсэ Бурханай аша туһада хэрэглэнэбди: хэрэмнүүдые һандаргадагбди, ама хэрүүл зогсоодогбди,

⁵ Бурханиие мэдэрхэдэ һаалта болоһон элдэб янзын бэрхэшээлнүүдые усадхадагбди, Христоосой мэдэлдэ оруулхын тула бүхы һанал бодолнуудые эзэлдэгбди.

⁶ Тиигээд Христоосой мэдэлдэ бүрин ороходотнай, Тэрэнэй захяануудые зүршэһэн ябадалнуудыетнай бултыень хорин хэһээжэ байхабди.

⁷ Таанад юумэнүүд тухай гансал гадаада талаарнь тухайлнат. Христоосой мэдэлдэ байнаб гэһэн бата этигэлтэй хүн өөртэйнь тон адляар Христоосой мэдэлдэ бидэнэйшье байһые мэдэрхэ ёһотой.

⁸ Таанадые һандарган хосороохын тула бэшэ, харин һэргээн бодхоохын тула Эзэнэй маанадта үгэһэн эрхэ засаг тухай хэтэрхэй ехээр бахархабашье, би эсэсэй эсэстэ ходо үнэн зүбые хэлэжэ байхаб.

⁹ Тиихэдэ гансал бэшэг соогоо таанадые айлганаб гэжэ бү бодооройгты.

¹⁰ «Павелай бэшэгүүд хатуу, шэрүүн байдаг, харин маанадтай байхадаа тэрэ өөрөө зөөлэн, үгэнүүдыньшье энхэргэн байдаг», – гэжэ таанадай зариман хэлээ.

¹¹ Тиигэжэ хэлэһэн хүнүүд иимэ юумэ ойлгохо ёһотой: таанадтай байхадаашье би бэшэгтээ бэшэһэн зангаараал байхаб.

¹² Өөһэдыгөө магтан танилсуулдаг зонтой бидэ бэеэ зэргэсүүлхэеэ гү, али сасуулхаяа зүрхэлхэгүйбди. Тэдэнэр ямар тэнэгүүд гээшэб! Тэдэнэр өөһэдыгөө өөһэдынгөө хэмжүүрээр хэмжэнэ, өөһэдынгөө зарга шүүбэреэр шүүбэрилнэ.

¹³ Зүгөөр бидэ Бурханай маанадта тогтооһон хэмжээе хэтэрүүлнэгүйгөөр бэеэ магтахабди. Тэрэ тогтоогдоһон хэмжээндэ танай дунда ажаллахамнай баһа оролсоно.

¹⁴ Тиимэһээ Христоос тухай Һайн Мэдээсэлтэй таанадта ерэхэдээ, бидэ маанадай ажаллажа байха ёһотой хилые зүршөөгүй хүмди.

¹⁵ Тиигээд бидэ Бурханай маанадта тогтооһон хилын саана ажаллажа байһан бусад зоной ажалаар һайрханагүйбди. Харин танай һүзэгэй бэхижэхэдэ, таанад Бурханай тогтооһон хэмжээе хэтэрүүлэнгүй маанадые магтахат гэжэ найданабди.

¹⁶ Тиигэжэ бидэ ондоо хүнэй хэһэн ажалаар омогорхонгүй, таанадһаа гадуур бусадшье оронуудаар Һайн Мэдээсэлые номнохо аргатай байхабди.

¹⁷ «Бахархагша нэгэн Эзэнэй бүтээһэн лэ юумээр бахархаг лэ!» – гэжэ Нангин Бэшэг соо бэшээтэй байдаг.

¹⁸ Өөрыгөө магтаһан хүн бэшэ, харин Эзэнэй магтаалда хүртэһэн лэ хүн үнэхөөрөө һайшаагдана.