Коринфынхидтэ 1-дэхи 9 - Библи

Элшэнэрэй эрхэ

¹ Би эрхэ сүлөөтэй хүн бэшэ аалби? Би элшэн бэшэ аалби? Манай Эзэн Иисүүс Христоосые би хараа бэшэ аалби? Таанад Эзэнэй түлөө ажалһанаймни үрэ дүн бэшэ аалта?

² Бусад зон намайе элшэн гэжэ тоолоогүйшье һаа, таанадта би элшэнби, юундэб гэхэдэ, танай Эзэнтэй оршоһон ажамидарал Эзэнэй элшэн байһыемни батална.

³ Хүнүүдэй намайе шүүмжэлхэдэ, би иигэжэ өөрыгөө хамгаалдагби:

⁴ Али хэһэн ажалайнгаа түлөө бидэ эдихэ, ууха эрхэгүй гээшэ гүбди?

⁵ Али бусад элшэнэрые, Эзэнэй дүүнэрые, Пётрые һажаан, һүзэглэгшэ һамгаяа замай хани болгон абажа ябаха эрхэгүй аалди?

⁶ Али гансал Барнааба бидэ хоёр ажамидархын тула ажаллаха ёһотой гүбди?

⁷ Сэрэгшэд өөһэдынгөө түлөө түлэжэ алба хэдэг аал? Али үзэм тарилгашан өөрынгөө сэсэрлигэй үзэмһөө амсадаггүй аал? Һүрэг малаа адуулдаг ямар хүн малайнгаа һүнһөө уудаггүйб?

⁸ Эдэ юрын жэшээнүүдээр би өөрыгөө хизаарлахагүйб, Хуули соошье баһал тиимэ юумэнүүд тухай хэлэгдэнэ.

⁹ «Таряа тээрмэдэжэ байһан сарай эдихэдэнь һаалта бү хэ», – гээд Моисейн Хуули соо бэшээтэй байдаг. Бурхан сарнуудта һанаагаа зобоно гү?

¹⁰ Али үнэндөө бидэниие бодожо хэлэнэ гү? Зүб даа, энэ бидэндэ зорюулан бэшээтэй. Хахалжа, али хадажа байһан алишье хүн хүдэлмэриингөө эсэстэнь хубияа абаха найдалтайгаар лэ ажаллаха ёһотой.

¹¹ Бидэ таанад соо оюун сэдьхэлэй үрэһэ таряабди. Тиигээд харюудань таанадһаа энэ дэлхэйн юумэнүүдые абабалнай буруу хэрэг гү?

¹² Хэрбээ бусад зоной таанадһаа дэмжэлгэ хүлеэхэ эрхэтэй байхадань, бидэ бүришье ехэ эрхэтэй бэшэ аалди? Тиигэбэшье бидэ энэ эрхэеэ хэрэглээгүйбди. Орондонь бидэ Христоос тухай Һайн Мэдээсэл ямаршье уршаг бэрхэшээлгүй тараахын тула бүхы юумые тэсэбэритэйгээр дабанабди.

¹³ Һүмэдэ алба хэгшэдэй Һүмэһөө эдеэ хоолоо олодогые, тиин тахилай газарта ажаллагшадай тахилай юумэнһээ хубаалсажа абадагые таанад мэдэхэгүй аалта?

¹⁴ Тон тиигэжэл номнолгоороо хоолойгоо тэжээжэ байхыень Эзэн Һайн Мэдээсэл номногшодто захираа юм.

¹⁵ Гэхэтэй зэргэ би энэ дурдаһан эрхэнүүдээ нэгэтэшье хэрэглээгүй һэнби, тиин эрхэеэ мэдүүлхын тулашье энэ бүхэниие мүнөө бэшэнэгүйб. Тиигээ һаа, үхэбэлни дээрэ. Хэншье минии хүлһөөрөө олоһон магтаалые хооһон үгэ болгожо шадахагүй.

¹⁶ Тиигээдшье гансал Һайн Мэдээсэлые номножо байһанаараа би омогорхохо эрхэгүйб. Энэ минии уялга мүн. Һайн Мэдээсэлые номноогүй һаа, гай оһол толгой дээрэмни буухал.

¹⁷ Хэрбээ би ажалаа һайн дураараа хэжэ байбал, шагналда хүртэхэ байгааб; гэхэдэ би Бурханай намда даалгаһан албые дүүргэнэб.

¹⁸ Тиихэдээ би ямар шагналда хүртэхэбиб? Түлөөһэгүйгөөр Һайн Мэдээсэл номножо байһамни, номногшынгоо эрхэнүүдые мэдүүлэнгүй ажаллажа байһамни минии шагнал гээшэ.

¹⁹ Эрхэ сүлөөтэй хүн байһан аад, би боломжоороо олон хүнүүдые олохын тула өөрыгөө хүн бүхэнэй барлаг болгооб.

²⁰ Иудейнүүдтэй байхадаа, би иудейнүүдые татахын тула иудейнүүдтэл адляар өөрыгөө абажа ябааб. Би өөрөө Моисейн Хуулиин мэдэлдэ бэшэшье һаа, тэрэ Хуулиин мэдэлдэ байһан хүнүүдые татахын тула өөрөө тэрэ Хуулиин мэдэлдэ байһанда адляар ажамидаржа байгааб.

²¹ Хуулигүй бусад арадуудай дунда байхадаа, би тэдэниие татахын тула Хуулигүй бусад арадай түлөөлэгшэдэл адляар байгааб. Тиихэдээ би Бурханай Хуулиин мэдэлһээ гараагүйб, Христоосой Хуули баримталжа байгааб.

²² Бирагүйхэн һүзэгтэй зоной дунда байхадаа, тэдэниие татахын тула бирагүйхэн һүзэгтэнүүдэй нэгэниинь шэнги болоод ябааб. Хүнүүдэй заримыеньшье шадаха зэргээрээ абархын тула би бүхы хүнүүдтэ бүхы юумэн болооб.

²³ Эдэ бүгэдые би Һайн Мэдээсэлэй түлөө, тэрэнэй адис хэшэгтэ хүртэхын түлөө хэжэ байгааб.

²⁴ Урилдаанда хабаадалсагшадай бултанайнь нэгэниинь лэ шагналда хүртэдэг гэжэ таанад һайн мэдэнэт. Тиимэһээ шагналда хүртэхын тула гүйгты.

²⁵ Урилдагшад мүнхэ оршодоггүй титимээр титимнүүлхын түлөө бултадаа хатуу журам баримталдаг, харин бидэ мүнхэдөө оршодог шагналай түлөө урилданабди.

²⁶ Тиимэһээ би зорилгодоо хүрэхын тула сэхэ гүйнэб, тиимэһээ би хүсэеэ дэмы бууруулдаггүй барилдаашан мэтэ барилданаб.

²⁷ Бусад зондо номножо байгаад, өөрөө хаһуулхагүйн тула бэеэ ехээр һорижо, дадаажа, бүрин мэдэлдээ оруулнаб.