Коринфынхидтэ 1-дэхи 7 - Библи

Гэрлэлгэ тухай

¹ Таанадай намда бэшэһэн юумэн тухай хэлэбэл, эрэ хүнэй һамга абаагүй һаань һайн юм.

² Гэхэтэй сасуу ташаяан хурисалһаа бэеэ һэргылхын тула хүн бүхэн һамгантай байха, эхэнэр хүн нүхэртэй байха ёһотой.

³ Эрэ хүн һамганайнгаа урда өөрынгөө уялга гүйсэд дүүргэхэ албатай, тиин эхэнэршье нүхэрэйнгөө урда өөрынгөө уялга гүйсэд дүүргэхэ албатай.

⁴ Эхэнэр хүн өөрынгөө бэеын эзэн бэшэ, нүхэрынь һамганайнгаа бэеын эзэн гээшэ, тон тиигэжэл эрэ хүн өөрынгөө бэеын эзэн бэшэ, һамганиинь нүхэрэйнгөө бэеын эзэн гээшэ.

⁵ Бэе бэетэйгээ инаглан харилсажа байгты, зальбаржа сагаа үнгэргэхэ гэжэ хоюулан зүбшэһэн сагтаа инаглан харилсахаяа болигты, тиигээд бэеэ барижа шадахагүй байхадатнай сатанагай таанадые хорхойтуулхагүйн тула дахин бэе бэедээ няалдагты.

⁶ Энээниие би таанадта заабаришална бэшэб, харин зүбшөөрэн хэлэнэб.

⁷ Хүн бүхэн намдал адли һамгагүй байһай гэжэ би хүсэнэб, гэхэтэй сасуу хүн бүхэн Бурханһаа өөрын тусгай абьяас бэлигтэй юм, нэгэ хүн иимэ абьяастай, нүгөө хүн тиимэ абьяастай.

⁸ Намдал адли саашадаа гансаараа байбалтнай һайн гэжэ би гэрлээгүй хүнүүдтэ, бэлбэһэн хүнүүдтэ хэлэхэ байнаб.

⁹ Харин тэдэ хүнүүдэй бэеэ бариха аргагүй байбал, гэрлэгты гэжэ хэлэхэб. Хүсэлэнгөөр бэеэ туляахын орондо гэрлэһэниинь дээрэ.

¹⁰ Гэрлэһэн хүнүүдтэ өөрһөө бэшэ, харин Эзэнһээ иимэ заабари буулганаб: эхэнэр хүн нүхэрһөө һалаха ёһогүй.

¹¹ Хэрбээ нүхэрһөө һалабал, дахин хадамда гараха ёһогүй, али үгы һаа, нүхэртэйгөө эблэрхэ ёһотой. Эрэ хүн һамгаяа орхихо ёһогүй.

¹² Бусад зондо өөрһөөн (Эзэнэй заабари бэшэ) хэлэнэб: Христоосто һүзэглэдэг хүн һүзэггүй һамгантай байбал, тэрэ һамганайнь нүхэртэйгөө һууха дуратай байбал, нүхэрынь тэрэ һамгаяа орхихо ёһогүй.

¹³ Тон тиигэжэл Христоосто һүзэглэдэг эхэнэр һүзэггүй нүхэртэй байгаад, тэрэ нүхэрэйнь һамгантайгаа һууха дуратай байбал, тэрэ эхэнэр нүхэрөө орхихо ёһогүй.

¹⁴ Юундэб гэхэдэ, һүзэглэдэггүй эрэ һүзэглэдэг һамганайнгаа ашаар арюудхагдана, тон тиигэжэл һүзэглэдэггүй эхэнэр һүзэглэдэг нүхэрэйнгөө ашаар Бурханай урда арюудхагдана. Тиигээгүй һаа, тэдэнэй үхибүүдынь сэбэр бэшэ байха һэн, үнэндөө болбол тэдэ үхибүүд Бурханай урда арюун сэбэр юм.

¹⁵ Һүзэглэдэггүй хүн һүзэглэдэг ханиһаан һалаха хүсэлтэй байбал, һалаг лэ. Тиимэ ушарта һүзэглэдэг ханинь, эхэнэршье хүн байг, эрэшье хүн байг, дураараа болог. Бурхан бидэниие энхэ тайбан ажамидархымнай түлөө дуудаа юм.

¹⁶ Христоосто һүзэглэдэг эхэнэр, нүхэрөө абарха магадгүй байһанаа ши мэдэнэ гүш? Али Христоосто һүзэглэдэг эрэ, һамганаа абарха магадгүй байһанаа ши мэдэнэ гүш?

¹⁷ Эзэнэй табилангаар хүн бүхэнтнай ажамидаржа байг лэ, Бурханай таанадые дуудахада ямар байгаа һэмта, тиимээрээл үлөөрэйгты. Тиигэжэл би бүхы һүзэглэгшэдэй бүлгэмүүдтэ заабарилдагби.

¹⁸ Бэлгээ отолуулһан хүниие Бурханай дуудабалнь, тэрэ хүн отолуулһан мүрнүүдээ зайлуулха гэжэ бү оролдог, отолуулаагүй хүниие Бурханай дуудабалнь, тэрэ хүн отолуулха ёһогүй.

¹⁹ Отолуулһан байна гү, али отолуулаагүй гү, ямаршье илгаагүй, гансал Бурханай захяа заабаринуудые дүүргэжэ байһаниинь шухала юм.

²⁰ Бурханай таанадые дуудахада ямар байдалтай һэмта, тэрэл хэбээрээ хүн бүхэнтнай үлэхэ ёһотой.

²¹ Бурханай дуудахада барлаг байһан хүн һанаагаа бү зобоорой. Хэрбээ эрхэ сүлөөтэй болохо аргатай байбал, тэрэ арга боломжоёо ашаглаарай.

²² Юундэб гэхэдэ, Эзэнээр дуудуулагдаһан барлаг Эзэнэй эрхэ сүлөөтэй хүниинь гээшэ, тон тиигэжэл Христоосоор дуудуулагдаһан эрхэ сүлөөтэй хүн Тэрэнэй барлагынь гээшэ.

²³ Бурхан таанадые худалдажа абаа, тиимэһээ хүнүүдэй барлагууд бү бологты.

²⁴ Аха дүүнэр, Бурханай таанадые дуудахада ямар байгаа һэмта, тэрэл хэбээрээ хүн бүхэнтнай Бурханай урда үлэхэ ёһотой.

Гэрлээгүй зон

²⁵ Хадамда гараагүй басагадай талаар Эзэнһээ намда ямаршье заабари үгтөөгүй, гэхэтэй сасуу Эзэнэй үршөөл хайраар найдабаритай байһан хубидаа би өөрынгөө һанал бодолоор таанадтай хубаалсаха һанаатайб.

²⁶ Энэ нүхэсэлэй талаар бодоходоо, хүн ямар байгааб, тиигээд лэ байбалнь дээрэ гэжэ бодоноб.

²⁷ Һамгатай һаа, тэрээнһээ һалаха шалтагаан бү бэдэрэ. Һамгагүй һаа, һамга бү бэдэрэ.

²⁸ Һамга абаашье һаа, ши нүгэл шэбэлдэ унахагүйш, хадамгүй басаганшье хадамда гарабал, нүгэл шэбэлдэ унахагүй. Гэрлэһэн хүнүүдтэ үдэр бүхэн бэрхэшээлнүүд тулгардаг юм, тиин би таанадые тэдэ бэрхэшээлнүүдһээ һэргылнэб.

²⁹ Аха дүүнэр, би таанадта иимэ удхатайгаар хэлэнэб: саг багал үлэнэ, тиимэһээ гэрлэһэн хүнүүд гэрлээгүй хүнүүдтэл адли ажамидарха ёһотой.

³⁰ Уйлажа байһан хүнүүд гашуудал амсаагүй хүнүүдтэл адляар, баярлажа байһан хүнүүд жаргал амсаагүй хүнүүдтэл адляар, юумэ худалдажа абаһан хүнүүд зөөри зөөшэгүй хүнүүдтэл адляар ажамидарха ёһотой.

³¹ Энэ дэлхэйн баялигуудые хэрэглэжэ байһан хүнүүд энэ дэлхэйн баялигуудта шуналгүй хүнүүдтэл адляар ажамидарха ёһотой, юундэб гэхэдэ, оршон үеын һүнэхэ сагынь ойртоно.

³² Ямаршье тухашаралгүй амидарһайт гэжэ таанадта хүсэнэб. Гэрлээгүй хүн Эзэндэ һайшаагдаха гэжэ Эзэнэй ажалда бүхы һанал бодолоо хандуулдаг.

³³ Харин гэрлэһэн хүн эхэнэртээ һайшаагдахын тула энэ дэлхэйн юумэнүүдтэ һанаагаа табидаг,

³⁴ тиигэжэ тэрэ хоёр ондоо тээшээ татагдадаг. Хадамда гараагүй эхэнэр гү, али басаган бэеэ, һүнэһэ һүлдэеэ дууһан Эзэндэ зорюулжа, хамаг һаналаа Эзэнэй ажалда хандуулдаг. Харин хадамда гараһан эхэнэр нүхэртөө һайшаагдахын тула энэ дэлхэйн юумэнүүдтэ һаналаа табидаг.

³⁵ Таанадые дарамталха зорилготойгоор бэшэ, харин үнэн зүб ба хэрэгтэй юумые дүүргэжэ, өөһэдыгөө Эзэндэ гүйсэд зорюулан алба хэхыетнай хүсэн, танай аша туһада би эдэ бүгэдые таанадта хэлэнэб.

³⁶ Гэрлэхэб гэжэ үгөө үгэһэн хүн һамганиинь болохо басаганайнгаа энэ наһандаа хадамгүй байхань аягүй гэжэ тоолоод, заабол гэрлэхэ хэрэгтэй гэжэ бодобол, өөрынгөө дураар болог. Һамга абахадаа, тэрэ хүн ямаршье нүгэл хэнэгүй.

³⁷ Харин тиимэ юумэ хэхэ ямаршье хашалтагүйгөөр һамга абахагүйб гэжэ досоогоо хатуугаар шиидэһэн, өөрынгөө хүсэлые гүйсэд мэдэлдээ абаһан, юу хэхэеэ һанаандаа шиидээд байһан эрэ хүндэ һамга абангүй байбалнь һайн юм.

³⁸ Тиимэһээ гэрлэхэ басагаяа һамга абаһан хүн һайн юумэ хэнэ, гэхэтэй сасуу һамга абаагүй хүн бүришье һайн юумэ хэнэ гээшэ.

³⁹ Хадамтай эхэнэр нүхэрэйнгөө элүүр мэндэ байха сагта нүхэртэйгөө холбоотой. Харин нүхэрэйнь нүгшэбэл, тэрэ эхэнэр сүлөөтэй боложо, дуратай хүндөө дахин хадамда гараха эрхэтэй, гэхэтэй сасуу тэрэ хүниинь заабол Христоосто һүзэглэдэг хүн байха ёһотой.

⁴⁰ Хэрбээ тэрэ эхэнэр дахин хадамда гарангүй байбал бүри жаргалтай байха. Энэ миниил һанал юм, гэхэдэ бишье баһа Бурханай Һүлдэтэй байнаб гэжэ өөр тухайгаа бодоноб.