Коринфынхидтэ 1-дэхи 3 - Библи

Һүзэглэгшэдэй бүлгэмэй дотороо хубааралга

¹ Аха дүүнэр, Һүлдэ тогтооһон хүнүүдтэл адляар таанадта хандан хэлэхэ аргагүй байгааб, харин энэ дэлхэйн хүнүүдтэл, Христоосто һүзэглэһэнөөрөө нарай үхибүүд байһан хүнүүдтэл мэтэ хандан хэлээб.

² Таанадай хатуу юумэ эдижэ шадахагүй байһан хада би таанадые һүөөр тэжээгээб. Зүгөөр, мүнөөшье таанад хатуу юумэ эдижэ шадахагүйт.

³ Ушарынь юуб гэхэдэ, таанад үшөөл энэ дэлхэйн хүнүүдэй жама ёһоор ажамидарнат. Бэе бэедээ атаархалдадаг, хоорондоо арсалдадаг байһантнай таанадай энэ дэлхэйн хүнүүдэй заншалаар бэеэ абажа ябадаг энэ дэлхэйн хүнүүд байһыетнай харуулна бэшэ аал?

⁴ Нэгэнтнай «Бидэ Павелые даханабди», нүгөөдэтнай «Бидэ Аполлосые даханабди» гэжэ байхадаа, таанад энэ дэлхэйн хүнүүд бэшэ аалта?

⁵ Эсэсэй эсэстэ Аполлос гэдэгтнай хэн бэ? Тиихэдэ Павел гэдэгтнай хэн бэ? Бидэ таанадай Христоосто һүзэглэхэдэ туһалһан юрэ Бурханай зарасанар гээшэбди. Бидэ Эзэнэй хүн бүхэндэмнай үгэһэн ажалыел бүтээгээбди:

⁶ Би үрэнүүдые тариһан, Аполлос уһалһан, харин Бурхан ургуулһан байгаа.

⁷ Тиимэһээ тариһан, уһалһан хүнүүдынь ямаршье хабаагүй, зүгөөр ургуулһан Бурхан гол шухала юм.

⁸ Тариһан, уһалһан хүнүүдэй хоорондо ямаршье илгаа үгы, Бурхан хүн бүхэниие хэһэн ажалайнь зэргээр шагнаха.

⁹ Бидэ Бурханай түлөө хамтаран ажаллагшад гээшэбди, харин таанад – Бурханай таряалан гээшэт. Тиихэдээ таанад баһа Бурханай барилга гээшэт.

¹⁰ Бурханай намда үгэһэн абьяас бэлиг хэрэглэн, би сэсэн барилгашандал мэтэ барилгын һуури татааб, үшөө ондоо хүн тэрэ һуурин дээрэ байра барина. Гэхэтэй сасуу хүн бүхэн яажа барижа байһанаа анхарха ёһотой.

¹¹ Бурхан гансал Иисүүс Христоосые һуури болгон табяа, тиимэһээ ондоо ямаршье һуури табигдаха аргагүй.

¹² Зарим хүнүүд энэ һуурин дээрэ алта мүнгэ гү, али эрдэни шулуунуудые хэрэглэн бариха; нүгөө зарим хүнүүд модо гү, али үбһэ һолоомо хэрэглэн бариха.

¹³ Тиихэдэ хүн бүхэнэй ажалай шанарынь Христоосой ерэхэ Үдэр мэдэгдэхэ. Тэрэ Үдэр хүн бүхэнэй ажалые гал дүлэн элирүүлхэ, гал дүлэн тэрэниие туршаха, тиигээд бодото шанарыень харуулха.

¹⁴ Һуурин дээрэ баригдаһан, гал дүлые тулажа гараһан хүнэй ажал байбал, барилгашань шагналаа абаха.

¹⁵ Хэрбээ хүнэй ажалынь галда шатабал, тэрэ хүн гарзада орохо, тиигэбэшье тэрэ хүн өөрөө абарагдаха, галда шатахаһаа абарагдаха гэжэ хэлэхэдэ болохо.

¹⁶ Таанад Бурханай һүмэ гээшэт, зосоотнай Бурханай Һүлдэ оршоно гэжэ таанад мэдэхэгүй аалта?

¹⁷ Бурханай һүмэ нангин юм, таанад өөһэдөө Бурханай һүмэ гээшэт. Тиимэһээ Бурханай һүмые һандаргаһан хүн бүхэниие Бурхан хэһээхэ.

¹⁸ Таанад өөһэдыгөө бү мэхэлэгты. Хэрбээ таанадай хэн нэгэн энэ дэлхэйн шатада өөрыгөө сэсэн мэргэнби гэжэ тоолоболнь, үнэндөө сэсэн мэргэн болохын тула тэнэг болохо ёһотой.

¹⁹ Энэ дэлхэйн сэсэн мэргэн гэжэ тоологдодог юумэнүүд Бурханай урда ямаршье удхагүй юумэнүүд юм. «Бурхан мэргэн ухаатайшуулые мэхэ гохоорнь баридаг», – гэжэ Нангин Бэшэг соо бэшээтэй байдаг.

²⁰ «Сэсэн мэргэн хүнүүдэй һанал бодолынь хооһон дэмы гэжэ Эзэн мэдэхэ», – гээд Нангин Бэшэгэй ондоо газартань хэлэгдэнэ.

²¹ Тиимэһээ хэнтнайшье ямар нэгэн бүлгэмэй гэшүүнби гэжэ бү омогорхог, юуб гэбэл, бүхы юумэн таанадай:

²² Павел, Аполлос, Пётр, энэ газар дэлхэй, амин, үхэл, оршон үе, ерээдүй сагшье илгаагүй таанадай,

²³ тиихэдэ таанад Христоосойт, тиин Христоос Бурханай юм.