Коринфынхидтэ 1-дэхи 2 - Библи

Христоос ба хэрээһэн тухай мэдээсэл

¹ Аха дүүнэр, Бурханай гэршэлгые номнохоёо таанадта ерэхэдээ, би уран гоё үгэнүүдые гү, али агууехэ ухаа хэрэглээгүй һэнби.

² Таанадтай байха хаһадаа би Иисүүс Христоосһоо, илангаяа Тэрэнэй хэрээһэн дээрэ үхэһэн ушарһаа бэшэ бүхы юумые мартахань дээрэ гэжэ бодооб.

³ Тиимэһээ таанадта ерэхэдээ, би һуларшаһан, ехэл һүрдэһэн амитан байгааб,

⁴ үгэнүүдээ хэлэхэдээ, номноходоо, би уран үгэнүүдые хэрэглэн идхаагүйб, харин Бурханай Һүлдын һүр хүсэн хэлэһыемни баталан идхажа байгаа.

⁵ Тиимэһээ танай һүзэг хүнүүдэй сэсэн ухаанһаа эхи татана бэшэ, харин Бурханай һүр хүсэн дээрэ һуурижана.

Бурханһаа үгтэһэн сэсэн ухаан

⁶ Зүгөөр сэсэн ухаан тухай мэдээсэлые би һүзэгөөрөө болбосон хүнүүдтэ номнодогби. Гэхэдээ тэрэ сэсэн ухаан энэ дэлхэйн бэшэ, эрхэ засагаа алдадаг энэ дэлхэйе захирагшадай бэшэ.

⁷ Минии номнодог сэсэн ухаан хүнүүдһээ далда хадагалагдаһан Бурханай нюуса ухаан юм, гэхэтэй зэргэ Бурхан манай магтаал солотой байхын тула газар дэлхэйн үшөө бүтээгдээгүй байхада тэрэ ухаа заяагаа юм.

⁸ Тэрэ сэсэн ухаае энэ дэлхэйн захирагшадай нэгэньшье мэдэрээгүй. Хэрбээ мэдэрһэн байбал, тэдэ алдарта Эзэниие саазалхагүй һэн.

⁹ Яаба тиибэшье, Нангин Бэшэг соо иигэжэ бэшээтэй байдаг: «Нэгэшье хүнэй хараагүй, дуулаагүй, тиимэ юумэн болохо гэжэ нэгэшье хүнэй ойндоо оруулаагүй байһан юумые Бурхан Өөртэнь дуратай хүнүүдтэ бэлдээд байна».

¹⁰ Тэрэ нюусаа Бурхан бидэндэ бүхы юумые харадаг, далда байһан Бурханайшье зорилгые харадаг Һүлдынгөө ашаар нээгээ.

¹¹ Гансал зосоомнай оршодог һүлдэ бидэн тухай хамагые мэдэдэг бэшэ аал? Тон тиигэжэл ганса Бурханай Һүлдэ Бурхан тухай хамагые мэдэдэг.

¹² Бидэ энэ дэлхэйн зондол адляар бодомжолхогүйн тула энэ дэлхэйн һүлдые тогтоожо абаагүй хүмди, зүгөөр Бурханай эльгээһэн Һүлдые тогтоожо абаа хүмди, тиимэһээ Бурханай маанадта үршөөһэн бүхы юумые мэдэхэбди.

¹³ Тиимэһээ бидэ хүнүүдэй сэсэн ухаанай һургаһан үгэнүүдээр дуугарнагүйбди, харин Һүлдын һургаһан үгэнүүдээр дуугарнабди. Тиигэжэл бидэ Һүлдые тогтоожо абаһан хүнүүдтэ оюун сэдьхэлэй үнэн зүбые Һүлдын үршөөһэн үгэнүүдээр тайлбарилнабди.

¹⁴ Зүгөөр Һүлдые тогтоожо абаагүй хүн Бурханай Һүлдын үгэһэн абьяас бэлигүүдые абажа шадахагүй. Тиимэ хүн тэдэ абьяас бэлигүүдые ойлгохогүй, тэдэниие ямаршье удхагүй гэжэ тоолохо. Ушарынь юуб гэхэдэ, тэдэ юумэнүүдые гансал оюун сэдьхэлээрээ ойлгожо болохо.

¹⁵ Тиихэдэ Һүлдэтэй хүн ямаршье юумые шүүбэрилхэ аргатай, харин тиимэ хүниие гансал Бурхан шүүбэрилхэ аргатай.

¹⁶ «Эзэнэй һанал бодолые хэн мэдэрээб? Хэн Тэрээндэ заабарилжа байгааб?» гэжэ Нангин Бэшэг соо бэшээтэй байдаг. Гэхэтэй зэргэ бидэ Христоосой һанал бодолые мэдэнэбди.