Коринфынхидтэ 1-дэхи 15 - Библи

Христоос үхэлые илаба

¹ Мүнөө, аха дүүнэр, минии таанадта номноһон, таанадай тогтоожо абаһан, һүзэгэйтнай һуури табиһан Һайн Мэдээсэл таанадта һануулхамни.

² Тэрэнэй ашаар таанад абарагдаат. Минии номноһон Мэдээсэл хатуугаар баримталжа байһан ушарта таанад абарагдабат, үгы юм һаа, дэмы һүзэглэһэн байгаат.

³ Нангин Бэшэг соо уридшалан хэлэгдэһэнэй ёһоор Христоос манай нүгэлэй түлөө үхөө гэһэн эгээн шухала зүйлые би өөрөө тогтоожо абаад, һүүлдэнь таанадта дамжуулааб.

⁴ Тэндэл уридшалан хэлэгдэһэнэй ёһоор Христоос хүдөөлүүлэгдөөд, гурбадахи үдэртөө амидыруулагдаа,

⁵ тиигээд Пётрто, һүүлдэнь арбан хоёр шабинартаа бултандань үзэгдөө.

⁶ Тиигээд Тэрэ табан зуугаад шахуу һүзэглэгшэдтэ нэгэ зэргэ үзэгдөө. Тэдэ һүзэглэгшэдэй олониинь мүнөөшье хүрэтэр амиды мэндэ, харин зариманиинь наһа бараа.

⁷ Тиигээд Тэрэ Яковта, удаань элшэнэртэ бултандань үзэгдөө.

⁸ Хамагай һүүлдэ Тэрэ намдашье үзэгдөө. Би дутуу гараһан үхибүүндэ адли хүнби.

⁹ Элшэнэрэй эгээн «багань» гээшэб, элшэн гэжэ нэрлэгдэхэшье эрхэгүй байгааб, юундэб гэхэдэ, би һүзэглэгшэдэй бүлгэмые хашан мүрдэдэг һэмби.

¹⁰ Гэхэтэй сасуу би Бурханай үршөөл хайраар мүнөөнэй нүхэсэлдэ байнаб, тиин тэрэ үршөөл хайрань дэмы үнгэрөөгүй. Би өөрынгөө хүсэ шадалаар бэшэ, харин досоомни ажаллажа байһан Бурханай үршөөл хайраар бусад элшэнэрһээ үлүү ехэ хүдэлжэ байгааб.

¹¹ Тиимэһээ бишье, тэдэшье, бидэ булта илгаагүй Мэдээсэлые номнонобди, үрэ дүндэнь таанад һүзэглэбэт.

Үхөөд амидырха тухай

¹² Христоос үхөөд амидыруулагдаа гэжэ номноходомнай заримантнай юундэ үхэһэн хүнүүд амидырхагүй гэнэб?

¹³ Хэрбээ үхэһэн хүнэй амидырха аргагүй һаань, Христоосшье амидырхагүй байгаал.

¹⁴ Хэрбээ Христоос үхөөд, амидыраагүй һаа, маанадай номноһон дэмы, таанадай һүзэглэһэн дэмы юм.

¹⁵ Харин үхэһэн хүнүүд амидырдаггүй һаа, бидэ Бурханай Христоосые амидыруулаагүй байхадань амидыруулаа гэжэ хэлэхэдээ, Бурхан тухай худалаар гэршэлһэн болонобди.

¹⁶ Ушарынь юуб гэхэдэ, хэрбээ үхэһэн хүнүүд амидырдаггүй һаа, Христоосшье амидыруулагдаагүй гээшэ.

¹⁷ Хэрбээ Христоосой амидыруулагдаагүй һаа, танай этигэл һүзэг дэмы, таанад нүгэл шэбэлтэйгээ үлэнэт.

¹⁸ Тиихэдээ Христоосто һүзэглөөд үхэһэн хүнүүд баһал хосороо гэжэ ойлгожо болохо.

¹⁹ Хэрбээ бидэ гансал энэ амидаралдаа Христоосто найдажа байбал, бидэ бүхы дэлхэй дээрэ эгээл аза хубигүй зон гээшэбди.

²⁰ Зүгөөр Христоосой үхөөд амидыруулагдаһаниинь үнэн зүб юм. Үхөөд амидыруулагдаха зондо энэнь баталамжа юм.

²¹ Нэгэ хүнөөр дамжан үхэл тудаба, тон тиигэжэл нэгэ хүнөөр дамжан үхэлһөө амидыралга тудаха.

²² Хүнүүд булта Адаамтай холбоотой байһан дээрэһээ яажа үхэдэг бэ, тон тиигэжэл булта Христоостой холбоотой байһан дээрэһээ амидыруулагдаха.

²³ Гэхэдээ хүн бүхэн өөрынгөө ээлжээгээр, хамагай түрүүн Христоос, тиигээд Тэрэнэй ерэхэдэ, бүхы Тэрэнэй хүнүүд амидыруулагдаха.

²⁴ Тиигээд бүхы юумэнэй эсэс ерэхэ, Христоос бүхы хүсэнүүдые, замбуулинай бүхы засаг захиргааниие, засаглагша захирагшадые илаад, хаан түрые Эсэгэ Бурханда барюулха.

²⁵ Христоос бүхы дайсадаа ула дороо оруултараа захирха.

²⁶ Һүүлшынь дайсан болохо үхэл усадхагдаха.

²⁷ «Бурхан ула доронь бүгэдые оруулаа», – гээд Нангин Бэшэг соо хэлэгдэнэ, зүгөөр тэрэ «бүхы юумэнэй» тоодо Христоосой ула доро бүгэдые оруулһан Бурхан Өөрөө ороногүй гэжэ ойлгосотой бэзэ даа.

²⁸ Христоос бүхы юумэнүүдые захирхадаа, бүхы юумые мэдэлдэнь оруулһан Бурханай мэдэлдэ Өөрөө орохо, тиигээд Бурхан хамаг юумые бүрин захиржа байха.

²⁹ Хэрбээ амидыралгын үгы юм һаань, үхэһэн хүнүүдэй түлөө уһаар арюудхуулһан зон яахань гээшэб? Хэрбээ үхэһэн хүнүүдэй юрэдөө амидырдаггүй һаань, яахадаа хүнүүд тэдэнэй түлөө уһаар арюудхуулнаб?

³⁰ Бидэшье юундэ аюул оһолтой үргэлжэ нюураараа туланабибди?

³¹ Аха дүүнэр, би үдэр бүхэн үхэлтэй нюураараа туланаб. Манай Эзэн Иисүүс Христоостой нэгэдэһэн ажамидаралтнай минии омогорхол байһан дээрэһээнь, би энээн тухай айладханаб.

³² Хэрбээ би юрэ хүн шанараараа бодоод, «ан арьяатануудтай» Эфес хотодо тулалдабал, намда ямар аша туһа байгааб? Хэрбээ үхэһэн хүнүүдэй амидырдаггүй һаа, хүнүүдэй хэлээшээр «үглөөдэр үхэхэмнай магадгүй, тиимэһээ мүнөө эдеэлэе, ууял».

³³ Таанад бү эндүүржэ ябагты. «Муу ханинар һайн сэдьхэлтэй хүниие доройтуулдаг».

³⁴ Ой ухаандаа орогты, нүгэл хэхэеэ болигты. Заримантнай Бурханиие мэдэхэгүй, тиин эшэжэ зобожо байхаартнай энээниие хэлэнэб.

Үмхирэн хосордог ба үмхирдэггүй мүнхэ бэе

³⁵ «Яажа үхэһэн хүнүүд амидырдаг бэ? Ямар бэетэй байха бэ?» – гээд хэн нэгэн асуужа магадгүй.

³⁶ Ямар тэнэг гээшэбта! Үрэһэ тарихадашни тэрэ үрэһэншни хосороогүй һаа, амидыран ургахагүйл.

³⁷ Таряа гү, али ямаршьеб ондоо үрэһэ тарихадаа, ши бүтэн ургамал бэшэ, зүгөөр үрэһэ һуулганаш.

³⁸ Харин Бурхан Өөрын дураар тэрэ үрэһэндэ бэе хайрлана, тиин үрэһэ бүхэндэ өөрынь тусхай бэе хайрлана.

³⁹ Бэенүүд ондо ондоо түхэл маягтай: хүнүүд нэгэ түрэлэй бэетэй, амитад ондоо түрэлэй бэетэй, шубууд баһа ондоо бэетэй, загаһад үшөө ондоо бэетэй байдаг.

⁴⁰ Тиихэдэ огторгойн бэенүүд ба газар дэлхэйн бэенүүд байдаг. Газар дэлхэйн бэенүүдэй үзэсхэлэниинь огторгойн бэенүүдэй үзэсхэлэнһээ илгаатай.

⁴¹ Наранай ялалзаан нэгэ, һарын ялалзаан ондоо, одо мүшэдэйшье ялалзаан баһа ондоо, тиихэдэ одо мүшэд бэе бэеһээ баһа толонгоороо илгардаг.

⁴² Тон тиимэл юумэн үхэһэн хүнүүдэй амидырхада болохо: бэе үхэл соо таригдаад амидырхадаа, үмхирдэггүй мүнхэ болохо.

⁴³ Һуулгагдахадаа, тэрэ нэрэ түрэгүй, ахир һула байха, харин амидырхадаа, алдартай, һүр хүсэтэй байха.

⁴⁴ Һуулгагдахадаа, юрэ махабад бэе байгаад, амидырхадаа, оюун сэдьхэлэй бэе байха. Юрэ махабад бэе байбал, оюун сэдьхэлэй бэешье байха.

⁴⁵ «Түрүүшын хүн, Адаам, амитай болоо, харин һүүлшын Адаам ами хайрладаг Һүлдэ юм», – гээд Нангин Бэшэг соо хэлэгдэнэ.

⁴⁶ Анха түрүүн оюун сэдьхэлтэй бэшэ, харин юрэ махабад бэетэй ерэхэ, хожомынь оюун сэдьхэлэй һүлдэтэй ерэхэ.

⁴⁷ Түрүүшын Адаам газар хүрьһэнһөө бүтээгдэһэн газар дэлхэйн хүн юм, харин һүүлшын Адаам тэнгэриһээ юм.

⁴⁸ Газар дэлхэйн хүнүүд газар хүрьһэнһөө бүтээгдэһэн үнөөхи хүндэ адли, харин тэнгэриин хүнүүд тэнгэриһээ ерэһэн нүгөө хүндэ адли.

⁴⁹ Газар хүрьһэнһөө бүтээгдэһэн хүнэй түхэл шанартай ябадагтаал адляар, бидэ баһа Тэнгэриин хүнэй түхэл шанартай ябахалди.

⁵⁰ Махабад бэе шуһан хоёрһоо бүтээгдэһэн юумэн Бурханай хаан түрые залгамжалха аргагүй, үмхиржэ хосордог юумэн үмхирдэггүй мүнхэ юумые залгамжалха аргагүй гэжэл би таанадта хэлэхэ һанаатайб.

^51-52 Зай, би таанадта үнэн зүб нюуса нээнэб: бидэ булта үхэхэгүйбди, гэхэтэй сасуу бүреэгэй һүүлшынхиеэ дуугархада, бидэ булта нюдэнэй сабшаха зуура гэнтэ хубилгагдахабди. Бүреэгэй дуугархада, үхэһэн хүнүүд хэтын хэтэдэ үхэхэгүйгөөр амидыруулагдаха, тиин бидэшье хубилгагдахабди.

⁵³ Тиигэжэ үмхирэн хосордог юумэн үмхирдэггүй мүнхэ боложо хубилха ёһотой, үхэлэй юумэн үхэдэггүй юумэн боложо хубилха ёһотой.

⁵⁴ Үмхирэн хосордог юумэнэй мүнхэ боложо хубилхада, үхэлэй юумэнэй үхэдэггүй боложо хубилхада, «Үхэл хосорбо, илалта туйлагдаба», – гэжэ Нангин Бэшэг соо хэлэгдэһэн юумэн бэелхэ.

⁵⁵ «Ай, Үхэл, илалташни хаанаб? Ай, Үхэл, хадхууршни хаанаб?»

⁵⁶ Үхэлэй хадхуурай хорон нүгэл шэбэл соо, нүгэл шэбэлэй хүсэн Хуули соо.

⁵⁷ Харин манай Эзэн Иисүүс Христоосой ашаар маанадта илалта хайрлаһан Бурханда баяр баясхалан хүргэел!

⁵⁸ Тиимэһээ, инаг хайрата аха дүүнэрни, Эзэнэй түлөө хэһэн ямаршье ажалтнай дэмы бэшэ гэжэ мэдэн, Эзэнэй ажалда өөһэдыгөө бүрин зорюулагты, нугаршагүй, бата хатуу байгты.