Коринфынхидтэ 1-дэхи 12 - Библи

Арюун Һүлдэһөө үгтэһэн абьяас бэлигүүд

¹ Аха дүүнэр, мүнөө Арюун Һүлдэһөө үгтэһэн абьяас бэлигүүд тухай үнэниие таанадта мэдүүлхэ һанаатайб.

² Һүзэглөөгүй байхадатнай таанадые оло дахин төөрюулдэг, дуугүй онгонуудта шүтэхэдэ түлхидэг байгаа гэжэ мэдэнэт.

³ Бурханай Һүлдөөр хүтэлүүлһэн ямаршье хүн: «Иисүүс хараалда хүртэг лэ», – гэхэгүйл, тон тиигэжэл Арюун Һүлдөөр хүтэлүүлһэн хүнһөө ондоо ямаршье хүн: «Иисүүс болбол Эзэн», – гэхэгүйл гэжэ таанадта дуулганаб.

⁴ Оюун сэдьхэлэй абьяас бэлигүүд элдэб янзын байдаг, тиин тэдэниие бултыень гансал Арюун Һүлдэ үршөөдэг.

⁵ Элдэб янзын албанууд бии, гэхэтэй сасуу гансал Эзэндэ алба хэдэг юм.

⁶ Элдэб янзын абьяастайгаар албаяа хэжэ болохо, гэхэтэй сасуу нэгэл Бурхан хүн бүхэндэ тусхай ажал хэхэдэнь абьяас бэлиг хайрладаг.

⁷ Арюун Һүлдэ хүн соо оршоходоо, бултанайл аша туһада ямар нэгэн абьяас бэлигээр элирхэйлэгдэдэг.

⁸ Зарим хүнүүдтэ Һүлдэ сэсэн мэргэн үгэ хайрладаг, нүгөө зариманда тусгай мэдэлгэ хайрладаг.

⁹ Хэһэг хүнүүдтэ Һүлдэ агууехэ һүзэг хайрлана, нүгөө хэһэг хүнүүдтэ үбшэн зониие эмнэхэ хүсэ шадал олгоно.

¹⁰ Тиигээд нэгэ хүнүүдтэ гайхамшагта үйлэ хэрэгүүдые бүтээхэ хүсэ шадал үгэнэ, нүгөөдүүлдэ Бурханай мэдээсэл тайлбарилха абьяас хайрлана, үшөө нүгөөдүүлдэ али мэдээсэл үнэхөөрөө Бурханһааб, али Бурханһаа бэшэ гү гэжэ илгаруулха абьяас олгоно, зарим хүнүүдтэ элдэб янзын танигдахагүй хэлэнүүд дээрэ дуугарха бэлиг хайрлана, үшөө зариманда тэрэ хэлэһэн юумыень тайлбарилжа үгэхэ абьяас олгодог.

¹¹ Эдэ онсо абьяас бэлигүүдые гансал Һүлдэ хүн бүхэндэ Өөрынгөө дураар хайрладаг юм.

¹² Христоос олон эрхэтэнһээ бүридэһэн нэгэ бэедэ адли; бэеын эрхэтэнүүд олоншье һаа, тэдэнэр нэгэ бэе бүрилдүүлдэг.

¹³ Бидэшье булта иудейнүүд гүбди, али бусад арадууд гү, барлагууд гүбди, али эрхэ сүлөөтэй гү, нэгэл Һүлдөөр нэгэ бэе болон уһаар арюудхуулаабди, зүрхэ сэдьхэлдэмнай нэгэл Һүлдэ үгтөө.

¹⁴ Бэешье өөрөө нэгэ эрхэтэнһээ бэшэ, харин олон эрхэтэнүүдһээ бүридэдэг.

¹⁵ «Би гар бэшэб, тиимэһээ бэедэ ямаршье хамаагүйб», – гэжэ хүлэй хэлэбэшье, тэрэ бэеын эрхэтэн байхаяа болихо аал?

¹⁶ «Би нюдэн бэшэб, тиимэһээ бэедэ ямаршье хамаагүйб», – гэжэ шэхэнэй хэлэбэшье, тэрэ бэеын эрхэтэн байхаяа болихо аал?

¹⁷ Хэрбээ бүхы бэе ганса нюдэн байбал, тэрэ яажа дуулаха байгааб? Хэрбээ бүхы бэе ганса шэхэн байбал, тэрэ яажа юумэ үнэрдэхэ байгааб?

¹⁸ Гэхэтэй зэргэ Бурхан бүхы эрхэтэнүүдые бэе соо Өөрынгөө дураар байрлуулаа.

¹⁹ Хэрбээ булта нэгэ адли эрхэтэн байбал, бэе байхагүй һэн.

²⁰ Харин олон эрхэтэн, гэхэдээ нэгэ бэе байна.

²¹ Тиимэһээ нюдэн «Ши намда хэрэггүйш» гэжэ гарта хэлэхэ аргагүй, али үгы һаа, толгой «Ши намда хэрэггүйш» гэжэ хүлдэ хэлэхэ аргагүй.

²² Ахир һула гэжэ һанагдадаг эрхэтэд бидэндэ бүришье хэрэгтэй байдаг.

²³ Тиимэ хүндэгүй гэжэ тоолодог эрхэтэнүүдые бидэ бүри ехээр анхардагбди, тиихэдэ эшхэбтэр гэжэ тоолодог эрхэтэнүүдые тусхайгаар анхардагбди.

²⁴ Бэеымнай зохид гэжэ һанагдадаг эрхэтэнүүд тусхай анхарал татадаггүй. Бурхан бэеыемнай зохёоходоо, нэрэ хүндэгүй эрхэтэнүүдтэ хамагһаа үлүү хүндэтхэл үзүүлэн бүтээгээ юм.

²⁵ Тиимэһээл бэе соо ямаршье илгарал хубаарал үгы, харин олон янзын эрхэтэнүүд бултадаа бэе бэеэ анхаржа байха ёһотой.

²⁶ Тиигээд лэ нэгэ эрхэтэнэй зобоходо, нүгөө эрхэтэд бултадаа зободог, нэгэ эрхэтэнэй магтуулхада, бусад эрхэтэд бултадаа баярладаг.

²⁷ Таанад булта Христоосой бэе гээшэт, харин ганса гансаараа Тэрэнэй эрхэтэд гээшэт.

²⁸ Һүзэглэгшэдэй бүлгэм соо Бурхан хүн бүхэниие байрадань байлгаба: анха түрүүн, элшэнэрые, хоёрдохи һуурида Бурханай мэдээсэл элирүүлэгшэдые, гурбадахи һуурида һургагшадые, тиигээд гайхамшагта үйлэ хэрэгүүдые бүтээдэг зониие, хойноһоонь үбшэн хүнүүдые аргалан эдэгээдэг, бусад зондо туһалдаг, бусадые ударидадаг, элдэб танигдахагүй хэлэн дээрэ дуугардаг абьяастай хүнүүдые табяа.

²⁹ Тэдэнэр бултадаа элшэнэр, али Бурханай мэдээсэл элирүүлэгшэд, али һургагшад бэшэ. Хүн бүхэн гайхамшагта үйлэ хэрэгүүдые бүтээдэггүй,

³⁰ тон тиигэжэл хүн бүхэн үбшэнүүдһээ аргалха абьяастай байдаггүй, элдэб танигдахагүй хэлэнүүд дээрэ дуугардаггүй, тэрэ хэлэһэн юумэнүүдыень тайлбарилдаггүй.

³¹ Тиимэһээ таанад бүришье агууехэ абьяас бэлигүүдтэ хүртэхые хүсэжэ байгты. Харин мүнөө би таанадта эрхим һайн зам харуулхаб.