Коринфынхидтэ 1-дэхи 11 - Библи

¹ Христоосые һажаажа байһандамни адли, таанад намайе һажаажа байгты.

Бурхан бүхы юумэнэй толгойлогшо мүн

² Намайе ходо һанажа, дамжуулһан һургаалнуудыемни баримталжа байһанайтнай түлөө би таанадые магтанаб.

³ Христоос бүхы эрэшүүлэй толгойлогшо, нүхэр һамганайнгаа толгойлогшо, тиин Бурхан Христоосой толгойлогшо байһые ойлгоһойт гэжэ хүсэнэб.

⁴ Тиимэһээ толгойгоо хушаад зальбарһан, али үгы һаа, Бурханай мэдээсэл элирүүлһэн алишье эрэ толгойгоо гутаана.

⁵ Толгойгоо хушангүй зальбарһан, али үгы һаа, Бурханай мэдээсэл элирүүлһэн алишье эхэнэр толгойгоо гутаана, юундэб гэхэдэ, тиимэ эхэнэрэй ба үһэеэ хюһаһан эхэнэрэй хоорондо ямаршье илгаа үгы юм.

⁶ Толгойгоо хушаха дурагүй эхэнэр үһэеэ хюһажа хаяг. Тиигэжэ эхэнэр тайрагдаһан үһэтэй, али хюһагдаһан толгойтой ябахаяа эшэбэл, толгойгоо юумээр хушаг лэ.

⁷ Эрэ хүн Бурханай дүрэ алдар һаргажа байгаа хадаа толгойгоо хушангүй ябаха эрхэтэй. Тиихэдэ эхэнэр хүн нүхэрэйнгөө алдар һаргана.

⁸ Юундэб гэхэдэ, эрэ хүн эхэнэрһээ бүтээгдээгүй, харин эхэнэр хүн эрэ хүнһөө бүтээгдээ.

⁹ Тиихэдэ эрэ хүн эхэнэрэй тула бэшэ, харин эхэнэр хүн эрэ хүнэй тулада бүтээгдээ.

¹⁰ Энэ ушарһаа, үшөө тиихэдэ Эльгээмэлнүүдһээ боложо эхэнэр хүн толгой дээрээ эрхэ засагай тэмдэгтэй байха ёһотой.

¹¹ Эзэнтэй нэгэдэһэн манай ажамидаралда эхэнэр хүн эрэ хүнһөө дулдыдана, эрэ хүн эхэнэр хүнһөө дулдыдана.

¹² Ушарынь юуб гэхэдэ, яажа эхэнэр хүн эрэ хүнһөө бүтээгдэһэн байгааб, тон тиигэжэл эрэ хүн эхэнэр хүнһөө түрэдэг, тиин бүхы юумэн Бурханһаа юм.

¹³ Өөһэдөө бодожо үзыт, олон зоной дунда эхэнэр хүнэй толгойгоо хушангүй Бурханда зальбархань зохид аал?

¹⁴ Эрэ хүн ута үһэ табихадаа, өөрыгөө гутаадаг гэжэ оршолон һургана бэшэ аал?

¹⁵ Харин ута үһэн эхэнэрэй гоёолтонь болоно, толгойгоо хушахынь тула үгтэнэ.

¹⁶ Хэн нэгэнэй энэ асуудалаар арсалдаха һанаатай байбал, бидэшье, Бурханай һүзэглэгшэдэй бүлгэмшье ондоо тиимэ ёһо заншал үгы юм гэжэ хэлэхэб.

Үдэшын хоол

¹⁷ Мүргэлдэ суглархадаа, таанад аша туһа хүргэхын орондо хоро хүргэнэт, тиимэһээ саашадахи заабаринуудые үгэхэдөө, би таанадые магтахагүйб.

¹⁸ Нэн түрүүн, танай бүлгэм суглархадаа, хоорондоо хубаарана гэжэ би дуулааб, нэгэ талаараа тиимэл байха гэжэ би бодоноб.

¹⁹ Зүб, үнэн бодото хүнүүдэй элирүүлэгдэхын тула таанадай дунда элдэб һанал бодолнууд байха ёһотой.

²⁰ Тиигэжэ бүлгэмөөрөө суглархадаа, таанад Эзэнэй Үдэшын хоол тэмдэглэнэгүйт.

²¹ Юундэб гэхэдэ, хүн бүхэнтнай бусадһаа түрүүн эдеэ хоолоо барина, тиимэһээ заримантнай үлэн хооһон үлэнэ, нүгөө заримантнай амаараа гаратар эдеэлээд, мэдээгээ алдатараа ууна.

²² Таанад эдижэ, уужа байхаар гэргүй юм гүт? Али таанад Бурханай һүзэглэгшэдэй бүлгэмые тоонгүй, дуталдаһан зониие доромжолно гүт? Энээн тухай юу гэхыемни хүлеэнэбта? Таанадые магтаха ёһотой гүб? Үгы даа, энээнэй түлөө магтахагүйб!

²³ Би Эзэнһээ абаһан һургаалаа таанадта дамжуулһан байгааб: Эзэн Иисүүстэ урбаһан һүни Тэрэ хилээмэ абаад,

²⁴ Бурханда баяр баясхалан хүргөөд, хилээмэеэ хухалаад: «Энэ танай түлөө үргэл болохо бэемни гээшэ. Намайе дурсан энээниие эдижэ байгаарайгты», – гэжэ хэлээ.

²⁵ Һүүлээрнь аяга абаад: «Энэ аяга болбол Минии шуһаар баталагдаһан Бурханай шэнэ хэлсээн гээшэ. Ямаршье сагта уухадаа, Минии дурасхаалда уужа байгаарайт», – гэжэ хэлээ.

²⁶ Энэ хилээмэ эдихэ, энэ аягаһаа ууха бүхэндөө таанад Эзэнэй ерэтэр Тэрэнэй үхэл тухай айладхажа байнат.

²⁷ Эзэнэй хилээмэ эдихэдээ, аягаһаань уухадаа, өөрыгөө доогуур абажа ябаһан хүн Эзэнэй бэеын ба шуһанай урда зэмэтэй байха.

²⁸ Тиимэһээ хүн бүхэнтнай түрүүн өөрыгөө шалгаг, тэрэнэй һүүлдэ хилээмэнһээ эдижэ, аягаһаа ууг.

²⁹ Хилээмэнһээ эдихэдээ, аягаһаа уухадаа, Эзэнэй бэеын удха мэдэрээгүй һаа, таанад эдиһэн, ууһанаараа өөһэдыгөө гэмнэнэт.

³⁰ Тиимэ ушарһаа олонтнай үбшэн ядуу, ахир һула байна, заримантнай үхэбэ.

³¹ Хэрбээ бидэ түрүүн өөһэдыгөө шалгабал, Бурханай заргада орохогүй байгаабди.

³² Харин бидэ Эзэнэй заргада ороод, хэһээлтэдэнь хүртэжэ байнабди, тиимэһээ энэ дэлхэйн зоноор хамта зэмэлэгдэхэгүйбди.

³³ Тиимэһээ, аха дүүнэрни, Эзэнэй Үдэшын хоолдо суглархадаа, бэе бэеэ хүлеэжэ байгты.

³⁴ Суглархадаа, Бурханай заргада орохогүйнтнай тулада үлэн хооһон байһан зонтнай гэртээ эдеэлжэ байг. Бусад асуудалнуудые таанадта ерэхэдээ тайлбарилжа үгэхэб.