Колоссынхидтэ 3 - Библи

Христоостой нэгэдэн шэнээр ажамидаралга

¹ Таанад Христоостой амидыруулагдаһан хадаа Бурханай баруун талада хаан шэрээдэ һууһан Христоосой оршодог тэнгэридэхи юумэнүүдтэ зүдхэгты.

² Эндэ, газар дэлхэйдэ байһан юумэнүүдтэ бэшэ, харин тэндэ, тэнгэридэ байһан юумэнүүдтэ һаналаа табижа байгты.

³ Таанад Христоостой үхэһэн байгаат, тиимэһээ аминтнай Бурханай урда Христоостой хамта хоргодуулагдаад байна.

⁴ Танай бодото амидарал болбол Христоос гээшэ, тиин Тэрэнэй ерэхэдэ, таанадшье Тэрээнтэй хамта алдартань хүртэлсэн ерэхэт.

⁵ Таанад досоотнай хүдэлдэг дэлхэйн хүсэлэнгүүдые: эрэдээ гү, али эхэнэртээ урбалта, забхайралга, шунал, нүгэлтэ хүсэлэнгүүд, онгонуудта шүтэхэтэй сасуулагдама хомхойрол гэхэ мэтын юумэнүүдые һүнөөхэ ёһотойт.

⁶ Тиимэ юумэнүүдые үйлэдэдэг, мэдэлдэнь ородоггүй хүнүүдые Бурхан хэһээхэ.

⁷ Таанад өөһэдөөшье тэдэ зоной дунда амидаржа байхадаа тиимэ хүсэлэнгүүдэй мэдэлдэ байгаат.

⁸ Харин мүнөө таанад уурлахаяа, галзуугаар сухалдахаяа, хорлохоёо, Бурханиие муушалхаяа, муухай үгэнүүдые хэлэхэеэ, эдэ мэтын муухай юумэнүүдые үйлэдэхэеэ болигты.

⁹ Бэе бэедээ худал юумэ хэлэхэеэ болигты, таанад урданайгаа ажамидаралые заншалнуудтайнь хамта орхёо гээшэт.

¹⁰ Таанад шэнэ хүнүүд болобот. Таанадта Өөрыгөө бүрин мэдүүлхын тула Бурхан, Бүтээгшэ тиимэ хүнүүдые бүрил Өөртөө адли болгон шэнэдхэдэг.

¹¹ Эсэстээ грегүүдэй болон иудейнүүдэй хоорондо, отолуулһан болон отолуулаагүй хүнүүдэй хоорондо, хариин болон зэрлиг зоной хоорондо, барлагуудай болон сүлөөтэй хүнүүдэй хоорондо ямаршье илгаа үгы юм, гансал Христоос бии, тиин бүхы юумэн Христоос, бүхы юумэн соо Христоос байха.

¹² Таанад гэгээн хүнүүд гээшэт. Бурхан таанадта дуратай, таанадые Өөртөө шэлэжэ абаа. Тиимэһээ таанад бэе бэеэ хайрлажа, бэе бэедээ һайнаар хандажа байгты, номгон, даруу зантай, тэсэбэритэй байгты.

¹³ Таанад бэе бэеэ ойлгожо байгты, тиимэһээ хэн нэгэнэйтнай нүгөөдэдөө гомдолтой байбалнь, гомдохооһон хүнөө хүлисэжэ байгты. Эзэнэй таанадые хүлисэһэндэл адли таанад бэе бэеэ хүлисэжэ байха ёһотойт.

¹⁴ Энээнһээ гадна үшөө бэе бэедээ дуратай байгты. Хайра дуран бүхы һүзэглэгшэдые холбодог, тиигэжэ тэдэнэр бодотоор нэгэдэдэг юм.

¹⁵ Христоосой хайрлажа байһан энхэ тайбан таанадай зүрхэ сэдьхэлые хүтэлжэ байг лэ. Бурхан энхэ тайбанай тулада таанадые дуудажа, нэгэ бэе болгон нэгэдхээ. Үргэлжэ баяр хүргэжэ байгты.

¹⁶ Христоосой һургаал ажамидаралайтнай гол хүтэлэгшэнь болог лэ. Бэе бэеэ ухаатайгаар, бодомжотойгоор һургажа, заабарилжа байгты. Бурханда баяр хүргэн, псаломууд, магтаалнууд, арюун нангин дуунуудые дуулажа байгты.

¹⁷ Ямаршье юумые Эзэн Иисүүсэй нэрэ алдарай түлөө хэжэ, али хэлэжэ байгты, Тэрэнээр дамжуулан Эсэгэ Бурхандаа баяр хүргэгты.

Шэнэ ажамидаралдаа сахиха зарим дүримүүд

¹⁸ Эхэнэрнүүд, үбгэдэйнгөө эрхэ мэдэлдэ байгты. Эзэндэ һүзэглэдэг зон тиигэжэл өөһэдыгөө абажа ябаха ёһотой.

¹⁹ Эрэшүүл, һамгадтаа дуратай байгты. Тэдээндээ шэрүүнээр бү хандагты.

²⁰ Үхибүүд, эхэ эсэгынгээ үгэ ходо дуулажа ябагты. Эзэн тиимэ ябадалые һайшаадаг.

²¹ Эсэгэнэр, үхибүүдэйнгээ сухалыень бү хүргэгты, тиигэбэлтнай тэдэтнай урмаа хухарха.

²² Барлагууд, эзэдэйнгээ үгэ ходо дуулагты. Билдагуушадтал адли эзэдэйнгээ гансал хаража байхадань бэшэ, харин тэдээндэ һайшаагдаха юумэ гэнэн зүрхэнһөөн, Бурханда һүгэдэн, ходо хэжэ байгты.

²³ Ямаршье юумэ хэхэдээ, эзэдынгээ магтаалда хүртэхын тула бэшэ, харин Эзэнэй һайшаалда хүртэхын тула үнэн зүрхэнһөө зүдхэжэ байгаарайт.

²⁴ Эзэнэй Өөрынгөө хүнүүдтэ бэлдээд байһан юумые Тэрээнһээ залгамжалан абахат гэжэ мэдэжэ байгты. Таанад бодото Эзэн Христоосто алба хэнэ гээшэт.

²⁵ Гэмтэ юумэ хэһэн хүн бүхэн өөрынгөө буруугай зэргээр лэ абаха. Бурхан хүн бүхэниие нэрэ түрөөрнь бэшэ, харин үйлэ хэрэгүүдээрнь лэ шиидхэдэг юм.