Колоссынхидтэ 2 - Библи

¹ Таанадай, Лаодики хотынхидой болон намайе нюураарни танихагүйшье хүнүүдэй түлөө эршэтэйгээр минии ажаллажа байһан тухай мэдэжэ байхыетнай хүсэнэб.

² Тэдэниие урмашуулхын, хайра дураарнь нэгэдүүлхын тула, үнэн зүб ойлгосо үгэдэг баталаатай баялигаар элбэг байлгахын тула би тиигэжэ хүдэлнэб. Тиигэжэл тэдэ зон Бурханай нюусые, Христоосые мэдэхэ.

³ Христоос болбол Бурханай мэргэн ухаанай болон мэдэрэлгын баялигые нээхэ түлхюур юм.

⁴ Хэдышье һайн гэжэ һанагдаһан хуурмаг үгэнүүдээр таанадые хэнэйшье хорхойтуулхагүйн, һамааруулхагүйн тула эдэ бүгэдые хэлэжэ байнаб.

⁵ Би бэеэрээ таанадай хажууда байгаашьегүй һаа, һанал бодолоороо таанадтай хамта байнаб, тиин Христоосто этигэһэн һүзэгэйтнай бата хатуу байһыень, хоорондоо эбтэй эетэй байхыетнай хараад баясанаб.

Христоос жэнхэни ажамидарал үршөөнэ

⁶ Христоос Иисүүсые Эзэн гэжэ тооложо байһандаал адли Тэрээнтэй хамта ажамидаржа байгты.

⁷ Таанадые һургаһан ёһоор Тэрээн соо үндэһэеэ гүнзэгы табигты, Тэрэниие һуури болгон ажамидаралаа зохёогты, бүри ехээр Тэрээндэ һүзэглэжэ байгты. Тиигэхэтэйгээ сасуу Бурханда ходо баяр хүргэжэ байгты.

⁸ Христоосһоо бэшэ, харин замбуулиниие захирһан хүсэнүүдһээ, хүнүүдэй хөөрэдэг үльгэрнүүдһээ эхи абадаг дэмы хооһон, хуурмаг үгэнүүдэй эльбэдэ абтаад, богоолшолуулхаһаа һэргылэгты.

⁹ Христоосой бэе соо Бурханай бүхы шанарнууд бүрин оршоно.

¹⁰ Тэрээнтэй нэгэдэхэдээ, таанадайшье ажамидарал эрхим түгэс шанартай болоо. Христоос ямаршье засаглагшадһаа, захирагшадһаа дээгүүр юм.

¹¹ Христоостой нэгэдэхэдээ, таанад отолуулһан байгаат, зүгөөр хүнүүдэй отолуулдаг аргаар бэшэ, харин Христоосоор отолуулһан байгаат. Энэ отолуулга таанадые нүгэлтэ хэрэгүүдые хүүлэдэг заншалнуудһаатнай сүлөөлһэн удхатай.

¹² Таанад уһаар арюудхагдахадаа, Христоостой хамта үхөөт, тиихэдээл Тэрэниие амидыруулһан Бурханай хүсэндэ этигэжэ, Христоостой хамта амидыруулагдаат.

¹³ Таанад нүгэл хэдэг, отолуулаагүй, Бурханай хүнүүд бэшэ байһан дээрэһээ урдань үхэһэн хүнүүдтэл адли байгаат. Харин Бурхан таанадые мүнөө Христоостой хамта амидыруулаа. Бурхан бидэнэй бүхы нүгэлнүүдые хүлисөө.

¹⁴ Нүгэлнүүднай маанадые Бурханда үритэйшүүл болгоо. Хуулиин ёһоор бидэнэй түлэхэ ёһотой үри шэриин тэмдэглэлнүүдые Тэрэ арилгаба. Манай үри шэри ба нүгэлнүүдые Тэрэ хэрээһэн дээрэ саазалуулагдан түлэбэ.

¹⁵ Тиигэжэ Христоосой ашаар Бурхан захирагша ба засаглагша хүсэнүүдые дараа, тиигээд илалта туйлахадаа, тэдэ хүсэнүүдые баряанда абтаһан зондол адляар бүхы арадай урда ябуулаа.

¹⁶ Иигэхэдээ эдижэ, уужа байһан юумэнһээтнай боложо гү, али ямар нэгэн һайндэрэй, Шэнэ Һарын һайндэрэй гү, али субботын үдэрэй түлөө хэншье таанадые бү зэмэлэг.

¹⁷ Тэдэ юумэнүүд ерээдүй алдарай – Христоосой бэеын – һүүдэрынь лэ гээшэ.

¹⁸ Үзэл үзэдэг хадаа бусад хүнүүдһээ дээгүүрби гэдэг хүнүүд, даруу зантай байһан хэбэр үзүүлдэг хүнүүд, Эльгээмэлнүүдтэ шүтэдэг хүнүүд шагналыетнай бү буляаг лэ. Тиимэ хүнүүд ехэ ухаатайб гэжэ дэмы һайрхана. Үнэндөө тэдэнэр тэнэгүүд юм.

¹⁹ Тэдэнэр бэеын толгой болохо Христоосто найданагүй. Гэхэтэй сасуу бэе толгойн, Христоосой хиналта доро ургажа, Тэрэнэй бүридэл болон барисаагаар холбогдуулан эблэрэн, Бурханайл дураар ургадаг юм.

^20-21 Таанад Христоостой үхөөд, энэ замбуулиниие захирһан хүсэнүүдһээ сүлөөлэгдэбэт. Тиихэдээ яагаад таанад энэ дэлхэйн харьяалда байһандал адли ажамидарна гээшэбта? Яагаад таанад: «Гар бү хүрэ», «Амтыень бү үзэ», «Барижа бү үзэ» гэхэ мэтын тогтоолнуудые сахина гээшэбта?

²² Тэрэ мэтын юумэнүүд хэрэглэгдэһэнэйнгээ һүүлээр хэрэггүй болодог. Эдэ тогтоолнууд хүнүүдэйл зохёоһон дүримүүд ба һургаалнууд гээшэ.

²³ Тиимэ тогтоолнуудые баримталхада сэсэн юумэ хэһэнтэйл адляар бодогдодог. Гэхэтэй сасуу Бурханда бүри ехээр дуратай, даруу зантай, бэеэ баридаг болоһон шэнги байдаг. Үнэндээ тэдэ тогтоолнууд хүнэй хүсэлэнгүүдые мэдэлдээ абаха аргагүй.