Колоссынхидтэ 1 - Библи

Амаршалга

^1-2 Аха дүүнэр, Иисүүс Христоостой нэгэдэһэн Колоссы хотын һүзэгтэй Бурханай хүнүүд, Бурханай эрхэ мэдэлээр Христоос Иисүүсэй элшэн болоһон би Павел ба манай дүү Тимофей таанадые амаршалнабди. Бурхан Эсэгэһээ таанадта үршөөл хайра ба амгалан тайбаниие айладханабди.

Павел баясхалан хүргэн зальбарна

^3-4 Иисүүс Христоосто этигэдэг, Бурханай бүхы зондо дуратай байдаг тухайтнай бидэ дуулаа һэмди. Тиимэһээ та бүхэнэй түлөө зальбархадаа, бидэ Эзэн Иисүүс Христоосой Эсэгэ Бурханда ходо баясхалан хүргэжэ байдагбди.

⁵ Үнэн зүб үгые, Һайн Мэдээсэлые анхан таанадта номноходомнай, таанад найдалга тухай дуулаа һэнта. Бурханай тэнгэри дээрэ бэлдээд байһан юумэндэ найдажа байһан дээрэһээ таанад һүзэглэнэт, дуратай байнат.

⁶ Һайн Мэдээсэл бүхы замби түбеэр һайнаар дэлгэржэ, үрэ дүн асаржа байна. Бурханай буян хэшэг тухай анха дуулаад, үнэн ушарынь мэдэхэдэтнай тэрэ таанадай дунда баһа һайнаар дэлгэржэ байгаа.

⁷ Бидэнтэй хамта хүдэлдэг, бидэнэй аша туһада Христоосто этигэл найдалтайгаар алба хэдэг инаг хайрата Эпапраасһаа Бурханай үршөөл хайра тухай мэдээт.

⁸ Таанадта үгэжэ байһан Арюун Һүлдын хайра дуран тухай тэрэ бидэндэ дуулгаа.

⁹ Тиимэһээ бидэ таанад тухай дуулаһан үдэрһөө эхилжэ үргэлжэ таанадай түлөө зальбарнабди. Һүлдын үгэдэг гүн ухаан, ойлгосо таанадтай байха тухайнь, тиигэхэдэ Бурханай дура хүсэлөө таанадта харуулжа байха тухайнь бидэ Бурханиие гуйдагбди.

¹⁰ Тиигэбэл таанад Эзэнэй хүсэһэн ёһоор ажамидаржа, Тэрээндэ һайшаагдаха юумые хэжэ байхат. Таанад дэмбэрэлтэй хэрэгүүдые бүтээжэ, Бурханиие бүрил һайн мэдэрдэг болохо һэнта.

^11-12 Тэрэнэй алдарта хүсэ шадалаар бэхижэн, таанад аргагүй ехэ тэнхээ тэсэбэритэй болохот. Тиимэһээ тэнгэриин гэрэл туяада Өөрынгөө һунгаһан хүнүүдтэ бэлдээд байһан юумые хубаалсаха эрхэ таанадта үгэһэн Эсэгэ Бурхандаа баяртайгаар баясхалан хүргэгты.

Христоос ба Тэрэнэй ажал

¹³ Бурхан бидэниие харанхы мунхагай хүсэнһөө аршалжа, инаг хайрата Хүбүүнэйнгээ эрхэ засагта оруулаа.

¹⁴ Тэрэ Хүбүүниинь бидэнэй нүгэлнүүдые хүлисөөд, бидэниие эрхэ сүлөөтэй болгоо.

¹⁵ Харагдадаггүй Бурханиие бидэ Христоос соо хараха аргатайбди. Христоос Бурханай ууган Хүбүүн мүн, Тэрэ бүтээгдэһэн бүхы юумэнэй дээгүүр юм.

¹⁶ Газар дэлхэй, тэнгэри огторгой дээрэхи харагдадагшье, харагдадаггүйшье юумэнүүдые, тэдэнэй тоодо хаануудые, эзэдые, засаглагшадые, захирагшадые Бурхан Тэрэнэй ашаар бүтээгээ. Бүхы юумые Тэрэнэй ашаар, бүхы юумые Тэрэнэй тулада Бурхан бүтээгээ.

¹⁷ Бүхы юумэнүүдэй бүтээгдэхэһээ урда Христоос байгаа, тиимэһээл Тэрэнэй ашаар бүхы юумэн оршоно.

¹⁸ Тэрэ һүзэглэгшэдэй бүлгэмэй толгойнь юм, һүзэглэгшэдэй бүлгэм Тэрэнэй бэень юм. Тэрэ тус бэеын амидаралай эхин болоно. Бүхы юумэнүүдэй дээгүүр байхын тула Тэрэ ууган Хүбүүн үхөөд, хамагай түрүүндэ амидыруулагдаа. Тэрэ хамаг юумэнэй түрүүндэ юм.

¹⁹ Бурхан бүхы шанарнуудаа Хүбүүндээ шэнгээхэ дуратайл байгаа.

²⁰ Хүбүүнэйнгээ ашаар бүхы юртэмсэтэй Бурхан эблэрхэ һанаатай байгаа. Хэрээһэндэ хадуулаад үхэһэн Хүбүүнэйнгээ шуһаар Бурхан энхэ тайбаниие тогтоожо, газар дэлхэй болон тэнгэри огторгой дээрэхи бүхы юумэнүүдтэй эбээ нэгэдхүүлээ.

²¹ Нүгэлтэ юумэнүүдые һанаашалжа, үйлэдэжэ байһан дээрэһээ хэзээ нэгэн сагта таанад Бурханһаа холо байгаат, Тэрэнэй дайсадынь байгаат.

²² Харин мүнөө Өөрынгөө урда таанадые нангин, арюун сэбэр, гэмгүй байлгахын тула Хүбүүнэйнгээ үхэлөөр Бурхан таанадтай эбээ нэгэдхүүлбэ.

²³ Тиимэһээ таанад хатуу ба сухаришагүй һүзэглэжэ байха ёһотойт, Һайн Мэдээсэлые шагнажа этигэһэн найдабарияа алдаха ёһогүйт. Ушарынь юуб гэхэдэ, би Павел газар дэлхэй дээрэ бүхы амитадта номногдоһон тэрэ Һайн Мэдээсэлэй зарасань болооб.

Һүзэглэгшэдэй бүлгэмэй албатан Павелай ажал

²⁴ Мүнөө би таанадай түлөө зоболон эдлэжэ байхадаа жаргалтай байнаб, ушарынь ямар бэ гэхэдэ, Христоосой бэень болохо һүзэглэгшэдэй бүлгэмэй түлөө би Христоостол адляар зобоноб, тиихэдээ дутуу зоболонгуудые хүсэлдүүлжэ байнаб.

^25-26 Бурхан намайе һүзэглэгшэдэй бүлгэмэй алба хэгшээр табяад, таанадай һайн һайханай түлөө Бурханай үгые гүйсэд номнохо ажал даалгаа. Тэрэ Бурханай үгэ үнгэрһэн үе сагта хүн түрэлхитэнһөө далда байгаа, харин мүнөө Бурханай зондо элирхэйлэгдээ.

²⁷ Энэ нюусаяа Бурхан Өөрынгөө хүнүүдтэ мэдүүлхэ гэжэ түсэблэнэ, гэхэтэй сасуу энэ үнэтэй ба алдарта нюусань бүхы хүнүүдтэ юм. Тэрэ нюусань – Христоос таанадай досоо гэһэн удхатай, таанад Бурханай алдарые хубаалсахат гэһэн удхатай.

²⁸ Тиимэһээ бидэ Христоосые хүн бүхэндэ номнонобди. Иисүүс Христоостой нэгэдэһэн хүн бүхэниие Бурханай урда байлгахын тула бидэ бүхы ухаан бодолоороо тэдэниие һурганабди, идханабди.

²⁹ Тэрэ бүхэнэй тулада би Христоосой үгэжэ байһан, минии зосоо ажаллажа байһан агуу хүсые ашаглан оролдосотойгоор зүдхэнэб.