Хуули дабталга 9 - Библи

Ехэ нүгэлэй хойшолон

¹ Израилиин арад зон, соносогты! Мүнөөдэр Иордан гол гаталжа, таанадһаа олон, хүсэтэй арадуудай газар уһа эзэмдэхэеэ ошохотнай. Хотонуудынь мантан ехэнүүд, огторгойдо тулама үндэр хэрэм ханануудтай.

² Зониинь арсалан хүсэтэй, үндэр бэетэй гэжэ Анаак гэгшын уг залгамжалагшад тухай, хэншье тэдэниие диилэжэ шадахагүй тухай дуулаһан байхат.

³ Теэд мүнөө одоо мэдэжэ байгты: Эзэн Бурхантнай бүхы юумэ үрэбхилдэг гал дүлэндэл, таанадай урда ябана. Тэрэ тэдэниие хюдаха, таанадаар диилүүлхэ. Эзэнэй та бүгэдэндэ найдуулһанай ёһоор, таанад газар уһыень эзэмдэхэт, түргөөр тэдэниие һалгаахат.

⁴ Эзэн Бурханайтнай тэдэниие үлдэн гаргахада, «Бидэнэй сэбэр сэхэ ябадалтай байһанда Эзэн энэ газар эзэмдэхыемнай асарба» гээд досоогоо сэдьхэжэ бү байгты. Тэдэ арадуудай буруу ябадалтай байхадань Эзэн үлдэнэ бшуу.

⁵ Тэдэнэй газар дайда үнэн сэхэ байһанайтнай түлөө бэшэ, сэбэр сэхээр ажаһууһанайтнай түлөө бэшэ таанадта хүртэхэ. Тэдэ арадуудай буруу ябадалтай һэн тула, мүн танай үбгэ эсэгэнэр болохо Абраһаам, Исаак, Яков гэгшэдтэ тангариглаһан үгэеэ дүүргэхын тула Эзэн Бурхантнай тэдэниие хажууһаатнай үлдэхэл.

⁶ Тиимэһээ энэ һайхан газар үгэхэдөө, таанадай сэбэр сэхэ байһанай түлөө бэшэ гээд ойлгогты. Таанад, юрэдөө, үсэд лэ зон гээшэлта даа.

Алтан тугал

⁷ Элһэн сүл губида Эзэн Бурханаа сухалдуулһанаа оройдоошье бү мартагты. Египедэй газар дайдаһаа гараһан үдэрһөө хойшо энэ газарта ерэтэрээ Эзэндэ таанад эсэргүүсээт.

⁸ Хорээб хадын хажууда Эзэниие сухалдуулхадатнай, Тэрэ таанадые хюдан алдатараа уурлаа бэлэй.

⁹ Таанадтай Эзэнэй баталһан хэлсээнэй шулуун хабтаһануудые абахаяа хада өөдэ би гаража, дүшэн үдэрэй, дүшэн һүниин туршада хада дээрэ эдеэ хоол барингүй, уһа уунгүй байхадам,

¹⁰ Өөрынь гараар бэшэһэн бэшэгтэй хоёр шулуун хабтаһа намда Эзэн үгөө бэлэй. Та бүгэдын сугларһан тэрэ үдэр хада дээрэһээ, гал дүлэн сооһоо Эзэнэй таанадта айладхаһан бүхы үгэнүүд тэдээн дээрэ бэшээтэй байгаа.

¹¹ Иигэжэл дүшэн хоногой үнгэрһэн хойно Эзэн намда хоёр хабтагар шулуу – хэлсээнэй хабтаһануудые үгэһэн гээшэ.

¹² Тиигээд Эзэн намда айладаба: «Эндэһээ түргөөр доошоо буу, юуб гэхэдэ, Египедһээ гаргаһан арад түмэншни муу зантай болоо. Минии зааһан харгыһаа түргэхэнөөр тэдэ хадуураа, шудхамал хүрэг өөһэдтөө хээ».

¹³ Эзэн үшөө намда иигэжэ дуулгаба: «Энэ арадые шобто хаража байнаб. Одоол үсэд зон даа.

¹⁴ Намда һаалта бү хэ, Би тэдэниие хюдахам, алтан дэлхэй дээрэ нэрэньшье мартагдаха, харин тэдэнһээ хүсэтэй, олон тоото улад зониие шамһаа үдэн гаргахаб».

¹⁵ Гартаа хэлсээнэй хоёр шулуун хабтаһа баринхай би һөөргөө эрьежэ, хадаһаа буубаб. Хада гал дүлэндэ абтанхай байгаа.

¹⁶ Эзэн Бурханайнгаа урда таанадай нүгэл хэһые, тугалай шудхамал дүрсэ өөһэдтөө хэһые, Эзэнэй зааһан замһаа түргөөр хадуурһыетнай би хараа бэлэйб.

¹⁷ Тиимэһээ би танай хараһаар байтар тэрэ хоёр хабтаһа газар руу шэдэжэ, бута сохёо һэм.

¹⁸ Таанадай бүхы нүгэл шэбэлэй түлөө, Эзэнэй урдаһаа муу юумэ хэжэ, Тэрэниие сухалдуулһанайтнай түлөө би Эзэнэй урда дахин һүгэдэн унаад, урид байһандал адляар дүшэн хоногой туршада эдеэ хоол барингүй, уһа уунгүй байбаб.

¹⁹ Юундэ тиигээбиб гэхэдэ, Эзэнэй уур хилэнһээ ехэ айгааб. Тэрэ таанадта угаа сухалдажа, хюдахаяа һанаһан юм. Теэд энэшье удаа минии үгэ Тэрэ дуулаба.

²⁰ Эзэн мүн лэ Аһароондо ехэ сухалдажа, хюдахаяа һанаһан байгаа. Теэд би Аһароонойшье түлөө тэрэ үедэ зальбараа һэм.

²¹ Танай хэһэн нүгэлые – тугалай шудхамал дүрсэ абажа, гал дүлэндэ хаябаб. Бута сохижо, үнэһэн тоборог болоторынь бутаргаад, хадаһаа урдаһан горхон руу хаяа һэм.

²² Табэраада, Массаада, Киброот-Һа-Таһаваада байхадаа таанад Эзэниие мүн лэ сухалдуулаат.

²³ Кадээш-Барнээ гэгшэһээ Эзэнэй таанадые эльгээжэ, «Минии таанадта үгэжэ байһан газар руу уруудан буужа эзэлэгты!» – гээд айладахадань, та бүгэдэн урдаһаань һөөргэдэжэ, этигэбэгүйт, үгыень дуулабагүйт.

²⁴ Таанадые мэдэхэ болоһон сагһаам хойшо Эзэндэ һөөргэдэн байнат.

²⁵ Тиимэһээ Би Эзэнэй урда һүгэдэн унажа, дүшэн хоногой туршада мүргэбэб. Юуб гэхэдэ, Тэрэнэй таанадые үгы хэхэеэ һанаһан тухай мэдэжэ байгааб.

²⁶ Эзэндэ иигэжэ зальбарааб: «Дээдэ Эзэн, Өөрын арад түмэниие, Өөрын хубиие бү усадхыт! Һүр жабхалангаараа тэдэниие абараа, бар хүсөөрөө Египедһээ гаргаа бэлэйт.

²⁷ Абраһаам, Исаак, Яков гэдэг өөрынгөө богоолнуудые ой ухаандаа оруулыт. Энэ арадай үсэдые мартыт, тэдэнэй буруу байдал, нүгэл шэбэл хэһыень бү тоогыт.

²⁸ „Найдуулан хэлэһэн газар дайдадаа Эзэн тэдэниие абаашажа шадаагүй. Тэдэниие үзэн ядаһан ушарһаа хосороохо гэжэ элһэн сүл губи руу абаашаа“, – гээд Египедэй зон хэлсэжэ болохол.

²⁹ Тииһээ тиитэрээ тэдэ – Танай арад, Танай хуби, асари ехэ хүсөөрөө, агууехэ шадалаараа тэдэниие Египедһээ гаргаат».