Хуули дабталга 7 - Библи

Бурханай шэлэһэн арад

¹ Эзэмдэхэеэ зорижо ябаһан газартатнай Эзэн Бурханайтнай таанадые асархадань, олон арад түмэниие – хээт, гиргааш, эмоор, ханаһаан, пэриззии, хиив, евүүс – танһаа олон, хүсэтэй долоон арадые хажууһаатнай үлдэхэдэнь,

² танай мэдэлдэ тэдэниие Эзэнэй үгэхэдэнь, һамна бута сохихот. Тэдэниие үгы хэгты, тэдээнтэй хэлсээ баталжа бү байгты, бү хайрлагты.

³ Худа ураг тэдээнтэй боложо бү байгты: басагаяа тэдэнэй хүбүүндэ хадамда бү үгэгты, басагыеньшье бэри болгон бү буулгагты.

⁴ Юуб гэхэдэ, тэдэнэр үхи хүүгэдыетнай Эзэнһээ буруу харуулха, тиихэдэнь, тэдэ ондоо бурхадта мүргэжэ эхилхэл. Тиигэмсээрнь Эзэн угаа ехээр уурлажа, тэрэ дары таанадые усадхахал.

⁵ Тэдээндэ иимээр хандаха ёһотойт: үргэлэй шэрээнүүдыень һандаргагты, һүгэдэн мүргэдэг нангин шулуунуудыень бута сохигты, Ашэраа бурханда мүргэдэг тахилгата модонуудыень сабшан хаягты, һиилэмэл шүтөөнүүдынь гал дүлэндэ шатаагты!

⁶ Энээниие юундэ хэхэбта гэхэдэ, таанад Эзэн Бурханайнгаа нангин арад түмэн гээшэт. Дэлхэй дээрэ байгааша арадуудай дундаһаа таанадыел Өөрын арад болгохо гэжэ Эзэн Бурхантнай шэлэһэн байна.

⁷ Юундэ Эзэн гансал таанадые шэлэхэ болооб? Бусад арадуудһаа олон байһанайтнай түлөө бэшэ, юуб гэхэдэ, таанад бусад арадуудһаа үсөөн ха юмта.

⁸ Юундэб гэхэдэ, Эзэн таанадта дуратай; танай үбгэ эсэгэнэртэ үгэһэн шахаа тангаригаа бэелүүлхын тула Тэрэ бар хүсөөрөө таанадые Египедһээ гаргаа, фараоной засаг зонхилолтоһоо мултаруулаа, богоол байдалһаатнай сүлөөлөө.

⁹ Зай, мэдэжэ байгты: Эзэн Бурхантнай үнэхөөрөө Бурхан, найдамтай Бурхан юм. Өөртэнь дуратай, мүн захяа заабаринуудыень жэншэдгүй сахигшадта үршөөл хайраяа Тэрэ мянган үе хүрэтэр бэлэглэдэг, баталһан хэлсээгээ сахижа байдаг.

¹⁰ Өөрыень үзэн ядагшадые Тэрэ хэһээдэг, үгы хэдэг. Хэһээлтэеэ удааруулжа байхагүй.

¹¹ Тиимэһээ сахижа ябахыетнай мүнөөдэр минии хэлэһэн захяа заабаринуудые, хуулинуудые, ёһо гуримуудые дүүргэжэ ябагты.

Үгыень дуулаһан арад буянтай

¹² Эдэ ёһо гуримуудые анхаржа, сахижа, бэелүүлжэ ябаа гээшэ һаатнай, Эзэн Бурхантнай үбгэ эсэгэнэртэтнай найдуулһанайнгаа ёһоор, таанадтай хэлсээгээ сахижа, үршөөл хайраяа бэлэглэжэ байхал.

¹³ Тэрэ таанадта дуратай байха, үреэхэдэнь, улад зонтнай олошорхо, олон үхибүүдтэй болохот; газар таряалангыетнай үршөөхэдэнь, талха таряатай, үзэмэй дараһан архитай, олива тоһотой байхат; бодо болон жэжэ малайтнай түл олошорхо. Үбгэ эсэгэнэртэтнай тангариглан, үгэхэб гэжэ найдуулһан тэрэ газарта бүхы үршөөл хайрануудынь таанадта хүрэхэл.

¹⁴ Бусад арадуудта орходоо үреэлтэй, буянтай байхат, таанадай дунда үри хүүгэдгүй хүн байхагүй, мал һүрэгэйтнай дунда һубай мал байхагүй.

¹⁵ Эзэн таанадһаа элдэб хамшаг зайсуулха, Египедтэ үзэһэн хараһан аймшагтай үбшэнгүүдые таанадта халдуулхагүй, харин дайсадтатнай тэдэниие һүжэрөөн тарааха.

¹⁶ Эзэн Бурханайнгаа танай мэдэлдэ үгэһэн бүхы арадуудые усадхахат, тэдэниие бү хайрлагты, тэдэнэй бурхадта бү зальбарагты, юуб гэхэдэ, энэ хадаа таанадта табиһан урьха гээшэл.

¹⁷ «Эдэ арадууд маанадта орходоо угаа олон лэ, яажа бидэ тэдэниие үлдэжэ шадаха гээшэбибди?» – гээд досоогоо һанажа болохот.

¹⁸ Теэд тэдээнһээ бү айгты! Фараондо, мүн бүхы улад зондонь Эзэн Бурханайтнай юу хэһые һанаад үзыт.

¹⁹ Ямар ехэ гай тодхор тэдээндэ эльгээһыень таанад хараа бэлэйт. Дүлгэ тэмдэгүүдые, гайхамшагта үзэгдэлнүүдые, бар хүсөөрөө, агууехэ шадалаараа таанадые Египедһээ Эзэнэй гаргаһыень һанаа бэзэт. Таанадай мүнөө айдаг арадуудтай Эзэн Бурхантнай тон тиимэ юумэ хэхэл.

²⁰ Амиды үлэһэн, хоргодоһон зониие усадхажа дууһатараа Эзэн Бурхантнай тэдэнэртэ хорото шарануудые эльгээжэл байха.

²¹ Тэдэ арадуудһаа бү һүрдэгты, юуб гэхэдэ, Эзэн Бурхантнай – агууехэ, һүрөөтэй Бурхан. Тэрэ таанадтай хамта байна.

²² Эзэн Бурхантнай эдэ арадуудые байн ошон хажууһаатнай холодохыень баадхажа эхилхэ. Тэдэниие түргөөр һалгаажа шадахагүйт, юуб гэхэдэ, тиигэбэлтнай, талын арьяатан олоор үдэжэ, таанадта харша болохол.

²³ Эзэн Бурхантнай тэдэниие танда диилүүлхэ, угаа ехээр мэгдэхүүлжэ, хосороохо.

²⁴ Хаашуулыень танай мэдэлдэ Тэрэ үгэхэ, алтан дэлхэй дээрэ тэдэнэй нэрэшье үлэхэгүй. Хэншье таанадта эсэргүүсэжэ шадахагүй, бултыень таанад һалгаахат!

²⁵ Бурхадайнь дүрсэнүүдые галда хаяжа шатаагты! Шүтөөнүүд дээрэнь байгааша алта-мүнгые абахаяа бү һанагты, юундэб гэхэдэ, тэрэ таанадта занга болохо. Эзэн Бурхантнай шүтөөнүүдые үзэн ядадаг.

²⁶ Өөһэдөө бузарлагдахагүйн тула жэгшүүритэй муухай эдэ шүтөөнүүдые гэртээ бү оруулагты. Тэдэниие үзэн ядаха, тэдэнһээ жэрхэхэ ёһотойт. Юуб гэбэл, хараал тэдээндэ шэнгэнхэй.