Хуули дабталга 5 - Библи

Арбан Захяа заабари

¹ Моисей Израилиин бүхы арад зониие дуудажа, иигэжэ тэдээндэ хэлэбэ: – Израилиин арад зон, таанадта мүнөө минии хэлэхэ бүхы хуули, ёһо гуримуудые шагнагты, сээжэлдээд, жэншэдгүй сахин ябагты.

² Эзэн Бурхамнай Хорээб уула дээрэ бидэнтэй хэлсээ баталаа бэлэй.

³ Эзэн энэ хэлсээ манай үбгэ эсэгэнэртэй баталаа бэшэ, мүнөө амиды мэндэ эндэ байгаа бидэ бултантай баталаа юм.

⁴ Таанадтай улаан нюураараа уулзалдан, Эзэн тэрэ хада дээрэһээ, гал дүлэн сооһоо үгэ хүүр айладаһан байна.

⁵ Таанадай галһаа айгаад, хада өөдэ гарахагүйдэ би Эзэнэй үгэ таанадта дамжуулха гэжэ Тэрэнэй болон таанадай хоорондо зогсоо бэлэйб. Тэрэ иигэжэ айладхаа:

⁶ «Би шамайе Египедэй дарлалтаһаа гаргаһан Эзэн Бурханшни гээшэб.

⁷ Намһаа ондоо бурхан шамда байха ёһогүй.

⁸ Өөртөө шүтөөниие бү зохёо, дээдэ тэнгэридэ байһан ба газар дээрэ, мүн газарһаа доогуур уһан соо байһан алибаа юумэнэй дүрсэ бү дархала.

⁹ Тэдээндэ бү һүгэдэ, бү мүргэ. Юуб гэхэдэ, Би, Эзэн Бурханшни, хуулияа ханалгатай сахидаг Бурхан гээшэб. Намайе хэрэгсээнгүй ябаһан эсэгэнэрэй түлөө үри хүүгэдыень, аша гушанарыень гурбадахи, дүрбэдэхи үе хүрэтэрынь хэһээдэгби.

¹⁰ Намда дуратай, захяа заабариием сахижа ябагша зондо мянганшье үе хүрэтэрынь үршөөл хайра үзүүлдэгби.

¹¹ Эзэн Бурханайнгаа нэрые дэмы бү дурда. Тэрэнэй нэрэ дэмы нэрлэдэг хэнииешье Эзэн хэһээлтэгүй орхихогүй.

¹² Минии, Эзэн Бурханайшни, захирһанай ёһоор, субботые нангин үдэр гээд сахидаг бай.

¹³ Зургаан үдэрэй туршада ажаллажа, алибаа хэрэгээ бүтээжэ бай.

¹⁴ Харин долоодохи үдэр – суббото, тэрэ Намда зорюулһан үдэр. Энэ үдэр ямаршье ажал бү хэ, өөрөөшье, хүбүүн, басаганши, богоол шэбэгшэдшни, сар, элжэгэншни, бүхы мал адагуусаншни, хотодош байрлаһан ерүүл хүншье – юрэдөө, бултадаа ямаршье ажал хэхэ ёһогүй. Шамдал адли, богоолнуудшни амарха ёһотой.

¹⁵ Египедтэ богоол байһанаа, тэндэһээ Минии, Эзэн Бурханайшни, бар хүсөөрөө, агууехэ шадалаараа шамайе гаргаһан тухай бү марта. Тиимэһээ Би, Эзэн Бурханшни, субботые жэншэдгүй сахихыешни захирнаб.

¹⁶ Эзэн Бурханайнгаа үршөөһэн газарта үлзытэй һайн, ута наһатай һуухын тулада Эзэн Бурханайшни шамда захиһан ёһоор эхэ, эсэгэеэ хүндэлжэ ябаарай.

¹⁷ Хүниие бү ала.

¹⁸ Ханидаа бү урба.

¹⁹ Хулгай бү хэ.

²⁰ Хүниие хардажа худалаар бү гэршэлэ.

²¹ Ондоо хүнэй һамганда бү һанаашарха, хүнэй гэр байрада, зөөри зөөшэдэ: газар таряаланда, богоол шэбэгшэндэ, сар элжэгэндэ, юрэдөө, хүндэ байһан ямаршье юумэндэ бү һанаашарха».

²² Эгээл эдэ үгэнүүдые Эзэн хада дээрэ, гал дүлэнэй, үүлэнэй, шэб харанхын дундаһаа таанадай суглараад байхада шанга гэгшээр айладхаа. Бэшэ юумэ Тэрэ нэмээгүй. Тиигээд Тэрэ хоёр шулуун хабтаһан дээрэ тэдэниие бэшэжэ, намда үгөө бэлэй.

Арад зоной айха ушар

²³ Гал дүлэндэ хадын абтаад байхада, харанхы сооһоо таанад абяа дуулажа, обогуудайтнай толгойлогшод ба аха захатантнай намда дүтэлжэ,

²⁴ иигэжэ хэлээ бэлэй: «Эзэн Бурхамнай Өөрынгөө алдар соло, һүр жабхалан бидэндэ харуулаа, Тэрэнэй абяаень гал дүлэн сооһоо дуулаалди! Улад зонтой Бурханай хөөрэлдэһые, удаань тэдэ зоной амиды мэндэ үлэһые мүнөөдэр үзөө хараабди.

²⁵ Теэд үшөө дахин Эзэн Бурханайнгаа абяа шагнаа гээшэ һаа, үхэхэбди, энэ ехэ гал бидэние үрэбхихэ бшуу. Харин бидэ хосорхоо һананагүйбди!

²⁶ Гал дүлэн сооһоо дуугаржа байһан амиды Бурханай хоолойе бидэндэл адли дуулажа, амиды мэндэ үлэһэн амитан бии юм аал?

²⁷ Ши, Моисей, тиишээ дүтэлжэ, Эзэн Бурханаймнай айладаһан үгэнүүдые шагнаад, бултыень бидэндэ дамжуула. Бидэ шагнажа, дүүргэхэеэ оролдохобди».

²⁸ Эзэн эдэ бүгэдые дуулахадаа, иигэжэ намда айладаба: «Арад зоной шамда хэлэһэн үгэнүүдые дуулааб, хэлээшэнь тон зүб.

²⁹ Өөһэдтэнь болон үхи хүүгэдтэнь хэтэ мүнхэдөө һайн байхын тула тэдэнэр Намайе хүндэлжэ, Минии захяа заабаринуудые бүхы наһаараа үнэнхэ зүрхэнһөө сахижа ябаа гээшэ һаань, хэды һайн байха байгааб!

³⁰ Ошоод, майхангуудтаа бусахыень тэдэндэ хэлэ.

³¹ Харин өөрөө, Моисей, удаань Намтай эндэ үлөөрэй. Би шамда бүхы захяа заабари, хуули, ёһо гурим хэлэжэ үгэхэб. Хубитань гэжэ Минии үршөөжэ байһан газарта эдэ бүгэдые сахин дүүргэжэ ябахыень тэдэниие һурга».

³² Эзэн Бурханайнгаа захирһанай ёһоор, жэншэдгүй үйлэ хэрэг ябуулагты, нэгэшье хуулииень бү хазагайруулагты, хажуу тээшэ халба бү һүрэгты.

³³ Амиды мэндэ ябахын тула, эзэлхэ газартаа удаан сагта ажаһуужа, та бүгэдэндэ һайн байхын тула Эзэн Бурханайнгаа захирһан юумэ сахин дүүргэгты.