Хуули дабталга 4 - Библи

Бурханай һургаал дүүргэхэ тухай захяа

¹ Моисей Израилиин улад зондо иигэжэ хэлэбэ: – Минии заабарилжа байһан хуули, ёһо гуримуудые сахигты. Тиигэбэл, таанад амар мэндэ байхат, Эзэнэй, үбгэ эсэгэнэрэйтнай Бурханай, үршөөһэн газарта ошожо эзэлэн ажаһуухат.

² Минии заабарилан захирһан үгэнүүдтэ бү нэмэгты, тэдээнһээ хороожошье бү байгты. Эзэн Бурханайтнай захяа заабаринуудые дамжуулхадамни, сахин ябагты.

³ Пэһоорой Баалда Эзэнэй юу хэһые таанад хараа бэлэйт. Пэһоорой Баалда шүтэн мүргэһэн хүн бүхэнииетнай Эзэн үгы хээ бэлэй.

⁴ Харин таанад Эзэн Бурхандаа үнэн сэхэ байһан тула мүнөөшье болотор амиды мэндэт.

⁵ Ойлгогты, Эзэн Бурханайнгаа намда захин заабарилһан хуули, ёһо гуримуудта таанадые һурганаб. Эзэлхэ зорилготойгоор ошожо ябаһан тэрэ газартаа эдэниие сахин байгты.

⁶ Тэдэниие жэншэдгүй сахин бэелүүлэн байгты, өөрынгөө сэсэн ухаатайе ондоо арадуудта иигэжэ гэршэлхэт. Юуб гэхэдэ, эдэ бүхы хуули ёһо тухай дуулаһан арадууд «Энэ агууехэ арад ямар сэсэн мэргэн ухаатай гээшэб!» гээд хэлэхэл.

⁷ Бидэнэй дуудаха бүхэндэ Эзэн Бурхамнай маанадые анхарна. Бурханта дүтэ, хайра үршөөлтэй үшөө иимэ агууехэ үндэһэ яһатан бии юм аал?

⁸ Мүнөө минии дамжуулжа байһан бүхы энэ һургаал заабаридал адли иимэ үнэн зүб хуули, ёһо гуримтай агууехэ үндэһэтэн үшөө бии юм гү? Үгы!

^9-10 Теэд болгоомжологты! Хараһан үзэһэн үйлэ хэрэгүүдээ бү мартагты, бүхы наһаараа ой ухаанһаатнай тэдэ бү гараг. Эзэн Бурханайнгаа урда Хорээб хадын дэргэдэ зогсоһон тэрэ үдэр тушаа үхи хүүгэдтээ, аша гушанартаа хөөрэгты. Тэндэ Эзэн намда иигэжэ айладхаа бэлэй: «Улад зониие Минии урда суглуула, Би тэдээндэ Өөрынгөө һургаал айладхахам. Тиихэдэм тэдэнэр хүрьһэтэ дэлхэй дээрэ амидаран байгаа бүхы наһан соогоо Намайе хүндэлжэ һураха, энээндэ үхи хүүгэдээшье һургахал».

¹¹ Таанад дүтэлжэ, хадын хормойдо зогсоо бэлэйт. Хада тэнгэридэ тулама гал дүлэндэ абтаатай, хара бараан үүлэтэй, мүн шэб харанхы байгаа бэлэй.

¹² Эзэн гал дүлэн сооһоо таанадта хандан дуугараа һэн. Үгэнүүдыень дуулаат, харин дүрсыень хараагүйт, гансал абяаень дуулаа бэлэйт.

¹³ Тэрэ Өөрынгөө хэлсээе, Арбан Зарлиг, бидэндэ айладхажа, сахин ябахыемнай захиба, хоёр шулуун хабтаһан дээрэ бэшээ һэн.

¹⁴ Эзэлхэеэ ошожо ябаһан газар дайдада таанадай сахин ябаха хуули, ёһо гуримуудта та бүгэдые һургахыемни Эзэн тэрэ үедэ намда захираа бэлэй.

Онгонуудта бү мүргэгты!

¹⁵ Хорээб хада дээрэһээ, гал дүлэн сооһоо Эзэнэй танда хандаһан тэрэ үдэр та бүгэдэ Өөрыень хараагүйт. Бурхан ямаршье дүрсэгүй. Энээн тушаа хододоо һанажа ябагты.

¹⁶ Энэ юундэ хэрэгтэйб гэхэдэ, таанадай ёһоо алдан, ямар нэгэн шүтөөн дархалхагүйн тула, эрын, эхэнэрэй гү,

¹⁷ али газар дэлхэйн амитанай, тэнгэреэр ниидэдэг жэгүүртэ шубуунай,

¹⁸ газараар мүлхилдэг хорхойн, уһан соогуур тамардаг загаһанай дүрсэ хэхэгүйн тула.

¹⁹ Юундэ хэрэгтэйб гэхэдэ, нара, һара, мүшэдые, юрэдөө, тэнгэриин һүрөөтэ үзэсхэлэн обёоржо, таанадай тэрээндэ татагдан, доро унан һүгэдэхэгүйн, тэдээндэ мүргэхэгүйн тула. Юуб гэхэдэ, Эзэн Бурхантнай тэдэниие хамаг огторгой доро ажаһуудаг бүхы арадуудта үршөөһэн ха юм даа.

²⁰ Таанадые Эзэн түмэр зууха сооһоо абажа гаргаһандал, Египедһээ абаран гаргаа. Өөрын арад түмэн болгохын тула. Энэнь бэелээ.

²¹ Эзэн таанадай түлөө намда уурлажа, Иордан голые минии гаталхагүй, Тэрэнэй таанадта хуби болгон үршөөһэн үрэжэлтэй һайхан газарта минии орохогүй тухай тангариглаһан байна.

²² Тиимэһээ би Иорданиие гаталангүй, энэ газартаа наһа барахаб, харин таанад голые гаталаад, тэрэ үрэжэлтэ һайн газар эзэмдэхэт.

²³ Теэд болгоомжологты! Эзэн Бурхантаяа баталһан хэлсээгээ бү мартагты! Эзэн Бурханайтнай захирһанай ёһоор, ямаршье юумэ һажааһан хүрэг, дүрсэ бү дархалагты.

²⁴ Юуб гэхэдэ, Эзэн Бурхантнай үрэбхилдэг гал дүлэн мэтэ, Тэрэ ондоо бурхадые тэсэхэгүй.

²⁵ Үхи хүүгэдтэй, аша гушанартай боложо, дэлхэй дээрэ удаан ажаһуугаад, удаань ёһоо алдажа, ямаршьеб юумэнэй дүрсэ хэн, шүтөөн бүтээхэдээ, Эзэн Бурханайнгаа урда муу боложо, Тэрэниие сухалдуулбал,

²⁶ Иордан гол гаталан эзэмдэхэеэ ошожо ябаһан газараа алдахат гэжэ огторгой, орон дэлхэйе гэршэ болгон, та бүгэдэндэ мүнөө тунхагланаб. Удаан сагта тэндэ байхагүйт, алуулхат!

²⁷ Эзэн таанадые бүхы арадуудаар тарааха, тиихэдэнь тэдэ арадуудайнь дунда үсөөхэн тоотой үлэхэт.

²⁸ Тэндэ модоор болон шулуугаар хүнэй дархалһан, юумэ харадаггүй, дууладаггүй, юушье эдидэггүй ба үнэршье ойлгодоггүй бурхадта зальбаржа байхат.

^29-30 Гай тодхорой таанадые нэгэ хэды болоод дайража эхилхэдэ, зобохо зүдэрхэ үедөө Эзэн Бурхандаа эрьехэт. Тиихэдээ Тэрэниие бэдэрээ һаа, бүхы зүрхэ сэдьхэлээрээ шүтэн бэдэрбэл, олохот, Тэрэнэй үгэ соо байхат.

³¹ Эзэн Бурхантнай нигүүлэсхы сэдьхэлтэй Бурхан юм. Тэрэ таанадые орхихогүй, һалгаахагүй, үбгэ эсэгэнэртэйтнай баталһан хэлсээгээ, тангариглаһанаа Тэрэ мартахагүй.

³² Урданайнгаа үе саг һанаад үзэгты, алтан дэлхэй дээрэ хүниие Бурханай байгуулһан үдэрһөө хойшо, дэлхэйн нэгэ захаһаа нүгөө заха хүрэтэр энээндэл адли агуу хэрэг байгаа юм гү, энээндэл адли юумэн дуулдаһан гээшэ гү? Иимэ гайхамшагта хэрэг хэзээ нэгэтэ болоо һэн гү? Үгы!

³³ Гал дүлэн сооһоо Бурханай айладажа байһан дууе ямар нэгэн арад шагнаад, таанад мэтэ амиды мэндэ үлөө юм гү?

³⁴ Ошожо, ондоо арад зоной дундаһаа Өөртөө арадые шэлэн абаха гэжэ һэдэһэн үшөө ямар бурхан байгааб? Египедтэ танай хараһаар байтар Эзэн Бурхантнай элдэб хэһээлтэ, дүлгэ тэмдэгүүдые, гайхамшагта үзэгдэлнүүдые харуулан, дайн дажарааршье, бар хүсөөршье, агууехэ шадалааршье, аймшагтай үзэгдэлнүүдээршье эдэ бүгэдые таанадай түлөө хээ ха юм.

³⁵ Эзэн Бурхан ганса, Тэрээнһээ ондоо Бурхан үгы гэжэ таанадай лаб ойлгохын тула эдэ бүгэдые хараха арга таанадта үршөөгдөө.

³⁶ Таанадые һургахын тула Тэрэ тэнгэриһээ дуугараа, Өөрынгөө агууехэ гал дүлэн газар дэлхэй дээрэ харуулаа, гал дүлэн сооһоо үгэнүүдыень шагнаат.

³⁷ Үбгэ эсэгэнэртэтнай дурлаһандаа Тэрэ таанадые шэлээ, Өөрөө асари ехэ хүсөөрөө таанадые Египедһээ гаргаа.

³⁸ Юундэ гаргааб гэхэдэ, таанадһаа олон, мүн хүсэтэйшье арадуудые хажууһаатнай үлдэжэ, тэдэнэй газар уһанда таанадые асаржа, эдэ бүгэдые танай хубита болгон үгэхын тула Тэрэ тиигээ. Энэнь бүтээ.

³⁹ Зай, Эзэн гээшэ тэнгэри болон газар дээрэ Бурхан, тэрээнһээ ондоо Бурхан байхагүй гэжэ мүнөө мэдэжэ, ой ухаандаа бүхөөр хадуун абагты.

⁴⁰ Таанадта, үхи хүүгэдтэтнай танай һүүлээр һайн байхын тула, Эзэнэй хэтэ мүнхэдөө үгэжэ байгааша газарта удаан сагта таанадай ажаһуухын тула минии мүнөөдэр энэ дамжуулан хэлэһэн Тэрэнэй хуули ёһо, захяа заабариие сахин дүүргэн ябагты.

Тэрьедэгшэдэй хорохо хотонууд

⁴¹ Тэрэ үедэ Моисей Иордан голой зүүн бэедэ, наранай мандаха зүгтэ гурбан хото тусгаарлан орхиһон байна.

⁴² Ушар гэхэдэ, хэзээдэшье дайсад бэшэ аад, ойлгомторгүйгөөр хүниие хорооһон хэн нэгэнэй тэдэ хотонуудай нэгэн руу тэрьедэжэ, амиды мэндэ үлэхын, алуулхагүйн тула тэрэ тиигээ.

⁴³ Ямар хотонууд бэ гэбэл: тэгшэ талада байдаг Бээцэр хотые Рэүбээнэй, Галаадтахи Рамоот хотые Гаадай, мүн Башаандахи Голаан хотые Мэнашшээ гэгшын обогуудай зондо тус тустань үлөөһэн байна.

Һургаал хаана заабарилааб

⁴⁴ Энэл даа, Израилиин улад зондо Моисейн дамжуулһан Бурханай һургаал заабари.

^45-46 Египедһээ гараһанай удаа, Иордан голой зүүн бэедэ, Бэт-Пэһоор хотын урдаһаа тулаһан нюруу дээрэ, Хэшбоондо ажаһууһан Сиһоон хаантай эмоор арадай газарта (Египедһээ гарахадаа, Моисей Израилиин улад зонтой хамта тэрэниие диилээ бэлэй) Израилиин зондо Моисей эрхэ нүхэсэлнүүдые, хуулинуудые, ёһо гуримуудые дамжуулаа һэн.

⁴⁷ Сиһооной мүн Башаанай хаан Оогой – эмоор арадай хоёр хаашуулай газар дайда тэдэ эзэмдээ. Тэрэ газар хадаа Иорданай зүүн бэедэ, наранай мандаха зүгтэ,

⁴⁸ Арноон голой нюруу дээгүүр оршодог Ароһээр хотоһоо эхилээд Сириоон хада хүрэтэр (тэрэниие Хэрмооншье гээд нэрлэдэг) нэмжынэ.

⁴⁹ Иордан голой зүүн бэеын намжаа бүхы газараар зүүлжээ, Пиисгаа хадын хормой руу, Дабһата далай хүрэтэр тэрэ газар үргэлжэлнэ.