Хуули дабталга 32 - Библи

¹ Огторгой, анхара, би хэлэхэмни, газар, шагна минии үгэнүүдые.

² Багахан дуһалнуудай зүлгэ ногоон дээрэ унаһандал, зөөлэн ногоон дээрэ аадарай адхарһандал, һургаални бороо мэтэ адхарха, үгэнүүдни шүүдэр мэтэ унаха.

³ Эзэнэй нэрэ дуулан магтанаб! Бурханайнгаа агууехые магтагты!

⁴ Тэрэ – танай хамгаалагша, хэрэгүүдынь түгэс. Бүхы аян замынь залан сэхэ. Бурхан найдамтай, хуурмаг худал юумэн Тэрээндэ үгы, Тэрэ үнэн зүб, шударга сэхэ юм.

⁵ Тэрэнэй арад зон гэжэ нэрлүүлхэ һэшхэлтнай хаанаб? Нүгэл шэбэлтнай угаа ехэ, таанад – мэхэшэд ба хара худалшад гээшэт!

⁶ Эзэндээ юундэ иигэжэ ханданабта, тэнэг, ухаагүй арад? Тэрэ – танай Эсэгэ, таанадые байгуулаа, үндэһэ яһатан болгоо.

⁷ Эртэ урдын саг һанаад үзэгты, үни заяанда үнгэрһэн он жэлнүүд тушаа бодомжолоод туршагты. Эсэгэнэрһээ асуун һурагты, тэдэ танда ойлгуулха, үбгэдһөө асуугаарайгты, тэдэ танда хэлэхэ.

⁸ Дээдэ Бурхан газар дэлхэйе арадуудта хуби болгон хубаарилхадаа, хүн түрэлтэниие сасан тараахадаа, Израилиин улад зоной аша туһада арадуудай харьяата газарай хилэнүүдые табяа.

⁹ Эзэн Өөрын хуби болгон Израилиин арадые, Яковай уг удамые шэлэһэн юм.

¹⁰ Тэрэ Яковай уг удамые элһэн сүл губида, хубхай хооһон, һалхитай гүн талада олоо. Эзэн тэдэниие анхаралаараа хүреэлөө, харууһалаа, нюдэнэйнгөө сэсэгы мэтэ аршалаа.

¹¹ Бүргэд шубуунай дальбараануудаа ниидэжэ һургахын тула уурхайһаа түлхин гаргажа, дээгүүрнь элин ниидэжэ, даляа дэбин, тэдэнээ дүнгэн байһандал, Эзэн Израилиие унахаһаань һэргылэн аршалаа.

¹² Эзэн арад зоноо гансаараа хүтэлэн ябаа, ондоо бурхан тэрээнтэй байгаагүй.

¹³ Эмээл дээрээ һуулгаһандал, Тэрэ Яковай уг удамые гүбээ газарнуудые унуулан ябуулжа, таряалангай ургасаар хооллуулаа, хабсагайһаа – зүгын бала, сахюур шулуунһаа оливын тоһо гарган тэнжээгээ.

¹⁴ Тэдэнэй үнеэнүүд, хонид һү, тоһо элбэг дэлбэг үгэдэг байгаа, эгээл эрхим хуса, ямаадые, үхэр мал, эрхим шэниисэ Тэрэ тэдээндэ үгөө. Үзэмэй дараһан архишье байгаа.

¹⁵ Ешүрүүн маряажажа, дээрэлхүү зантай болобо, таргалаа, бүдүүрээ, үсэд болоо, Бүтээгшэ Бурханаа, өөрын абаралта Хабсагайгаа тообогүй.

¹⁶ Эгээлэ бурхадта тэдэнэр мүргэжэ, Эзэнэй уур хүдэлгөө. Жэгшүүрилтэ муухай юумэ тэдэнэр хэжэ, Тэрэниие сухалдуулаа.

¹⁷ Тэдэ Бурхадта бэшэ, альбан шүдхэрнүүдтэ үргэл хэдэг байгаа. Хажуудахи арадһаа халан абаһан, үбгэ эсэгэнэрэйнгээшье мэдэхэгүй ондоо шэнэ бурхадта тэдэнэр үргэл хэжэ эхилээ.

¹⁸ Мүндэлүүлһэн Хабсагайгаа тэдэ мартаа, ами наһа үршөөһэн Бурхаяа ой ухаандаашье оруулаагүй.

¹⁹ Энээниие Эзэн ажаглажа, дураа гутажа, хүбүүд, басагадаа тоохоёо болибо.

²⁰ Тиигээд Тэрэ иигэжэ айладхаба: «Тэдээнһээ буруу хаража, һүүлдэнь юун бологшо ааб гээд хүлеэхэмни. Тэдэ ёһоо алдаһан зон, аша харюулхаяа мартаһан үхибүүд мэтэ.

²¹ Тэдэнэр шүтөөнүүдтэ мүргэдэг боложо, Минии сухал хүргэбэ. Тэдэнь бурхад бэшэ ха юм, хэндэшье хэрэггүй юумэд. Тиимэһээ Би арад боложо бүрилдөөдүй уладаар тэдэниие атаархуулжа, тэнэг зоноор тэдэнэй уур сухал хүргэхэб!

²² Гал дүлэн мэтээр Минии уур сухал бужаганаа, үхэлэй орон хүрэтэр дүлэтэнэ, газарые болон хэшэгыень шатаан залгижа, хада уулын үндэһэ һуури хайрана.

²³ Би тэдээн дээрэ гай тодхор обоолжо, годлинуудаа дууһан тэдээн руу харбахаб!

²⁴ Тиихэдэ тэдэнэр гэдэһээ үлдэн, мүн үбшэ хабшанһаа гээгдэхэ. Би урдаһаань зэрлиг арьяатанай шүдэ, могойн хоро эльгэхэб.

²⁵ Газаа – тэдэнэр һэлмээр хороогдохо, гэртээ – айһанһаа зүрхэеэ хахаран гээгдэхэ: эдир хүбүүншье, залуу хүүхэншье, хүхөөр үхибүүншье, сагаан үһэтэй үбгэншье.

²⁶ Би хэлээб: „Тэдэниие тараан сасахаб, үгы хэхэб, тиихэдэм тэдээн тушаа зон огтолон мартаха“.

²⁷ Теэд дайсадынь юун гээд һанахаб гэжэ мэдэнэб. „Эзэн Израилиие хюдаа бэшэ, энэ хадаа бидэ өөрынгөө асари ехэ хүсөөр тэдэниие диилээбди“, – гэжэ дайсадынь буруу ойлгохол».

²⁸ Израиль болбол толгойгоо төөриһэн, ухаагүй арад юм.

²⁹ Ухаатай гээшэ һаа, тэдэнэр тэдээнтэй юунэй болохоёо байһыень ойлгохо бэлэйл.

³⁰ Нэгэ хүн мянган зониие намнажа шадаха гү, хоёр хүн үй түмэниие үлдэжэ бираха гү? Тэдэ мянган зоной Хабсагайн өөһэдыень орхёо гээшэ һаа, Эзэнэй тэдээнһээ арсаа гээшэ һаань, иимэ юумэн ушархал.

³¹ Дайсадай «хабсагайнь» манай Хабсагайдал адли бата бэхи бэшэ юм. Тэдэ өөһэдөө энээн тушаа мэдэнэ.

³² Дайсад Содом болон Гоморродол адли забхай, һальхай, хорото гашуун жэмэстэй уһан үзэмэй эшэ мэтэл.

³³ Үзэмэй дараһан архинь луу, могойн хорон мэтэ!

³⁴ Эзэн иигэжэ айладхаа: «Үһөөгөө абахаяа хүлеэжэ, хэһээлтэеэ хадагалан байхамни. Ханза соогоо ласадуулхам.

³⁵ Бүдэрхэдэнь, үһөөгөө абахаб, зэмыень амасуулхаб. Хосорхо сагынь дүтэлөө, удахагүй тэдэнэр хэһээгдэхэ».

³⁶ Эзэн Өөрынгөө арад зониие сүүдлэхэ. Тэдэнэр хүсэгүй болоо, Өөртэнь мүргэдэг зон ямаршье туһагүй болоо гэжэ харахадаа, эдэ зониие Тэрэ хайрлаха.

³⁷ Тиихэдэ Эзэн Өөрын улад зонһоо иигэжэ асууха: «Найдадаг бурхадтнай хаана гээшэб? Хабсагайтнай хаанаб?

³⁸ Танай асарһан үргэлэй өөхэ тэдэ эдеэ, үргэлэй үзэмэй дараһан архи уугаа, бодожо тэдэнэр таанадта туһалаг лэ! Таанадые аршалаг лэ!

³⁹ Мүнөө харана гүт: Биб, ганса Би байнаб. Намһаа бэшэ ондоо Бурхан үгы. Би гээгдүүлнэб, нэгэн доро амидыруулнаб, Би хюданаб, мүн аргалнаб. Минии урдаһаа хэншье һөөргэдэжэ шадахагүй!

⁴⁰ Гараа огторгой руу һарбайжа, Өөрын амиды байһаар тангаригланаб:

⁴¹ Өөрынгөө сахилгаан һэлмэ хурсадажа, шүүбэрилжэ эхилхэдээ, дайсадһаа үһөөгөө абахаб, Намайе үзэн ядагшадта зэмыень амасуулхаб;

⁴² годлинуудтаа шуһа һоруулхаб, Минии һэлмэ зоной мяха эдихэ, алуулһан, баряанда абтаһан зоной шуһа ууха, дайсанай удамаршадай толгойнуудые сабшаха!»

⁴³ Бусад яһатад, Бурханай арадтай хамта баярлагты! Юуб гэхэдэ, зарасануудыень алаһан зондо Тэрэ хэһээлтэ амасуулдаг, тэдэнэй түлөө дайсадһаа үһөөгөө абадаг, Өөрынгөө газарай, арад зоной нүгэл хүлисэн арюудхадаг.

Моисей зониие дуунда һургана

⁴⁴ Тиигээд Моисей Нүүнэй хүбүүн Иисүүстэй хамта энэ дуунай бүхы үгэнүүдые арад зоной дуулахаар хэлэжэ үгэбэ.

⁴⁵ Израилиин бүхы зондо эдэ үгэнүүдые бултыень хэлэжэ дүүргэхэдээ, Моисей

⁴⁶ үшөө иигэжэ нэмэбэ: – Мүнөөдэр минии һэргылжэ хэлэһэн үгэнүүдые зүрхэ сэдьхэлдээ хадуужа абагты, энэ һургаал заабариин бүхы үгэнүүдые сахин дүүргэхыень үхи хүүгэдтээ захигты.

⁴⁷ Юуб гэхэдэ, энэ хооһон үгэнүүд бэшэ, энэ хадаа танай ами наһан гээшэ. Энээнэй ашаар таанад ошожо ябаһан газартаа, Иорданай саана, удаан сагта ажаһуухат.

Эзэнэй зарлиг

⁴⁸ Тэрэл үдэр Эзэн Моисейтэй хөөрэлдэжэ, иигэжэ айладаба:

⁴⁹ – Абариим хада руу ошо, Моһаабта, Ерихооной урда байдаг Нэбоо хада өөдэ гараарай, тэндэһээ Ханаһаанай орон нютаг тээшэ хара. Тэрэ газар дайдые Би Израилиин арад зондо эзэлхыень үгэнэб.

⁵⁰ Гараһан хада дээрээ ши наһа барахаш. Шинии аха Аһарооной Һоор хада дээрэ нүгшэжэ, урда түрэлдөө ошоһондол, ши мүн лэ тиимээр урда түрэлнүүдтэеэ хамтархаш.

⁵¹ Юуб гэхэдэ, Циин гэһэн элһэн сүл губида, Мэрибаа-Кадээш булагай хажууда байхадаа, Израилиин зоной дундаһаа та хоёр Минии урда нүгэл хэһэн байнат. Израилиин улад зондо гэгээн арюун байһыемни эли тодоор харуулаагүйт.

⁵² Тиимэһээ ши Израилиин арад зондо Минии үгэжэ байһан тэрэ газар дайдые холоһоо харахаш, теэд тиишээ орожо шадахагүйш!