Хуули дабталга 31 - Библи

Моисейн халаан – Иисүүс

¹ Моисей Израилиин бүхы улад зондо хэлэһэнээ үргэлжэлүүлбэ:

² – Мүнөө би зуун хорин наһатайб, ябахамни хүндэ болонхой. Иорданиие ши гаталхагүйш гээд Эзэн намда айладаа.

³ Эзэн Бурхантнай урдатнай Өөрөө гол гаталан, таанадые хүтэлэн ябаха. Тэрэ арадуудые таанадай түлөө үгы хэхэ, тиигээд газар, уһыень эзэмдэхэт. Эзэнэй айладаһанай ёһоор, таанадые Иисүүс хүтэлхэ.

⁴ Эмоор арадуудай хаашуул болохо Сиһоон ба Оог гэгшэдтэ юу хээ һэм, тон тиимэ юумэ Эзэн тэдэ арадуудта хэхэ.

⁵ Эзэнэй тэдэниие таанадаар диилүүлхэдэнь, минии хэлэһэн захяа заабаринуудай ёһоор тэдээндэ хандаарайгты.

⁶ Хатуу шанга, эрэлхэг зоригтой байгты, тэдээнһээ бү айгты, бү һүрдэгты, юуб гэхэдэ, Эзэн Бурхантнай таанадтай хамта ябана. Тэрэ таанадые орхихогүй, хаяхагүй.

⁷ Моисей Иисүүс гэгшые дуудажа, Израилиин бүхы улад зоной дунда тэрээндэ иигэжэ хэлэбэ: – Хатуу шанга, эрэлхэг зоригтой байгаарай, юуб гэхэдэ, үбгэ эсэгэнэртэмнай Эзэнэй «үгэхэб» гэжэ тангариглаһан газар дайда руу энэ арад зоноо ши хүтэлэн абаашахаш. Ши хуби хубяар тэрэ газарые зондо хубаарилхаш.

⁸ Эзэн Өөрөө шамайе хүтэлэн ябаха, Тэрэ шамтай байха, шамайе орхихогүй, хаяхагүй. Бү ай, бү һүрдэ!

Һургаал заабариие уншаха тухай

⁹ Моисей Бурханай һургаал заабари бэшэжэ, Эзэнтэй баталһан хэлсээнэй ханза абаад ябадаг Левиин обогой санаартадта, мүн Израилиин бүхы аха захатанда тэрэниие үгэбэ.

¹⁰ Тиигээд Моисей удамаршадта хандан, иигэжэ хэлэбэ: – Долоон жэлэй үнгэрхэ бүри, үри шэри хүлисэхэ жэлдэ, Майхангуудай һайндэрэй үедэ

¹¹ бүхы Израилиин зоной Эзэн Бурханайнгаа урда мүргэхэеэ нангин үргөөдэнь суглархадань, энэ һургаал заабариие бүхы зоной дуулахаар шангаар уншагты.

¹² Бүхы арад зониие – эрэшүүл, эхэнэрнүүдые, үхи хүүгэдые, танай хотонуудта ажаһуудаг ерүүл зониие бултыень суглуулагты. Тэдэнэр шагнажа, Эзэн Бурханаа хүндэлжэ, һургаалайнь бүхы үгэнүүдые сахин дүүргэжэ һураха.

¹³ Юумэ мэдэхэгүй тэдэнэй үхи хүүгэд һургаал шагнажа, Эзэн Бурханаа хүндэлжэ һураха. Иорданиие гаталан, эзэлхэеэ ошожо байһан газар дайдадаа ажаһууха бүхы сагтаа тэдэнэр Эзэниие хүндэлдэг байхал.

Моисей ба Иисүүс Эзэнэй урда

¹⁴ Эзэн Моисейдэ хандаба: – Зай, нүгшэхэ сагшни дүтэлбэ. Иисүүсые дууда. Тиигээд майхан һүмэ руу ерэгты, Би тэрээндэ захяа заабари айладхахаб. Моисей Иисүүс хоёр ерэжэ, майхан һүмэ руу оробо.

¹⁵ Үүлэн баханаар хүреэлэгдэнхэй Эзэн бии болобо. Тэрэ үүлэн бахана майхан һүмын үүдэнэй хажууда тогтоо һэн.

¹⁶ Тиигээд Эзэн Моисейдэ иигэжэ үгүүлбэ: – Удахагүй наһа барахашни. Тиихэдэшни энэ арад һальхай ябадал гаргажа, зорин ошожо байһан хариин газар дайдын бурхадта мүргэжэ эхилхэ. Намайе орхижо, өөһэдтэйнь баталһан Минии хэлсээе тэдэнэр эбдэхэ.

¹⁷ Тиихэдэнь тэрэ дары Минии уур сухал бужаганажа, Би тэдэниие орхихоб, тэдээндэ туһалхаяа болихоб. Тэдэнэр һалаха тээшээ болохо, элдэб олон гай тодхор дээрэнь бууха. Тиихэдэнь тэдэ иигэжэ хэлэхэ: «Бурханаймнай маанадтай байгаагүйһөө боложо, энэ муу юумэн бидэниие дайраа бэшэ гү?»

¹⁸ Ондоо бурхадта мүргэһэнэйнь түлөө, хэһэн бүхы муу муухай юумэнэйнь түлөө Би тэрэ үедэ тэдээндэ туһалхаяа эрид арсахаб.

¹⁹ Зай, иигээд өөһэдтөө энэ дуу бэшэгты. Израилиин улад зониие гэмнэхэдэмни, энэ дуун Минии гэршэ болохо, зониие тэрээндэ һургагты.

²⁰ Үбгэ эсэгэнэртэнь тангариглаһан, һүн далайн, зүгын балай урдажа байһан газарта Би тэдэниие асархаб. Тэдэнэр эдеэлжэ, садажа, таргалжа, ондоо бурхадта мүргэжэ эхилхэ. Намайе тоохоёо болижо, Минии хэлсээ эбдэхэ.

²¹ Тэдэниие олон муу юумэнэй, мүн гай тодхорой дайрахада, энэ дуун тэдэнэй буруу байһые гэршэлхэ. Юуб гэхэдэ, уг удамыньшье энэ дууе мартаагүй байха бшуу. Би тангариглаһан газартаа үшөө тэдэниие асараадүй байнаб, гэбэшье тэндэ юу хэхэеэ һанаһыень мэдэнэб.

²² Тэрэл үдэртөө Моисей дуу бэшэжэ, Израилиин арад зониие тэрээндэ һургаба.

²³ Удаань Эзэн Нүүнэй хүбүүн Иисүүстэ захирба: – Хатуу шанга, эрэлхэг зоригтой бай, юуб гэхэдэ, Израилиин арад түмэниие Минии тангариглан найдуулһан газарта хүтэлэн абаашахаш. Би шамтай суг байхаб.

Моисей арад зониие һэргылнэ

²⁴ Моисей тэрэ һургаалай бүхы үгэнүүдые бултыень ном соо бэшэжэ,

²⁵ Эзэнтэй баталһан хэлсээнэй ханза абаад ябадаг левидүүдтэ хандаба:

²⁶ – Һургаалай энэ ном абагты, тиигээд Эзэн Бурхантаяа баталһан хэлсээнэйнгээ ханзын хажууда табигты. Улад зоной урдаһаа тулахадам, тэрэ гэршэ болохо.

²⁷ Зоной үсэдые, өөрынхиеэ табихаяа һанадаггүйе мэдэнэб. Минии бүхы наһанай үргэлжэлдэ тэдэ Эзэндэ үсэрхэжэ байна. Гээгдэһэнэйм удаа бүри үсэд болохо юм бэшэ гү?

²⁸ Минии урда обогуудайнгаа ахамадуудые, хинадаг дарганарые суглуулагты. Тэдээндэ сэхэ өөһэдтэнь эдэ үгэнүүдые хэлэхэб, тэдэнэй урда гэршэ болгон огторгой газар хоёрые дуудахаб.

²⁹ Би мэдэнэб: минии нүгшэһэнэй удаа зон ёһоо алдаха, минии заабарилһан харгы замһаа хадуурха. Нэгэ хэды сагай үнгэрхэдэ, тэдэ гай гасалантай дайралдаха, юуб гэхэдэ, Эзэнэй муу гэжэ тоолодог юумэ хэхэеэ байна, өөһэдынгөө хэрэгүүдээр тэдэ Эзэниие сухалдуулха.

Моисейн дуун

³⁰ Израилиин бүхы улад зон сугларжа, Моисей тэдээндэ бултандань сэхэ энэ дууе, бүхы үгэнүүдыень эсэс хүрэтэрынь иигэжэ үгүүлэн дуулаба: