Хуули дабталга 30 - Библи

Нютагтань бусаалгын эрхэ нүхэсэлнүүд

¹ Үреэл хараал хоёрой нэгые шэлэхэ тухай би таанадта хэлээб. Минии хэлэһэн эдэ бүхы үгэнүүдэй – үреэл мүн хараал шэрээлнүүдэй таанадта хүрэхэдэнь, Эзэн Бурханайнгаа ондоо арадуудай дунда таанадые тараан ажаһуулгахада, ойлгожо, тэрэ шэлэхэ зүйлнүүд тушаа бодолгото боложо эхилхэт.

² Хэрбээ таанадай мүн үри һадаһадайтнай Эзэн Бурхандаа эрьежэ, бүхы зүрхэ сэдьхэлээрээ хойноһоонь дахажа, үгыень дуулабал,

³ Эзэн таанадые хайрлажа, баряанһаа бусаажа, арадууд хоорондуур тарааһанаа һөөргэнь та бүгэдые суглуулан асарха, үршөөл хайраяа бэлэглэхэ.

⁴ Тэнгэриин хирхаг хүрэтэр тараагдаһан байгаашье һаатнай, Эзэн Бурхантнай таанадые суглуулжа, тэндэһээ һөөргэнь асархал.

⁵ Элинсэг хулинсагайтнай газарта Эзэн таанадые асарха, тэрэ газар дахин танай болохо. Эзэн таанадта үршөөл хайраяа бэлэглэжэ, үбгэ эсэгэнэрһээтнай үшөө үнэр баян, амжалта түгэс таанадые болгохо байна.

⁶ Эзэн Бурхантнай таанадые болон уг удамыетнай Өөр руунь зүрхэ сэдьхэлээрээ тэгүүлдэг болгохо, тиихэдэнь Эзэн Бурхандаа бүхы зүрхэ сэдьхэлээрээ дурлахат, иигэжэ амиды мэндэ үлэхэт.

⁷ Тэрэ эдэ бүхы хараал шэрээлнүүдые дайсадтатнай һөөргэн эрьюулэн эльгээхэ, юуб гэхэдэ, тэдэнэр таанадые үзэн ядадаг, намнадаг бшуу.

⁸ Таанад һөөргөө эрьежэ, дахин Эзэнэй үгэ дууладаг болохот, мүнөөдэр минии таанадта дамжуулан хэлэһэн Тэрэнэй бүхы захяа заабаринуудые сахин дүүргэдэг байхат.

⁹ Танай бүхы хэрэгүүдые Эзэн Бурхантнай угаа урагшатай болгохо, олон үхибүүдые үршөөхэ, олон түл, баян ургаса үреэн үгэхэ. Тэрэ таанадта эльгэтэй байжа, һайн юумэ таанадта хэхэдээ баярлаха. Үбгэ эсэгэнэртэтнай һайн юумэ хэхэдээ мүн лэ баясадаг бэлэй.

¹⁰ Эзэн Бурханайнгаа үгэ дуулажа, һургаалай энэ ном соо бэшэгдэһэн Тэрэнэй захяа заабаринуудые, хуули ёһонуудые сахин дүүргэгты. Бүхы зүрхэ сэдьхэлээрээ Эзэн Бурхандаа этигэн эрьегты.

Ами наһан ба үхэл хатал

¹¹ Мүнөөдэр минии дамжуулан хэлэһэн захяа заабаринууд таанадай ойлгоходо тиимэшье хэсүү зүйл бэшэ.

¹² Тэнгэридэ байгаа зүйл бэшэ. «Маанадай шагнахын, тэдэниие сахин дүүргэхын тула тэнгэри өөдэ хэн гараха, бидэндэ асарха юм бэ?» гэжэ хэлэхээр юумэн бэшэ.

¹³ Далайн саана тэдэ байна бэшэ. «Хэн далайе гаталан, маанадта тэдэниие асаржа, шагнуулжа, бидэниие сахин дүүргүүлдэг болгохо гээшэб?» – гэжэ хэлэхын аргагүй.

¹⁴ Бурханай үгэ шамтай хамта байна, хэлэ амандашни, зүрхэ сэдьхэлдэшни оршоно, яагаад сахихаб гэжэ хэлэжэшье шадахат.

¹⁵ Анхарагты, би таанадта ами наһан ба үхэл хаталай, аза жаргал ба гай зоболонгой нэгыень шэлэхые мүнөөдэр дурадханаб.

¹⁶ Би таанадта мүнөөдэр юу дамжуулан захинабиб гэбэл, Эзэн Бурхандаа дуратай байхыетнай, Тэрэнэй захирһаар ажаһуухыетнай, Тэрэнэй захяа заабаринуудые, хуулинуудые, ёһо гуримуудые сахин дүүргэхыетнай. Тиигэбэл, амиды мэндэ байхат, үнэр баян болохот, эзэмдэхэеэ таанадай шэглэн ошожо байһан газарта Эзэн Бурхантнай таанадые үреэхэ юм.

¹⁷ Теэд таанад Эзэнһээ буруу хаража, Тэрэниие дуулаагүй гээшэ һаа, хэн нэгэнэй үгэдэ орожо, ондоо бурхадта һүгэдэн мүргэжэ байгаа гээшэ һаа,

¹⁸ заабол хосорхот гэжэ таанадта мүнөөдэр би соносхоноб! Иордан гол гаталан, эзэмдэхэеэ ошожо байһан газар дайдадаа таанад удаан ажаһуухагүйт.

¹⁹ Мүнөө гэршэ болохыень огторгой газар хоёрые дууданаб: ами наһан ба үхэл хаталай, юрөөл ба хараал шэрээлэй нэгыень шэлэхые би мүнөөдэр таанадта дурадханаб. Өөһэдын болон үри һадаһадайнгаа амиды мэндэ ажаһуухын тула ами наһа шэлыт!

²⁰ Эзэн Бурхандаа дуратай байгты, Тэрэнэйнгээ үгэ дуулагты, Тэрээндээ үнэн сэхэ байгты. Тиигэбэлтнай, танай үбгэ эсэгэнэртэ – Абраһаам, Исаак, Яков гэгшэдтэ «үгэхэб» гэжэ тангариглан найдуулһан газар дайда дээрээ таанадта Тэрэ ута наһа үршөөхэл.