Хуули дабталга 29 - Библи

Моһаабтахи хэлсээн

¹ Хорээб хадын хажууда Эзэн Израилиин арад түмэнтэй хэлсээ баталһан байна. Тэрээнһээ гадна Моһаабай газар дайдада нэмэлтэ үшөө нэгэ хэлсээ тэдээнтэй баталхыень Эзэн Моисейдэ захирба. Тэрэнь энэ.

² Моисей Израилиин улад зониие дуудажа, иигэжэ тэдээндэ хэлэбэ: – Египедэй газар нютагта фараондо, тэрэнэй бүхы түшэмэлнүүдтэ, бүхы газар дайдадань Эзэнэй юу хэһыень өөһэдөө нюдөөрөө хараа бэлэйт.

³ Ямар ехэ гай тодхор, агууехэ дүлгэ тэмдэгүүдые, гайхамшагта үзэгдэлнүүдые Тэрэнэй хэһые таанад хараа һэнта.

⁴ Харин Эзэн юунэй болоһые ойлгохо ухаа, хараха нюдэ, шагнаха шэхэ таанадта мүнөө болотор үгөөгүй.

⁵ Дүшэн жэл соо Тэрэ таанадые элһэн сүл губяар хүтэлэн ябаа. Энэ саг соо хубсаһантнайшье һанги набта болоогүй, гуталтнайшье һалаагүй,

⁶ эдеэ хоолшье баряагүйт, үзэмэй дараһан архи, шара ундаашье уугаагүйт. Тэрэ – Эзэн, танай Бурхан, гэжэ та бүгэдын мэдэхын тула энэ хэгдээ.

⁷ Энэ газарта ерэхэдэтнай, манай урдаһаа Хэшбооной Сиһоон ба Башаанай Оог хаашуул дай үүдхэн добтолоо һэн. Теэд бидэ тэдэниие диилээбди.

⁸ Тиигээд тэдэнэй газар абажа, Рэүбээн, Гаад гэгшэдэй обогуудта, мүн Мэнашшээ гэгшын обогой хахадтань үгөө бэлэйбди.

⁹ Энэ хэлсээнэй бүхы захяа заабаринуудые сахин дүүргэгты. Тиигэбэл, хэһэн хэрэг бүхэнтнай урагшатай байха.

¹⁰ Таанад бултадаа – удамаршад, уг изагуурай ахалагшад, ахамадууд, хинадаг дарганар, Израилиин бүхы улад зон Эзэн Бурханайнгаа урда мүнөө зогсонот.

¹¹ Үхи хүүгэдтнай, һамгадтнай, таанадай дунда ажаһуугша ерүүл зон – түлеэ залһа хахалагшаһаа эхилээд уһа зөөгшэд хүрэтэрөө бултадаа эндэ байна.

¹² Эзэн Бурхантаяа хэлсээ баталхын, шахаа тангаригаа үгэхын тула эндэ ерэнхэйт. Эзэн Бурхантнай хэлсээ мүнөөдэр таанадтай баталхань.

¹³ Таанадта хэлэһэнэйнгээ, мүн үбгэ эсэгэнэртнай болохо Абраһаам, Исаак болон Яковта тангариглаһанай ёһоор, Тэрэ таанадые Өөрын арад болгохын, мүн Өөрөө танай Бурхан болохын тула эндэ таанадые суглуулаа.

¹⁴ Эзэн энэ хэлсээ, шахаа тангариг ганса маанадтай батална бэшэ,

¹⁵ урдань зогсоошо бидэнһээ гадна мүнөөдэр бидэнэй дунда үшөө үгы байһан уг удамтаймнай Тэрэ энэ хэлсээ батална.

¹⁶ Египедэй газар дайдада яажа ажаһууһанаа, арадуудай хоорондуур аян зам гаталан иишээ ерэһэнээ һаныт.

¹⁷ Модоор, шулуугаар, мүнгөөр, алтаар хэһэн жэгшүүритэй шүтөөнүүдыень хараа бэлэйт.

¹⁸ Эзэн Бурханаа орхиһон эрэ хүн гү, али эхэнэр, гэр бүлэ гү, али обог аймаг таанадай дунда бү үзэгдэг. Ондоо арадуудай бурхадта һүгэдэхэеэ хэншье бү ошог, юуб гэхэдэ, иимэ зон хоротой, гашуун ургамалай үндэһэндэл адли болоно бшуу.

¹⁹ Энэ хараал шэрээл дуулажа, хэн нэгэн досоогоо бардамлажа, «Һанаһаараа юумэ саашадаашье хэжэ байхаб, муу юумэн намда хүрэхэгүй» гээд һанажа болохо. Теэд иимэ хүнһөө боложо, ондоошье зон муу юумэндэ дайрагдажа магад.

^20-21 Иимэ хүниие Эзэн хүлисэхэгүй, тэрээндэ ехэ сухалдажа, зэбүүрхэжэ, Израилиин бүхы обогуудһаа тэрэниие илган гаргаха, хюдаха. Хуули соо, тогтооһон хэлсээнэй хуйламал бэшэг соо баталагдаһан хараал шэрээл иимэ хүндэ хүрэжэ, тэрэнэй нэрэшье алтан дэлхэй дээрэ мартагдаха. Эзэн иигэжэ тэрэниие хэһээхэ.

²² Саашанхи үетнай, танай һүүлээр ажаһууха уг удамтнай, холын газар нютагһаа ерэһэн хариин зон тэрэ газар дайдын гай тодхор, Эзэнэй тэрэ газарта дэлгэрүүлһэн зоболон хаража, иигэжэ хэлэхэ:

²³ «Бүхы газар хүхэр ба дабһан, гал дүлэн. Үрэһэ хүрэнгэ тарихын, юумэ ургуулхын аргагүй. Содом, Гоморро, Адмаа, Цэбоһиим хотонуудые уур сухал дундаа Эзэнэй хюдаһанай һүүлээр мэтэ ямаршье ногоон тэрээн дээрэ урганагүйл».

²⁴ Ондоо бусад арадууд иигэжэ асууха: «Юундэ Эзэн энэ газарта иимээр хандааб? Юундэ иимэ ехээр уурлаа, сухалдаа гээшэб?»

²⁵ Харюунь иимэ байха: «Египедэй газар дайдаһаа гаргахадаа, Эзэнэй, өөһэдынь үбгэ эсэгэнэрэй Бурханай, тэдээнтэй баталһан хэлсээе өөһэдынь мартаһанайнь түлөө.

²⁶ Израилиин улад зон танихагүй, ондоо, Эзэнэй хориһон бурхадта мүргэжэ эхилээ.

²⁷ Тиихэдэнь Эзэн энэ газар дайдада уурлажа, тус ном соо бэшээтэй бүхы хараалнуудые тэдээндэ эльгээһэн байна.

²⁸ Уур сухалтай, хилэнсэгтэ, ехэ дураа гутаһан Эзэн тэдэниие газарһаань үлдэн гаргажа, хариин нютаг руу эльгээгээ. Мүнөө тэдэнэр тэндээ байһаар».

²⁹ Гансал Эзэн Бурханаймнай мэдэхэ нюуса зүйлнүүд байдаг. Харин Тэрэ бидэндэ Өөрынгөө һургаал эли болгоо, бидэ болон үхи хүүгэднай тэрэнииень хододоо сахин дүүргэн ябаха ёһотойбди.