Хуули дабталга 27 - Библи

Шулуун дээрэ бэшээтэй Бурханай һургаал

¹ Моисей болон Израилиин аха захатан арад зонтой хөөрэлдэжэ, Моисей зондо хандан, иигэжэ хэлэбэ: – Мүнөөдэр минии дамжуулһан бүхы захяа заабаринуудые дүүргэн байгты.

² Иордан гол гаталжа, Эзэн Бурханайтнай үгэжэ байһан газарта ерэхэдээ, тэрэ үдэр томо шулуу бодхоон табижа, сагаан шохойгоор будагты.

³ Тэдээн дээрэ энэ һургаалай бүхы үгэнүүдые бэшэгты. Эзэн Бурханайнгаа үгэжэ байһан, һүн далайн, зүгын балай урдажа байһан газарта ороходоо,

⁴ ара таладатнай Иордан голой үлэхэдэ, минии мүнөөдэр захирһанай ёһоор, тэдэ шулуунуудые Эбаал хада дээрэ табигты, тиигээд сагаан шохойгоор тэдэниие будагты.

⁵ Шулуугаар Эзэн Бурхандаа үргэлэй шэрээ баригты. Теэд барихадаа, түмэр түдэгэ хэрэглэнгүй баригты.

⁶ Тиигэхын тула түгдэрөөгүй бүхэли шулуунуудаар Эзэн Бурхандаа үргэлэй шэрээ бариха ёһотойт. Тэрээн дээрэ Эзэн Бурхандаа түгэс шатаалта үргэл үргэгты.

⁷ Амгалан байдалай түлөө үргэл үргэжэ, тэндээ эдеэлжэ, Эзэн Бурханайнгаа урда сэнгэжэ, хүхилдэжэ байгты.

⁸ Шулуунууд дээрэ Бурханай һургаалай бүхы үгэнүүдые ойлгомоор, эли тодоор бэшэгты.

⁹ Удаань Моисей санаарта левидүүдтэй хамта Израилиин улад зондо иигэжэ тунхаглаба: – Израилиин арад зон! Шэмээгүй соносогты! Энэ үдэр таанад Эзэн Бурханайнгаа арад түмэн болобот.

¹⁰ Тиимэһээ Эзэн Бурханайнгаа үгэ дуулан ябагты, минии мүнөөдэр таанадта захин дамжуулһан Тэрэнэй захяа заабаринуудые, хуули ёһонуудые сахин дүүргэгты!

Арбан хоёр хараал

¹¹ Моисей тэрэ үдэр арад түмэндэ үшөө иигэжэ захиба:

¹² – Иордан гол гаталхадатнай, Симеоной, Левиин, Иудын, Иссахаарай, Иосифой, Бэньямиинэй обогуудай улад зон Гэризиим хада дээрэ зогсожо, арад зониие юрөөг.

¹³ Харин Эбаал хада дээрэ Рэүбээн, Гаад, Ашээр, Зэбүлүүн, Даан, Напталии гэгшэдэй обог зон зогсожо, харааг.

¹⁴ Левидүүд шангаар хашхаран, Израилиин улад зондо иигэжэ дуулгаха:

¹⁵ «Хэн нэгэн модо, шулуугаар гү, али шудхажа шүтөөн бүтээгээд, нюусаар тэрээниие табяа һаа, хараалай ехэ хараал өөртөө шэнгээхэ! Юуб гэхэдэ, тэдэ хадаа дарханай гараар хэгдэһэн, Эзэндэ жэгшүүритэй муухай юумэн гээшэл». Тиихэдэнь бүхы арад зон харюудань хэлэхэ: «Болтогой!»

¹⁶ «Эсэгэ, эхэеэ хүндэлдэггүй хүн хараалай ехэ хараал шэнгээхэ!» Бүхы арад зон харюусаха: «Болтогой!»

¹⁷ «Хүршынгөө хилэнүүдэй тэмдэгүүдые ондоо тээшэнь болгоһон хүн хараалай ехэ хараал шэнгээхэ!» Бүхы арад зон харюусаха: «Болтогой!»

¹⁸ «Һохор хүниие мэхэлжэ, харгыһаань хадууруулһан хүн хараал шэнгээхэ!» Бүхы арад зон харюусаха: «Болтогой!»

¹⁹ «Ерүүл зоной, үншэн хэнзын, үбгэеэ гээһэн эхэнэрэй эрхэнүүдые эбдэһэн хүн хараалай ехэ хараал шэнгээхэ!» Бүхы арад зон харюусаха: «Болтогой!»

²⁰ «Эсэгынгээ һамгантай унтажа, нэрынь гутааһан хүн хараал шэнгээхэ!» Бүхы арад зон харюусаха: «Болтогой!»

²¹ «Ямар нэгэн малтай хурисал үзэжэ байһан хүн хараалай ехэ хараал шэнгээхэ!» Бүхы арад зон харюусаха: «Болтогой!»

²² «Түрэһэн эгэшэтэеэ гү, али дүү басагантаяа, үгышье һаа, эсэгэ нэгэтэй гү, али эхэ нэгэтэй эгэшэ, дүүтэеэ унтаһан хүн хараалай ехэ хараал шэнгээхэ!» Бүхы арад зон харюусаха: «Болтогой!»

²³ «Хадам эжытэеэ унтажа байһан хүн хараал шэнгээхэ!» Бүхы арад зон харюусаха: «Болтогой!»

²⁴ «Нэгэ яһанай хүнөө нюусаар хороогшо нэгэн хараалай ехэ хараалтай!» Бүхы арад зон харюусаха: «Болтогой!»

²⁵ «Мүнгэ абажа, гэмгүй хүниие алажа байгааша хүн хараалай ехэ хараал шэнгээхэ!» Бүхы арад зон харюусаха: «Болтогой!»

²⁶ «Бурханай энэ һургаалай үгэнүүдые бэелүүлдэггүй, тэдэниие сахин дүүргэдэггүй хүн хараалай ехэ хараал шэнгээхэ!» Бүхы арад зон харюусаха: «Болтогой!»