Хуули дабталга 25 - Библи

¹ Хоёр хүнэй хоорондо зарга хэрэгэй гараа гээшэ һаань, хоюулаа сүүдтэ ошог. Тэндэ хэрэгыень шүүбэрилэн хаража, хэниинь зүб, хэниинь бурууб гэжэ шиидхэхэ.

² Зэмэтэй нэгыень сохихо хэрэгтэй гэжэ шүүбэрилэгшын шиидэбэл, тэрэ хүниие хэбтүүлхыень захираг. Тиигээд тэрэ хүнэй сохюулжа байхадань шүүбэрилэгшэ хаража байха ёһотой. Хэды ехэ гэм тэрэ хүн хээб, тэды дахин тэрэниие сохихо ёһотой.

³ Дүшэ дахин тэрэниие сохиходо болохо. Харин энээнһээ ехээр хэтэрүүлээ гээшэ һаа, нэгэ яһанай болохо тэрэ хүнэй ами наһые юуншье гэжэ тоодоггүйтэй жэшээтэй болохош.

⁴ Таряа тээрмэдэжэ байһан сарай эдихэдэнь, һаалта бү хэ.

Хүбүүтэй болонгүй нүхэрөө алдаһан эхэнэр тухай хуули ёһо

⁵ Аха дүүнэрэй хамта ажаһуудаг байгаад, үхи хүүгэдгүй нэгэнэйнь гээгдэшоо гээшэ һаа, тэрэнэй һамган эгээлэй хүндэ хадамда гараха ёһогүй. Хадам аха гү, али хадам дүүнь тэрэниие һамган болгожо абаха, хамта һууха ёһотой.

⁶ Тэрэ һамганһаа гараһан түрүүшын үхибүүн наһа бараһан аха-дүүгэйнь нэрэ зүүжэ ябаха, гуламтыень залгамжалха болоно. Иигэжэ тэрэнэй нэрэ Израиль соо мартагдахагүй, үлэхэ юм.

⁷ Харин нүгшэһэн ахынгаа гү, али дүүгэйнгээ һамга абахаяа тэрэнэй һанаагүй һаань, бэринь хотын бартаануудай дэргэдэ, аха захатанда ошожо, иигэжэ хэлэг: «Хадам аха (али хадам дүү) Израиль соо дүүгэйнгээ (али ахынгаа) нэрэ үлөөхэһөө, намайе һамган болгожо абахаһаа арсана».

⁸ Тиихэдэнь тэрэ хүнэй ажаһуугша хотын аха захатан тэрэниие дуудажа асаруулаад, хөөрэлдэхэ ёһотой. Тэрэнэй үсэрхэжэ, «ахынгаа (дүүгэйнгээ) һамга абахагүйб» гэжэ хэлээ һаань,

⁹ бэринь аха захатанай хараһаар байтар тэрээндэ дүтэлжэ, хүлһөөнь шаахайень мулталан абажа, нюуртань нёлбоод, иигэжэ хэлэг: «Ахынгаа (дүүгэйнгээ) гэр бүлые дахин һэргээхэеэ һанадаггүй хүндэ иигээд хандадаг юм».

¹⁰ Иигэжэ тэрэ хүнэй гэр бүлые «шаахайгаа мулталуулһан хүнэй гэр бүлэ» гээд Израиль соо нэрлэдэг болохо.

Элдэб ёһо гуримууд

¹¹ Хоёр хүнэй наншалдажа байхада, нэгэнэйнь һамган сохижо байһан хүнэй гарһаа үбгэеэ абарха гэжэ дүтэлөөд, гараа һарбайжа, нүгөөдые бэлгэһээнь баряа гээшэ һаань,

¹² тэрэнэй гарые таһа сабшагты, бү хайрлагты.

¹³ Юумэ хэмжэжэ байхадаа, хүниие бү мэхэлэ: мэшээг соошни хоёр ондоо – бага, ехэ шулуун гиирнүүд байха ёһогүй;

¹⁴ таряа талха хэмжэдэг хоёр ондоо амһарта – бага, ехэ – гэртэшни байха ёһогүй.

¹⁵ Һайн, тон зүб шулуун гиирнүүдые болон амһартануудые хэрэглэ. Тиигэбэл, Эзэн Бурханайнгаа үгэжэ байгаа газарта үни удаан ажаһуухаш.

¹⁶ Мэхэ гохо хэжэ байгааша бүхэниие Эзэн Бурхантнай үзэн ядадаг.

Амалээгүүдые алагты!

¹⁷ Египедһээ гараад ябажа байхадатнай амалээг арад зоной таанадта юу хэһые бү мартагты.

¹⁸ Тэдэнэр Бурхан буянһаа айгаагүй, аян замда ябахадатнай амадажа, ядарһан зүдэрһэн таанадта ара талаһаатнай добтолоод, хүсэгүй болоһондоо гээгдээд ябаһан зонииетнай алаа бэлэй.

¹⁹ Эзэн Бурханайтнай эзэлхыетнай танай хуби гэжэ үгэжэ байгаа газар дайдада ороходоо, оршон тойронхи дайсадһаатнай Тэрэнэй амаруулхадань, амалээг арад тухай дурсалгашье алтан дэлхэй дээрэ бү үлөөгты, бултыень хюдагты! Энээн тушаа бү мартагты!