Хуули дабталга 24 - Библи

Һамга абаха мүн һалаха ушарнууд

¹ Хэрбээ хэн нэгэн һамга абаад, удаань тэрээндэ хандасань хубилжа, тэрээнһээ жэрхэжэ эхилээ һаа, һалаха тухай гэршэлгэ бэшэжэ, гартань барюулаад, гэрһээ эльгээг.

² Тэрэ һамган гэрһээнь гаража ошоходоо, ондоо хүндэ хадамда гаража болохо.

³ Теэд нүгөөдэшье үбгэнэйнь тэрээндэ дурагүйтэжэ, һалаһан тухай гэршэлгэ бэшэжэ үгөөд, гэрһээ эльгээгээ һаань, үгышье һаа, наһа бараа һаань,

⁴ түрүүшын үбгэниинь тэрэниие дахин һамга абаха ёһогүй. Юуб гэхэдэ, тэрэ һамган бузарлагдаа. Энэ хэрэг Эзэндэ жэгшүүритэй муухай байхал. Эзэн Бурханайнгаа хуби болгон үгэжэ байһан газар дайда дээрэ иимэ нүгэл шэбэл бү хэгты.

Бусад ёһо гуримууд

⁵ Хэн нэгэн һая һамга абаа гээшэ һаа, дайн дажарта бү мордог, ямаршье ажал тэрээндэ даалгаха хэрэггүй. Нэгэ жэлэй туршада тэрэ сүлөөтэй гэртээ байжа, залуу һамгаяа жаргуулха ёһотой.

⁶ Урьһаар хэн нэгэндэ юумэ үгэһэнэй түлөө орондонь барюулга гэжэ хэншье тэрэнэй шулуун тээрмэ абаха ёһогүй. Юуб гэхэдэ, ами наһаяа залгадаг бүхы эдеэ хоолыень тэрэ хуряан абаһандал болоно ха юм.

⁷ Ямар нэгэн хүнэй өөрынгөө Израилиин арад түмэнһөө хэнииешьеб хулгайлжа, богоол болгон худалдаа гээшэ һаань, тэрэниие алаха хэрэгтэй. Иигэжэ өөһэдынгөө дундаһаа муу юумэ сарагты.

⁸ Арһанай халдабарита үбшөөр үбшэлөө гээшэ һаа, левит санаартадта минии дамжуулһан бүхы һургаалнуудые жэншэдгүй сахин дүүргэн байгты.

⁹ Египедһээ гараад ябажа байхадатнай Эзэн Бурханайтнай Мириамда юу хэһые бү мартагты.

¹⁰ Хүндэ зээлеэр юушьеб үгөө гээшэ һаа, тэрэнэй түлөө барюулга абахын тула гэртэнь бү оро.

¹¹ Газаа байгаарай. Шамһаа урьһалһан тэрэ хүн барюулга гэжэ хубсаһаяа гэрһээ өөрөө гаргажа үгэг лэ.

¹² Тэрэнэй үгытэй гээшэ һаань, һүниндөө тэрэ барюулгыень өөртөө бү байлга,

¹³ тэрэл үдэшэндөө бусаагаарай, тиихэдэшни тэрэ унтаха хубсаһатай боложо, шамайе үреэхэл. Эзэн Бурхантнай зүб, һайн хэрэг хээ гэжэ шамайе тоолохо.

¹⁴ Нэгэ яһанай гү, али танай газар дайдада, танай хото соо ажаһуудаг ерүүл хүншье һаань, хүлһэншэниие, үгытэй, мүн угаа ядуу байдалтай хэн нэгэниие бү харшала.

¹⁵ Наранай орохын урда тээ үдэрэйнь түлбэриие үгэдэг бай, юуб гэхэдэ, тэрэ үгытэй, тиигээд энэ мүнгэ ехэ хүлеэнэ. Түлөөгүй һаашни, тэрэ Эзэндэ шам тухай гомдол бариха, тиигээд ши нүгэлтэй болохош.

¹⁶ Үхибүүдэйнь хэһэн гэмтэ ябадалай түлөө эсэгэнэрынь, эсэгэнэрэйнь хэһэн гэмтэ ябадалай түлөө үхибүүдынь саазалжа болохогүй. Харин өөрын хэһэн гэмтэ ябадалайл түлөө хүн үхэлэй саазада хүртэхэ зэргэтэй.

¹⁷ Ерүүл хүниие, үншэн хэнзые гажа буруу бү шүүбэрилэ. Зээлеэр абаһан юумэнэйнь түлөө барюулга болгон бэлбэһэн эхэнэрэй хубсаһа бү аба.

¹⁸ Египедтэ богоол байһанаа, Эзэн Бурханайтнай тэндэһээ таанадые гаргажа сүлөөлһыень бү мартагты. Тиимэһээ би таанадта эдэ бүгэдые үгытэй зоной аша туһада хэхыетнай захирнаб.

¹⁹ Өөрынгөө таряалан дээрэ ургаса хадажа байхадаа, поолидо нэгэ боолто таряа мартаа гээшэ һаа, һөөргөө бү эрье. Ерүүл хүндэ, үншэн хэнзэдэ, бэлбэһэн эхэнэртэ тэрэ хүртэг. Тиигэбэлшни, Эзэн Бурхантнай бүхы хэһэн юумыешни үреэхэл.

²⁰ Оливын модо сохин, жэмэсыень суглуулжа байхадаа, һөөргөө эрьен, үлөөшыень суглуулжа бү бай. Ерүүл хүндэ, үншэн хэнзэдэ, бэлбэһэн эхэнэртэ тэрэ үлэг.

²¹ Үзэмэй жэмэсэй сэсэрлигһээ үзэм хуряагаад, үлөөшыень дахин бү түү. Эдэ бүгэдэ ерүүл хүндэ, үншэн хэнзэдэ, бэлбэһэн эхэнэртэ үлэг лэ.

²² Египедтэ богоол байһанаа бү мартагты. Тиимэһээл би иимэ юумэ захирнаб.