Хуули дабталга 23 - Библи

Эзэнэй улад зоной тоодо хэн байха ёһогүйб

¹ Эмнюулһэн гү, али гэмтэһэн заһаатай хүн Эзэнэй улад зоной дунда тоологдохо ёһогүй.

² Тэдэнэй дунда мүн лэ янхан эхэнэрэй хүбүүнэй байхань хорюултай. Тэрэнэй уг удам арбадахи үе хүрэтэрөө Эзэнэй зонтой хамтарха ёһогүй.

³ Аммоон болон моһааб арадуудай хэн нэгэн, мүн үри хүүгэдынь арбадахи үе хүрэтэрөө Эзэнэй арад зонтой хамта байха эрхэгүй. Хэзээшье!

⁴ Юуб гэхэдэ, таанадай Египедһээ гараад ябаха үедэ тэдэнэр хара уһа, хилээмэ таанадһаа харамнаа бэлэй. Үшөө таанадта хараал шэнгээхыень Месопотамиин Пэтоор хотын Бэһоорой хүбүүн Балаһаамые тэдэнэр хүлһэлөө һэн.

⁵ Теэд Эзэн Бурхантнай Балаһаамай үгэ дуулаагүй, тэрэнэй хараалые танда үреэл болгон хубилгаа, юундэб гэхэдэ, Эзэн Бурхантнай танда дуратай.

⁶ Амиды мэндэ байгаа сагтаа аммоон болон моһааб арадуудта ажана амгалан байдал бү хүсэгты, тэдээндэ бү туһалагты.

⁷ Эдоом арадые шоо бү үзэгты, юуб гэхэдэ, тэдэнэр таанадтай аха дүү арадууд болохо. Египедэй арад зониие мүн лэ шоо бү үзэгты, юуб гэхэдэ, таанад тэдэнэй газар дайдада ерүүл зон байгаа ха юмта.

⁸ Тэдэнэй гурбадахи үеын үхибүүд Эзэнэй улад зоной дунда тоологдохо аргатай.

Буусаяа сэбэр байлгагты

⁹ Дайсадайнгаа урдаһаа байлдан ошоходоо, бузартаха ушарһаа һэргылэн байгты.

¹⁰ Хэрбээ һүниндөө хэн нэгэнэй үрэнь гаража, мэдэнгүй гэнтэ бузарлагдаа һаа, тэрэ хотон хүреэнһөө гаража ошог, тиигээд һөөргөө бү оруужан.

¹¹ Үдэшэ болоходонь, тэрэ бэеэ уһаар угааха, тиигээд наранай ороходо, һөөргөө хотон хүреэндээ бусаха аргатай.

¹² «Мори хараха» газартнай хотон хүреэнһөө гадуур байха ёһотой.

¹³ Дайнай зэр зэбсэгһээ гадна ондоо модо абаад ябагты. Бэеэ заһахадаа, тэрээгээр нүхэ малтажа, үдхэнөөр гараһанаа булагты.

¹⁴ Юундэб гэбэл, Эзэн Бурхантнай таниие хамгаалхын, мүн дайсадаа диилэхэ, даагаяа һүүлдэхэдэтнай туһалхын тула хотон хүреэндэтнай таанадтай хамта байлсана. Тиимэһээ Тэрэнэй муухай юумэ хараха үзэхэгүйн, тиигээд таанадые орхихогүйн тула хотон хүреэнтнай арюун байха ёһотой.

Элдэб хуули ёһонууд тухай

¹⁵ Ямар нэгэ богоолой эзэнһээ тэрьелжэ ерээ гээшэ һаань, тэрэниие эзэндэнь бү бусаа.

¹⁶ Таанадай хажууда, шэлэһэн хото соогоо тэрэ ажаһуун байг лэ, ши тэрэниие бү харшала.

¹⁷ Шажан мүргэлэй тусхай ёһолол – хурисалда бэеэ зорюулһан эмэ, эрэшье хүн Израилиин улад зоной дунда бү үзэгдэг.

¹⁸ Эзэн Бурханайнгаа үргөө руу ямаршье ёһо гуримаар үндэһэлэн янхан эхэнэрэй гү, али янхан эрын олоһон мүнгэ бү оруулагты. Юуб гэхэдэ, эдэ бүгэдэ Эзэн Бурхандатнай жэгшүүритэй муухай юумэн гээшэ.

¹⁹ Өөрынгөө арад зоной хэн нэгэндэ мүнгэ гү, али эдеэ хоол, үшөөшье ондоо юумэ зээлеэр үгөө гээшэ һаа, түрэсэ тэрээнһээ бү нэхэ.

²⁰ Хариин хүнһөө түрэсэ абахадаш болохо, гэбэшье нэгэ арад яһанай болохо хүнһөө тэрэниие бү аба. Тиигээд байбалшни, Эзэн Бурхантнай эзэмдэхэеэ ошожо ябаһан газар дайдадашни шинии бүхы хэрэг үреэн байхал.

²¹ Эзэн Бурхандаа дашаа тангариг үгөө хадаа тэрэниие удаан болгонгүй бэелүүлэ. Юуб гэхэдэ, Эзэн Бурхантнай заабол тэрэниие шамһаа нэхэхэ, дүргээгүй һаа, нүгэлтэй болохош.

²² Дашаа тангариг үгөөгүй һаа, нүгэлгүй байхаш.

²³ Эзэн Бурхандаа һайн дураараа тангариг үгэнэш, тиимэһээ аманһаа унаһан үгэеэ дүүргэхэеэ оролдо.

²⁴ Израилиин хүнэй үзэмэй модоной сэсэрлигтэ ороходоо, үзэм хэдышье һаа, садатараа эдихэдэшни болохо, гансал амһарта руугаа тэрэниие хэжэ бү абааша.

²⁵ Израилиин хүнэй надхажа байгаа таряаланда ерэхэдээ, гараараа хоолос шобторон, орооһо эдихэдэшни болохо, харин хадуур далайжа, тэрэнэй ургаса бү олзоборило.