Хуули дабталга 22 - Библи

Үшөө бусад хуулинууд

¹ Израилиин хүнэй үгы болоһон үхэр гү, али хони харабал, бү орхи, эзэндэнь бусаа.

² Тэрэ хүнэй шамһаа холо ажаһуудаг байгаа һаань, үгышье һаа, хэнэй мал бэ гэжэ мэдэхэгүй һаа, өөрынгөө гэр руу тэрэниие туун абааша. Эзэнэйнь бэдэржэ олоходо тэрэниие бусаагаарай.

³ Хүнэй элжэгэ, хүнэй хубсаһа олобол, юрэдөө, Израилиин хүнэй үгы болоһон ямаршье эд зөөри олобол, иигээд лэ бусаагаарай. Иимэ заяг заршам хододоо баримтала.

⁴ Угсаатанайшни элжэгэн гү, али үхэр харгыдаа унаа гээшэ һаань, орхёод тэрэниие бү яба, унаһан малаа бодхооходонь эзэндэнь туһала.

⁵ Эхэнэр хүн эрэ хүнэй хубсаһа бү үмдэг, эрэ хүн эхэнэрэй хубсаһа бү үмдэг. Юуб гэхэдэ, Эзэн Бурхандатнай энэ ехэ муухай үйлэ хэрэг гээшэ.

⁶ Харгыда ябахадашни модон дээрэ гү, али газар дээрэ шубуунай уурхайн дайралдаа гээшэ һаань, тиихэдэ эхэ шубуун дальбараануудтаяа гү, али үндэгэнүүд дээрээ һуужа байгаа гээшэ һаань, дальбараануудтайнь, үндэгэнүүдтэйнь хамта эхыень бү аба.

⁷ Үндэгэнүүдыень, дальбараануудыень абахадашни болохо, харин эхыень таби. Иигээд байгаа һаашни, шамда һайн байха, удаан наһа наһалхаш.

⁸ Шэнэ гэр барихадаа, хушалтынь захаар түшэлгэнүүдые хэ. Тиигэбэл, хэн нэгэнэй хушалтаһаа унаа гээшэ һаань, ши энэ гай усалда зэмэтэй бэшэ байхаш.

Таарахагүй зүйлнүүд

⁹ Үзэмэй жэмэсэй сэсэрлигтэ хоёр ондоо үрэһэ хаяжа бү орхи. Хаяа һааш, тэрэ хорюултай болохо, ши тэрэниие эдихэ ёһогүйш.

¹⁰ Сар ба элжэгэ нэгэн доро хүллөөд, газар бү хахала.

¹¹ Хилгааһан болон маалинга утаһа хамтадхан нэхэһэн хубсаһа бү үмдэ.

¹² Сасаг хэжэ, үмдэдэг хубсаһанайнгаа дүрбэн тээһээнь тэрэниие уян бүхэлэ.

Хурисал тухай хуули ёһонууд

¹³ Хэн нэгэн һамга абажа, хамта унтажа, тиигээд тэрээндээ дурагүй болоод,

¹⁴ муу юумэ хэлэжэ, нэрыень гутаажа, тэрэ һамган тухай «Би тэрэниие абааб, унтааб, теэд басаган бэшэ байшоо» гэжэ хэлээ һаань,

¹⁵ басаганай эсэгэ, эхэнь хотын үүдэнүүдтэ ерэжэ, тэрэнэй басаган байһанай тэмдэгүүдые аха захатанда харуулаг.

¹⁶ Басаганай эсэгэ аха захатанда иигэжэ хэлэхэ: «Би басагаяа энэ хүндэ һамган болгожо үгөө һэм, теэд тэрэ дурагүй болоо.

¹⁷ Тиигээд муу юумэ басаган тухайм тараажа, басаганайм басаган байһыень олоогүй тухайгаа хэлэнэ. Харин минии басаганай басаган байһые гэршэлһэн зүйлнүүд энэл!» – гээд, хотын аха захатанай урда хубсаһыень дэлгэг лэ.

¹⁸ Тиихэдэнь хотын аха захатан тэрэ үбгэн болоһон хүниие хэһээхэ ёһотой.

¹⁹ Израилиин арад зоной басаган тухай муу һураг тэрэ тараагаа, тиимэһээ зуун шээкэл мүнгэнэй яла тэрээндэ ашагдаха, тиигээд басаганай эсэгэдэ энэ мүнгэн үгтэхэ ёһотой. Басаган хадаа тэрэ хүнэй һамган зандаа үлэг, тэрэ бүхы наһаараа тэрээнтэй һалажа шадахагүй.

²⁰ Харин хэлэһэн юумэниинь үнэн байжа, басаган байһанайнь тэмдэгэй олдоогүй гээшэ һаань,

²¹ тэрэ басагые эсэгынь гэрэй үүдэнүүдтэ аха захатан асаржа, хотын зон тэрэниие үхэтэрынь шулуудаг. Юуб гэхэдэ, тэрэ Израиль соо эшхэбтэр муухай юумэ хээ, эсэгынгээ гэртэ байхадаа забхай, янхан ябадал гаргаа. Өөһэдынгөө арадай дундаһаа муу юумэ иигэжэ үгы хэгты.

²² Үбгэнтэй һамгантай хэбтэжэ байһан хэн нэгэнэй олдоо гээшэ һаань, хоюулыень – тэрэ һамгые, мүн тэрээнтэй хэбтэжэ байһан эрэ хүниие алаха хэрэгтэй. Иигэжэ муу юумэ Израильһаа зайсуулагты.

²³ Ондоо хүндэ хадамлуулһан басага хэн нэгэн хүсэжэ, тэрээнтэй унтабал, тиихэдэ энэ хэрэгэй хото соо болоо гээшэ һаань,

²⁴ хоюулыень тэрэ хотын бартаануудта гаргажа, үхэтэрынь шулуудагты: басагые хото соо байһан аад, шашхаагүйнь түлөө, эрэ хүниие нэгэ яһанайнгаа хүнэй һамган болохо басагые хүсөөрөө эдлэһэнэйнь түлөө. Иигэжэ өөһэдынгөө дундаһаа муухай хэрэг сарагты.

²⁵ Хадамлуулһан басагые эрэ хүнэй хээрэ барижа, хүсөөрөө эдлээ гээшэ һаань, гансал эрэ хүниие алаха хэрэгтэй.

²⁶ Харин басаганда гар бү хүрэгты, ами наһыень хороомоор гэм зэмэ тэрэ хээгүй. Энэ хадаа нэгэ хүнэй нүгөөдэдэ добтолжо алаһантай жэшээтэй ха юм даа.

²⁷ Хадамлуулһан басагые тэрэ хээрэ оложо баряа. Басаганай хашхараашье һаань, абарха хүн байгаагүй.

²⁸ Хадамлуулаагүй басагые хэн нэгэнэй хаража, баряад, хүсөөрөө тэрэниие эдлэһэн тухайнь мэдэгдээ гээшэ һаа,

²⁹ басаганай эсэгэдэ табин шээкэл мүнгэ тэрэ үгэхэ ёһотой. Тиигээд басагые тэрэ эрэ хүн һамга абаха ёһотой, юуб гэхэдэ, хүсөөрөө эдлээ ха юм. Бүхы наһаараа тэрээнтэй тэрэ һалажа шадахагүй.

³⁰ Хэншье эсэгынгээ һамга өөрын һамган болгон абажа, нэрыень гутааха ёһогүй.