Хуули дабталга 20 - Библи

Дайн тухай ёһо гуримууд

¹ Дайсадайнгаа урдаһаа байлдаанда гарахадаа, таанадһаа олон моритой, дайшалхы тэргэтэй, сэрэгтэй байһыень обёороод, бү айгты, юуб гэхэдэ, Египедһээ гаргаһан Эзэн Бурхантнай таанадтай байһаар.

² Байлдаанда гарахадатнай санаартан дүтэлөөд, сэрэгшэдтэ хандаг,

³ иигэжэ хэлэг: «Израилиин арад, соносогты! Мүнөөдэр таанад байлдаанда орохотнай. Хатуу шанга зоригтой байгты, тэдээнһээ бү айгты, бү тэбдэгты, бү һүрдэгты!

⁴ Юундэб гэхэдэ, таанадай түлөө дайсантай тулалдахын, диилүүлхын тула Эзэн Бурхантнай таанадтай хамта ябана».

⁵ Ахамадууд сэрэгшэдтэ иигэжэ хэлэг: «Шэнэ гэр баряад, арюудхалгын ёһолол хээгүй хүн хэн байнаб? Ондоо хүнэй гэрыень арюудхахагүйн тула тэрэ хүн гэртээ бусаг. Юуб гэхэдэ, байлдаанда тэрэ унажа магад.

⁶ Хэн нэгэн үзэмэй модоной сэсэрлиг тарижа, жэмэсыень амталаагүй байбал, гэртээ бусаг. Ушар гэхэдэ, тэрэ байлдаанда унажа магад, тиихэдэнь ондоо хүн тэрэнэй жэмэс суглуулхал.

⁷ Хэн нэгэн басага хадамлаад, үшөө гэрлээгүй байбал, гэртээ бусаг. Юуб гэбэл, тэрэ дайнда унажа магад. Тиигэбэлнь, ондоо хүн тэрээнтэйнь гэрлэхэ бшуу».

⁸ Ахамадууд нэмэн иигэжэ хэлэг: «Хэн аймхайб, дээрэ зүрхэтэйб, бэшэ зониие һажаалдуулхагүйн, зоригыень мүхөөхэгүйн тула гэртээ бусаг».

⁹ Арад зондо хэлэхэ юумэеэ хэлээд, ахамадууд сэрэгшэдые хүтэлхэ сэрэгэй дарганарые томилог.

¹⁰ Эзэмдэхэ зорилготойгоор хото руу дүтэлхэдөө, байлдаа хэнгүй эбээ ойлголсохые ажаһуугшадтань дурадхагты.

¹¹ Хэрбээ тэдэ таанадтай үгэеэ ойлголсохоёо һанажа, бартануудаа сэлеэ һаа, таанадта ясаг түлэхэ, ажалыетнай хэхэ ёһотой.

¹² Хэрбээ тэрэ хотынхидой таанадта бэеэ тушаахаһаа арсажа, урдаһаатнай эсэргүүсэн дайлалдабалнь, тэрэ хотые бүһэлэгты.

¹³ Эзэн Бурхантнай тэрэниие эзэлхэдэтнай туһалха, тиихэдэнь бүхы эрэшүүлыень һэлмээр хороогооройгты.

¹⁴ Харин эхэнэрнүүдые, үхи хүүгэдые, адуу мал болон хото соо байгаа бүхы юумэ өөртөө абахадатнай болохо; Эзэн Бурханайнгаа туһаар дайсадаа диилээт, иигэжэ тэдэнэй зөөриие олзо болгон абажа, эдлэхэдэтнай болохо.

¹⁵ Танһаа угаа холо хотонуудта (хажуудахи арадуудайтнай хото бэшэл һаань), бултандань тон иимээр лэ хандаарайгты.

¹⁶ Харин Эзэн Бурханайнгаа эзэлхыетнай үгэжэ байһан тэрэ газарай хотонууд соо нэгэшье халуун ами бү үлөөгты, бултыень алагты!

¹⁷ Хээт, эмоор, ханаһаан, пэриззии, хиив, евүүс гэдэг арадуудые дууһан хюдаарайгты, юуб гэхэдэ, Эзэн Бурхантнай таанадта тиигэжэ захираа бэлэй.

¹⁸ Өөһэдынгөө бурхадта һүгэдэн хэдэг жэгшүүритэй муухай юумэ тэдэнэй таанадта заахагүйн тула, тиигээд Эзэн Бурханайнгаа урда нүгэл та бүгэдын хэхэгүйн тула тэдэниие хюдагты.

¹⁹ Эзэлхэ зорилго табижа, хотые удаан сагта бүһэлөөд байбашье һаа, алим жэмэстэ мододыень бү эбдэгты. Тэдэнэй үрэ жэмэсээр хооллоходо болохо бшуу. Оршон тойронхи байгаалиие ханха зайдан бү болгогты, юуб гэхэдэ, талын модон танһаа хоргодон хорохо хүн бэшэ ха юм даа.

²⁰ Эдихэ жэмэс үгэдэггүй модод гээд һайн мэдэхэ мододоо орбонгоорнь унагаажа, дайлажа байһан хото эзэлтэрээ урдаһаань бүхэлэлтэ тэрээгээр лэ хэхэдэтнай болохо.