Хуули дабталга 2 - Библи

¹ Эзэнэй захирһанай ёһоор, бидэ һөөргөө эрьежэ, Хулһата далай тээшэ ошоһон харгыгаар элһэн сүл губи руу зорибобди, Сэһиирэй хадануудые тойрон гаража, удаан саг соо ябаа бэлэйбди.

^2-3 «Энэ хада тойрожо ябахаяа болигты, хойто зүг руу ошогты, – гэжэ Эзэн намда айладхаа.

⁴ – Таанадта иимэ захиралта дамжуулхыемни Тэрэ уялгалаа: „Сэһиирэй уулархаг орон нютагта ажаһуудаг, танай түрэл болохо Эсаавай үри һадаһадай газараар гарахаяа байнат, тэдэнэр таанадһаа айха. Болгоомжотой байгты.

⁵ Тэдээнтэй дай бү үүдхэгты. Тэдэнэй альганайшье шэнээн газар таанадта үгэхэгүйб, Сэһиирэй хадата газарые Эсаавай уг унгида эзэмдэн ажаһуухыень үгөөб.

⁶ Тэдэнһээ мүнгөөр эдеэ хоол худалдажа абаад эдигты, мүнгөөр уһа худалдан абажа уугты.

⁷ Эзэн Бурханайнгаа бүхы ажал хэрэгүүдыетнай үреэһэн, агууехэ элһэн сүл губяар ябажа байхадатнай таанадые хаража байһан тухайнь бү мартагты. Дүшэн жэлэй туршада Эзэн Бурхантнай таанадтай хамта ябана, тиимэһээ та бүгэдэ ямаршье юумээр дуталдаагүйт“».

⁸ Тиимэһээ бидэ манай түрэл саданар болохо Эсаавай үри һадаһадай ажаһуудаг Сэһиирэй уулархаг орон нютагай хажуугаар үнгэржэ, нюруу газарһаа эхилээд, Элаат болон Эциһоон-Гээбэр хүрэтэр зурыһан харгыһаа хотиржо, Моһаабай элһэн сүл губи руу ошобобди.

⁹ Эзэн намда үгүүлбэ: «Моһаабай арад зонтой, Лоот гэгшын үри һадаһадтай бү муудалдагты, байлдаа бү үүдхэгты. Аар хотые тэдээндэ эдлэхыень үгэнхэйб, газарһаань юушье танда хүртүүлхэгүйб».

¹⁰ (Урдань Аарта анаакшууд мэтэ хүсэтэй, угаа олон, үндэр эмиимүүд гэдэг арад зон ажаһуугаа.

¹¹ Тэдэниие анаакшуудтал адляар рэпаиимүүд гээд тоолохо, теэд Моһаабай зон тэдэниие эмиимүүд гээд нэрлэдэг.

¹² Сэһииртэ урдань хории обог зон ажаһуугаа, теэд Эсаавай уг изагууртан газарыень эзэмдээд, өөһэдынгөө хажууһаа тэдэниие хюдан һалгаажа, орондонь байрлаа бэлэй. Эзэнэй үгэһэн энжэ газарые Израилиин улад зоной дайлан эзэмдэһэн мэтээр, тон тиимээр эдэнэр байрлаа.)

¹³ Эзэн намда айладхаба: «Заа, ябагты! Хадын жалга Зээрэд гаталагты». Иигээд бидэ хадын жалга Зээрэдые гаталаа бэлэйбди.

¹⁴ Кадээш-Барнээ гэгшэһээ манай ошоһонһоо хадын жалга Зээрэдые гаталһан саг хүрэтэр гушан найман жэл үнгэрөө. Эзэнэй тэдээндэ тангариглаһанай ёһоор обогоймнай тэрэ үеын сэрэгэй зон барандаа наһа бараа.

¹⁵ Эзэншье тэдэнэрые һалгааха гэжэ оролдоо, обогтомнай нэгэ нэгээрнь дайрадаг һэн, иигэжэ нэгэнииньшье амиды үлөөгүй.

¹⁶ Эдэ сэрэгшэдэй һүүлшынхинь наһа барахадань,

¹⁷ Эзэн намда иигэжэ айладхаба:

¹⁸ «Таанад мүнөөдэр Аар хотоор Моһаабай газар дайда гаталжа байнат.

¹⁹ Аммооной үри һадаһадай газарта дүтэлхэт, теэд тэдэнтэй бү муудалдагты, бү дайлалдагты, юуб гэхэдэ, Би Аммооной угай газарһаа таанадта юушье үгэхэгүйб. Тэдэнэр Лоот гэгшын уг удам болоно, тиимэһээ тэдээндэ эдлэхыень энэ газар үгэнхэйб».

²⁰ (Тэрэ рэпаиимүүдэй газар гэжэ тоологдодог байгаа. Урдань тэндэ рэпаиим обог зон ажаһуугаа. Аммоонууд тэдэниие замзууммшууд гээд нэрлэгшэ һэн.

²¹ Анаак гэгшын үри һадаһад мэтэ замзууммшууд хүсэтэй, угаа олон, үндэр бэетэй арад бэлэй. Аммоонуудай замзууммшуудые хюдахадань, Эзэн туһалаа һэн. Иигэжэ тэдэнэй газарые аммоонууд эзэмдэжэ байрлаа бэлэй.

²² Иимэ ушар Сэһииртэшье болоо һэн. Эзэн хории обог зониие тэндэ хюдажа, Эсаавай уг изагууртан газарыень эзэмдээд, байрлажа, мүнөөшье болотор тэндэ байһаар.

²³ Каптоорһоо ерэһэн каптоорууд Гааза тойрон жэрылдэһэн һууринууд соо ажаһуугша аввиимууд арад зониие хюдажа, газартань байрлаа.)

²⁴ Эзэн айладхаба: «Заа, ябагты! Хадын жалга Арноониие гаталагты. Харагты, эмоор обог зоной Хэшбооной хаан Сиһоониие танай мэдэлдэ үгэхэм. Тэдэнэй газар дайдые эзэмдэжэ эхилэгты, тэдээндэ дайгаар орогты!

²⁵ Энэ үдэрһөө эхилжэ, Би огторгой доро ажаһуугша бүхы арадуудые таанадһаа айхаарнь һүрдөөжэ эхилхэмни. Таанадай нэрэ дууламсаараа арадууд шэшэржэ-һүрдэжэ байхал».

Сиһоон хаанай үхэл

²⁶ Би Кэдэмоот элһэн сүл губиһаа Хэшбооной хаан Сиһоондо амгалан тайбан байдал дурадхан, элшэн сайдаа иигэжэ хэлэхыень эльгээбэб:

²⁷ «Танай газараар бидэнэй гарахые зүбшөөгыт, бидэ хажуу тээшээ хадуурангүй, харгыгаар сэхэ ябахабди.

²⁸ Эдеэ хоол таанадһаа мүнгөөр худалдан абажа эдихэбди, ууха уһа мүн лэ бидэндэ худалдахадатнай уухабди, гансал хүлөөрөө газарытнай гэшхэн гарахыемнай зүбшөөгыт.

²⁹ Сэһииртэ ажаһуудаг Эсаавай уг удам, Аарта ажаһуудаг Моһаабай улад зон бидэндэ эдэ бүгэдые зүбшөөгөө бэлэй. Эзэн Бурханайнгаа үршөөһэн газар руу Иордан гол гаталан орохо һанаатайбди. Танай газараар гарахыемнай зүбшөөгыт».

³⁰ Теэд Хэшбооной хаан Сиһоон газар нютагаарнь бидэнэй гарахые зүбшөөбэгүй. Юуб гэхэдэ, тэрэниие маанадта диилүүлхэ, газарыень эзэмдүүлхэ зорилготойгоор Эзэн Бурхамнай тэрэниие үсэрхүүлһэн, үгэ дууладаггүй болгоһон байгаа. Энэнь мүнөө бүтөөл.

³¹ Тиихэдэ Эзэн намда айладхаа бэлэйл: «Харагты, Би танда Хэшбооной хаан Сиһоониие газар дайдатайнь хамта гардуулхамни. Газар уһыень эзэмдэжэ эхилэгты!»

³² Иигэжэ Сиһоон бүхы арад түмэнөө дахуулан, Яаһац хотын хажууда бидэнтэй тулалдахаяа гаража ерэбэ.

³³ Харин Эзэн Бурхамнай тэрэниие манай мэдэлдэ дамжуулжа, бидэ Сиһоон хааниие үхи хүүгэдтэйнь, бүхы сэрэгтэйнь хамта хюдаа бэлэйбди.

³⁴ Тэрэ үедэ бүхы хотонуудыень эзэлээбди, һандаргаабди, эрэшүүл, эхэнэрнүүдые, үхи хүүгэдые бултыень алаабди, хэнииеньшье амиды үлөөгөөгүйбди.

³⁵ Гансал мал адууһа болон эдэ хотонууд соохи сэнтэй зөөрииень хүнэһэлжэ абаа һэмди.

³⁶ Арноон нюруу дээгүүр оршодог Ароһээр хотоһоо эхилээд, нюруу газарай һууринһаа захалаад, Галаад хүрэтэр нэгэшье хото бидэнэй урдаһаа ёһотой тулажа шадахагүй байгаа. Манай Эзэн Бурхан бидэндэ бултыень үгөө!

³⁷ Гансал Аммооной уг изагуурай газарта дүтэлөөгүйбди – Яббоок гэжэ гол шадар дайдада, уулархаг орон нютагай хотонуудта. Эзэн Бурханайнгаа гар хүрэхэгүй гэжэ захирһан нэгэшье газар уһанда бидэ дүтэлөөгүй һэмди.