Хуули дабталга 19 - Библи

Хэн тэдэ хотонууд соо хорохо эрхэтэйб

¹ Эзэн Бурханайтнай бусад арадуудые хюдан һалгаажа, газар дайдыень танда үгэһэнэй удаа таанад хотонуудтань, гэрнүүдтэнь ажаһуужа эхилхэдээ,

^2-3 Эзэн Бурханайнгаа үгэжэ байһан газарые гурбан хуби болгон хубаагты, тиигээд хуби бүхэнэй дунда тэрэ зоной хүрэхэдэнь бэлэн байха хото шэлэн тодорхойлогты. Хүниие хорооһон хэн нэгэн тэндэ хорохо аргатай болохо.

⁴ Ямар алууршан тиишээ зугадан ошобол, амиды мэндэ үлэхэ ёһотойб гэхэдэ, дайсад байгаагүй аад, дүтын хүнөө ойлгомторгүй хорооһон хэн нэгэн тэндэ хорохо аргатай.

⁵ Жэшээнь, хоёр хүн модо отолхоёо ой руу ошожо, модо отолхо гэжэ нэгэнэйнь һүхэтэй гараа далайхадань, һүхынь мунса эшэһээ мулта һүрөөд, нүгөөдэ хүниие дайража, тэрэнь гээгдэбэл, тэрэ ойлгомторгүй алаһан хүн амиды мэндэ үлэхын тула тэрэ гурбан хотонуудай нэгэндэ гүйжэ ошохо аргатай.

⁶ Ганса хото шэлэн орхёо һаатнай, тэрээн хүрэтэр зай холо байжа магад. Алуулһан хүнэй дүтын түрэл үһөөгөө абахаяа тэрэ сүйд хэһэн хүниие хүсэжэ баряад, уур сухал дундаа тэрэниие алажа магад. Теэд тэрэ алуулхаар юумэ хээгүй ха юм. Юуб гэхэдэ, гээгдэһэн хүнтэй бэе бэеэ үзэн ядажа һая наашашье байгаагүй.

⁷ Тиимэһээл гурбан хото шэлэгты гэжэ таанадта би захирна гээшэб.

^8-9 Мүнөөдэр минии дамжуулһан бүхы эдэ захяа заабаринуудые дүүргэхэеэ оролдодог, Эзэн Бурхандаа дуратай, наһаараа Тэрэнэй айладаһаар ажаһуугаа гээшэ һаатнай, үбгэ эсэгэнэртэтнай найдуулһанай ёһоор, бүхы газар дайда Тэрэ таанадта үгэхэл. Эзэн Бурхантнай газарайтнай хилэ үргэдхэхэб гэжэ үбгэ эсэгэнэртэтнай тангариглаа бэлэй. Тиихэдэнь, тэрэ гурбан хотодо үшөө гурбые нэмээрэйгты.

¹⁰ Тиигэбэл, танай харьяата газар болгон, Эзэн Бурханайтнай үгэжэ байһан газар дайдада зэмэгүй хүн алуулагдахаяа болихо, тэрэнэй түлөө таанад гэмтэй болохогүйт.

¹¹ Харин хэн нэгэн нүгөөдэ хүниие үзэн ядажа, һэмээхэнээр амадажа алаад, тэдэ хотонуудай нэгэн руу зугадан ошоо гээшэ һаань,

¹² хотын аха захатан хойноһоонь эльгээжэ, тэрэниие асаруулха ёһотой. Удаань үһөөгөө абажа алахыень алуулһан хүнэй дүтын түрэлдэ тэрэ хүниие дамжуулха болоно.

¹³ Алуулха хүниие бү хайрлагты, өөрөө тэрэ зэмэгүй хүниие алаа ха юм. Израильһаа энэ гэм зайсуулагты, тиигэбэл, таанадта һайн байхал.

Харьяата газарай хилэнүүд

¹⁴ Хүршынгөө газарай хилэнүүдые бү эбдэ. Эзэн Бурханайтнай эдлэхыетнай үгэһэн газар дайдада анха түрүүн ерэхэдээ, үбгэ эсэгэнэртнай газар хубаарилаа. Шинии хуби гэжэ тэмдэглэн шулуу табяа. Тэрэ шулуу бү хүдэлгэ.

Гэршэнэр тухай хуули ёһо

¹⁵ Хэнииешьеб хэн нэгэн гэмтэ ябадал, зэмэ, нүгэл хээ гэжэ зэмнэбэл, нэгэ хүнэй гэршэлһээр хэрэг бүтэхэгүй. Ямаршье гэмнэлгэ хоёр-гурбан хүнэй гэршэлгээр баталагдаха зэргэтэй.

¹⁶ Худалаар хүниие хэн нэгэн хардажа магад.

¹⁷ Тиигэбэл, заргалдагша тэдэ хоёр хоюулаа Эзэнэй нангин үргөө руу ошог, тэрэ үедэ санаартан болон шүүбэрилэгшэ байһан зон тэдэнэй хэрэг шиидхэг лэ.

¹⁸ Шүүбэрилэгшэд һайса тэрэ хэрэг шэнжэлхэ ёһотой. Гэршэлэн хэлэгшэ хүн нүгөөдэ хүниие, нэгэ яһанайнгаа хүниие, худалаар хардаа гэжэ элирбэл,

¹⁹ тэрэ хэһээлтэ амасаха ёһотой. Нүгөөдэ хүндэ тэрэ юу хэхэеэ байгааб, тон тиимэ юумэ өөртэнь хэгты. Иигэжэ өөһэдынгөө дундаһаа муу юумэ сараха болонот.

²⁰ Энээн тухай дуулаад, бусад зон айха, дахин хэзээдэшье иимэ бузар муухай юумэн үйлэдэгдэхэгүй.

²¹ Зэмэтэй хүниие хайрлажа бү байгты. Эндэ иимэ заяг заршам баримталагдаха ёһотой: ами наһыень хорообол, өөрынгөө ами наһаар түлэг, нюдэнэй түлөө нюдөөр, шүдэнэй түлөө шүдөөр, гарай түлөө гараар, хүлэй түлөө хүлөөр.